Yohanes 14 - Taaz Weru Witu u Nunuwu'en Tombulu

Si Yesus é lalan i mangé wia si Ama'

¹ Kuan ni Yesus wia sé pahtuzu'en-Na, “Tia'mo un até niou nimasusa, ma'émanola wia si Opo Empung wo ma'éman kasiila wia ni Aku.

² Im witi walé ni Ama'-Ku é lakez un ento'an. Ni Aku i mangé witu é mamimek un tampa niou. Sa zéi'kan téntu, ni Aku én zéi'kan kumua niitu wia ni kamu.

³ Sa ni Aku nimangémomé witu wo nimimekomé un tampa niou, ni Aku é méyé sumaup wo mahwali ni kamu mangé witi pahwéha-wéhang-Ku, wo wisa uman un angéang-Ku, ni kamu kasii ém witu.

⁴ Wisa uman un angéang-Ku, ni kamu é mata'u u lalan mangé witu.”

⁵ Ang kuan ni Tomas wia ni Sia, “Tuang, zéi'kan kata'uan nai wisa un angéan-Nu, kura kahuman ni kai mata'u u lalan mangé witu?”

⁶ Kuan ni Yesus wia ni sia, “Ni Akumo si lalan i mangé wia si Opo Empung wo mapata'u ung kaulitan tumoro si Opo Empung wo si mahwéhé ung katou-touan makaz ing kauré-uré. Zéi'kan siapa zozo' in esa si mangé wia si Ama' sa zéi'kan mengiité ni Aku.

⁷ Sa ni kamu mata'u ni Aku, tantumo ni kamu kasii é mata'u si Ama'-Ku. Rengan in tarékan ni kamu é mata'u ni Sia wo ni kamu é nimileko ni Sia.”

⁸ Ang kuan ni Filipus wia ni Sia, “Tuang, ituzu'mé wia ni kai si Ama' itii, im wia ni kai niitu én toromo.”

⁹ Kuan ni Yesus wia ni sia, “Filipus, urémo ni Aku i memali-mali karia niou, kura kahuman ni ko zéi'kan mata'u ni Aku? Séi uman si nimileko ni Aku, ni sia é nimileko si Ama'. Kura kahuman ni ko mahkua, ituzu'mé si Ama' itii wia ni kai?

¹⁰ Zéi'kan pa'émanennu wé i ni Aku é nimaesa karia ni Ama' wo si Ama' é nimaesa karia-Ku? A méikua-Kuma wia ni ko én zéi'kan witu ung genang-Ku a mangé, taan wia si Ama' si nimaesa karia-Ku a mangé, ni Siamo si mahwangun péléng am pahpaayangen-Na.

¹¹ Pa'émanela i ni Aku é nimaesa karia ni Ama' wo si Ama' é nimaesa karia-Ku. Sa ni kamu zéi'kan ma'éman ni Aku pahpaan am pahkua-Ku, pa'émanené ni Aku pahpaan am pinaayang-Ku kenu.

¹² Uli-ulit ikua-Kuma wia ni kamu: Séi uman si ma'éman ni Aku, ni sia é mamaayang am pahpaayangeng-Ku. Wo zéi'kan uman niitu, ni sia kangkasii é maayang am paayangen lumouspé'mé niitu, pahpaan ni Aku é mangé wia si Ama'.

¹³ Wo apa uman um pahaléien niou mengiité u ngaran-Ku, niitu ém wanguneng-Ku, wo si Ama' pahloozen wo pahsigi'en mengiité si Oki'.

¹⁴ Sa ni kamu wéwéhan um pahaléien wia ni Aku mengiité u ngaran-Ku, niitu ém wanguneng-Ku.”

Si Yesus niméhé un taaz i méhé si Menunulung

¹⁵ Kuan ni Yesus kasii wia sé pahtuzu'en-Na, “Sa kamu rumaraaté ni Aku, ni kamu é mangun a méiperénta-Ku.

¹⁶ Ni Aku é mahaléi wia si Ama', wo ni Sia é méhé wia ni kamu si Menunulung walina, wo ni Sia mengari-ngaria ni kamu makaz ing kauré-uré.

¹⁷ Si Menunulung itii é si Roh ung kaulitan. Sé tou wia ung kaayahan é soo sumungkul ni Sia, pahpaan sé tou wia ung kaayahan én zéi'kan mahilek ni Sia wo zéi'kan mata'u ni Sia. Taan ni kamu é mata'u ni Sia, pahpaan ni Sia é menaté-natér ni kamu wo maesa karia niou.

¹⁸ Ni kamu én zéi'kan itula'u-Kuma tanu sé koki' zéi'kan siapa tu'a. Ni Aku é méyé sumaup wia ni kamu.

¹⁹ Zéi'mo mauréma sé tou wia ung kaayahan kenu én zéi'mo milek ni Aku. Taan ni kamu é mamilek ni Aku, pahpaan ni Aku é menou-nou wo ni kamu kangkasii é mamenou-nou.

²⁰ In endo itiimo ni kamu lamata'u i ni Aku é nimaesa karia ni Ama', ni kamu é nimaesa karia-Ku wo ni Aku é nimaesa karia niou.

²¹ Séi uman si nimakailek um perénta-Ku wo mahwangun niitu, ni siamo si rumaraaté ni Aku. Séi uman si rumaraaté ni Aku, ni sia én ikararaaté ni Ama'-Ku wo ni Aku kangkasii é rumaraaté ni sia wo ni Aku é mangun ni sia i mata'u séi ni Aku.”

²² Si Yudas, zéi'kan si Iskariot, meligau wia ni Sia, “Tuang, kura kahuman ni Ko mangun ni kai i mata'u ni Ko, taan sé tou walina sé wia ung kaayahan kenu én zéi'kan?”

²³ Ang kuan ni Yesus, “Si tou rumaraaté ni Aku é mangun a nuwu'-Ku. Si Ama'-Ku é rumaraaté ni sia wo si Ama'-Ku wo ni Aku é méyé wia ni sia wo mento' mahwali-wali kariana.

²⁴ Séi uman si zéi'kan rumaraaté ni Aku, si tou itii én zéi'kan mahwangun a nuwu'-Ku. Wo a nuwu' tinalinga niou itii én zéi'kan wia ni Aku a mangé, taan wia si Ama' si nimatumé ni Aku a mangé.

²⁵ Péléng niitu é méikua-Kuma wia ni kamu karegas ni Aku i memali-malipé' karia niou.

²⁶ Taan si Roh Lenas, si Menunulung, si iatumé ni Ama'-Ku mengiité u ngaran-Ku, ni Siamo si matumuzu' ni kamu péléng am péléng wo mapagenang wia ni kamu péléng a mémoikua-Ku wia ni kamu.

²⁷ Ung kaluasan witu un até én itula'u-Kuma wia ni kamu. Ung kaluasan witu un até-Ku én iwéhé-Kuma wia ni kamu. Wo ung kaluasan witu un até u méiwéhé-Kuma itii én zéi'kan masuat karia ung kaluasan witu un até u méiwéhé né wia ung kaayahan wia ni kamu. Tia'mo un até niou masusa wo maindé'.

²⁸ Ni kamu én timalingamo ni Aku ing kimua wia ni kamu: ni Aku é mangé, taan ni Aku é méyé sumaup wia ni kamu. Sa ni kamu rumaraaté ni Aku, tantumo ni kamu é mahpaa-paaz pahpaan ni Aku é mangé wia si Ama'-Ku, pahpaan si Ama' é lumouspé'mé ni Aku.

²⁹ In tarékan én ikua-Kuma wia ni kamu puunala niitu i mamuali, wo sa niitu mamualima, ni kamu é ma'éman.

³⁰ Zéi'mo lakez un ikua-Kuma wia ni kamu pahpaan si tonaas né sétang si mahkawasa wia ung kaayahan kenu é mahéyémo. Taan ni sia én zéi'kan siapa kawasa i merénta ni Aku.

³¹ Taan péléng sé tou wia ung kaayahan kenu é léwo'zéi' mata'u i ni Aku é rumaraaté si Ama' wo ni Aku é mangun péléng a méiperénta-Na wia ni Aku. Rumendaiomé, méyémo kita mangémo.”