Yohanes 17 - Taaz Weru Witu u Nunuwu'en Tombulu

Sé pahtuzu'en ni Yesus méipengaléi-Na

¹ I nimakakuamola niitu, a si Yesus lumoho'ma witi langit ang kumua, “Ama', in tarékan é méikaayomola witu un oras tinotoz-Mu. Ipapaileka ung kawangko'ang-Ku in Oki'-Mu. Karia in téntu ni Aku kangkasii é mapailek ung kawangko'an-Nu.

² Si Ama' é niméhémo ung kawasa wia ni Aku ing kumawasa wia péléng sé tou, wo sé tou méiwéhé-Mu wia ni Aku ém wéhang-Ku ung katou-touan makaz ing kauré-uré.

³ Ung kenumo ung katou-touan makaz ing kauré-uré, i sé tou mata'u si Ama', si Ama' é si Opo Empung si esa uman si ulit wo mata'u ni Aku, si Yesus Kristus si méiatumé ni Ama'.

⁴ Ni Aku é nimapaileko ung kawangko'an ni Ama' im wia sé tou wia ung kaayahan kenu karia i simampeta um paayangen u méiwéhé-Mu wia ni Aku im paayangeng-Ku.

⁵ Wo in tarékan, o Ama', ipapaileka ung kawangko'an-Ku in Oki'-Mu, karia ung kawangko'an un anu-Ku karia ni Ama' rengan im puuna, puunala ung kaayahan kenu im winangun.

⁶ Ni Aku é nimapata'umoma si Ama' wia sé tou wia ung kaayahan kenu sé méiwéhémo ni Ama' wia ni Aku. Ni séra én anu ni Ama' wo si Ama' é niméhémo ni séra wia ni Aku. Ni séra éng kimiito u nuwu' ni Ama'.

⁷ In tarékan éng kinata'uan néramoma im péléng a méiwéhémé ni Ama' wia ni Aku ém wia si Ama' a méyé.

⁸ Pahpaan péléng a méinuwu' ni Ama' wia ni Aku é méikua-Kumola wia ni séra wo ni séra én timalingamo wo ma'émano niitu. Ni séra é mata'umo i ni Aku én uli-ulit wia si Ama' a méyé wo ni séra é ma'éman i si Ama' si nimatumé ni Aku.

⁹ Ni séra én ipengaléi-Kuma, zéi'kan sé tou walina sé wia ung kaayahan kenu sé ipengaléi-Kuma, taan wia ni séra sé mémoiwéhé ni Ama' wia ni Aku, pahpaan ni séra é anu ni Ama'.

¹⁰ Péléng sé méiwéhé wia ni Aku én anu ni Ama', wo péléng an anu ni Ama' én anu-Ku kangkasii, wo ni séramo sé nimapailek ung kawangko'an-Ku.

¹¹ In tarékan ni Aku én zéi'mo mauréma mawurimo sumaup wia si Ama'. Ni Aku én tumula'u ung kaayahan, taan ni séra é memia-miapé' wia ung kaayahan. O Ama' Lenas, téizané séra karia u ngaran ni Ama', niitumo u ngaran méiwéhé ni Ama' wia ni Aku, wo séra maesa tanu ni Aku wo si Ama' nimaesa.

¹² I ni Aku mengari-ngaria ni séra, ni Aku én timéizo ni séra karia u ngaran ni Ama' u méiwéhé wia ni Aku. Ni Aku én timéizo ni séra wo zéi'kan siapa im wia ni séra si ikalulu, akaz uman ni sia si tinotozo in ikalulu, wo malekep u méipantik witu um Pinantik Lenas.

¹³ Taan in tarékan, ni Aku é méyé wia si Ama' wo ni Aku kumua niia péléng karegas ni Aku im wiapé' ung kaayahan kenu, wo ni séra toro uli-ulit mahpaa-paaz tanu ni Aku.

¹⁴ Ni Aku éng kimuamoma u nuwu' ni Ama' wia sé pahtuzu'eng-Ku, niitumo sé tou wia ung kaayahan kenu é mazi'zis ni séra pahpaan ni séra én zéi'kan masuat karia né tou wia ung kaayahan kenu sé zéi'kan ma'éman. Ni Aku kangkasii én zéi'kan masuat karia né tou wia ung kaayahan kenu.

¹⁵ Ni Aku zéi'kan mahaléi, wo séra éndona ni Ama' im wia ung kaayahan kenu, taan wo séra téizan ni Ama' im wia si tonaas né sétang.

¹⁶ Ni séra én zéi'kan masuat karia né tou wia ung kaayahan kenu sé zéi'kan ma'éman, tanu ni Aku in zéi'kan masuat karia né tou wia ung kaayahan kenu.

¹⁷ Lenasela séra wia si Ama' mengiité ung kaulitan pahpaan u nuwu' ni Ama' itiimo ung kaulitan.

¹⁸ Tanu si Ama' nimatumé ni Aku i méyé wia ung kaayahan, téntu kangkasii ni Aku nimatu ni séra i mangé wia sé tou walina sé wia ung kaayahan.

¹⁹ Ni Aku nimayo un tou-Ku i maéndo anu ni Ama' uman pahpaan sé pahtuzu'eng-Ku, wo séra mayo un tou néra wia si Ama' mengiité ung kaulitan u nuwu' ni Ama'.

²⁰ Zéi'kan uman wia sé pahtuzu'eng-Ku ni Aku mengaléi, taan kangkasii wia sé tou, sé ma'éman wia ni Aku mengiité a méipahwoka' néra.

²¹ Ni Aku mengaléi, wo ni séra péléng maesa, tanu si Ama' nimaesa karia-Ku wo ni Aku nimaesa karia ni Ama'. Wo ni séra kasii nimaesa karia ni Kita, wo sé tou walina wia ung kaayahan kenu ma'éman i si Ama' si nimatumé ni Aku.

²² Ni séra ém winéhang-Kumo ung kawangko'an u méiwéhémé ni Ama' wia ni Aku, wo séra maesa, tanu ni Aku nimaesa karia ni Ama'.

²³ Ni Aku nimaesa karia néra wo si Ama' nimaesa karia-Ku wo ni séra uli-ulit nimaesa. Wo sé tou walina wia ung kaayahan kenu mata'u i si Ama' si nimatumé ni Aku wo si Ama' rumaraaté ni séra, tanu si Ama' rumaraaté ni Aku.

²⁴ O Ama', kapaaz-Ku wisa uman un angéang-Ku, ni séra é memali-mali karia-Ku. Ni séra sé mémoiwéhémé ni Ama' wia ni Aku wo ni séra mahileka ung kawangko'an-Ku u mémoiwéhé ni Ama' wia ni Aku, pahpaan si Ama' é rimaraatémola ni Aku puunala ung kaayahan im winangun.

²⁵ O Ama' si zéi'kan mahsanaweka, sé tou wia ung kaayahan én zéi'kan mata'u si Ama', taan ni Aku é mata'u si Ama' wo sé pahtuzu'eng-Ku kenu é mata'u i si Ama' si nimatumé ni Aku.

²⁶ Séi si Ama' é mémoikua-Ku wia ni séra, wo niitu én zéi'kan ikana'-Ku im wanguneng-Ku, wo séra mahraa-raatéan tanu si Ama' rumaraaté ni Aku wo ni Aku maesa karia néra.”