Yohanes 12 - Taaz Weru Witu u Nunuwu'en Tombulu

Un a'é ni Yesus niisu' karia u lana mahwou tariis

¹ Enemna endo puunala um Paskah né tou Yahudi, si Yesus niméyé witi wanua Betania, um pahento'an ni Lazarus si méitoumé sumaup ni Yesus im wia sé nimaté.

² Im witu si Yesus méiimek néra kuman im wengi wo si Marta si mahselewir ni séra. Si Lazarus én esaané im wia sé rimumez mahkan karia ni Yesus.

³ A si Maria méndomé u sana pahzuana liter lana mahwou tariis, ngaran u lana itii é narwastu, un zéi'kampé' sinembor wo totoz mahal an iwuwu'nala u lana itii witu un a'é ni Yesus am pahisu'ennama un a'é ni Yesus karia um wuukna. Péléng um witu un untep um walé itii é mahwoukané tariis pahpaan u lana itii.

⁴ Taan si Yudas Iskariot, si esaané im wia sé pahtuzu'en ni Yesus, si mamangkér si Yesus, mahkua,

⁵ “Kaa u lana narwastu itii zéi'kan méiwangkéra teluna atus dinar wo un zoitna iwéhéma wia sé tou zéi'kan siapa apa?”

⁶ Niitu méikuanama zéi'kan pahpaan ni sia mahwéhé genang wia sé tou zéi'kan siapa apa, taan pahpaan ni sia é maremu'. Ni sia sekezé é mahéndo an zoit méilé'os wia ni sia.

⁷ Ang kuan ni Yesus, “Iwayamola sia i mangun niia ing gumenang un endo ni Aku in ileweng.

⁸ Pahpaan sé tou zéi'kan siapa apa sekezé é memali-mali karia niou, taan ni Aku zéi'kan sekezé é memali-mali karia niou.”

Sé tonaas né walian gimenang i munu' si Lazarus

⁹ Lakez sé tou Yahudi timalinga i si Yesus ém witu wo ni séra niméyé zéi'kan uman pahpaan si Yesus, taan kangkasii i mémilek si Lazarus, si méitoumé sumaup ni Yesus im wia sé nimaté.

¹⁰ A sé tonaas né walian gumenang i munu' kangkasii si Lazarus,

¹¹ pahpaan ni sia nimangun lakez sé tou Yahudi timula'u ni séra wo nima'éman wia si Yesus.

Si Yesus pahloozen né tou i muntep witi Yerusalem

¹² I masandonamé, sé tou lakez mélumé'os um Paskah né tou Yahudi én timalingala i si Yesus mahlampang mahéyémo wia u Yerusalem,

¹³ ni séra mahéndomé an zani'na am palem a masumungkul ni Sia, karia i mahkérét, “Hosana! Loozela ni Sia si niméyé karia u ngaran ni Opo Empung, si Kolano né Israel!”

¹⁴ Si Yesus nimakailekla si keledai peranggang a Sia sumakéla wia si keledai itii. Niitu én tanu u méipantik witu um Pinantik Lenas in téntii:

¹⁵ “Tia'mo maindé', é kamu sé witi Sion! Ilekena, si Kolano niou é mahéyémo, simakémé wia si keledai peranggang.”

¹⁶ In toro niitu sé pahtuzu'en ni Yesus én zéi'kampé' makatulap am pahwangunen né tou lakez itii. Taan i si Yesus nimakailekola u sigi' wo looz i ni Sia méitoumomé sumaup, taré kagenangan nérala péléng a nimamuali wia si Yesus, tanu u méikua ni Opo Empung witu um Pinantik Lenas, téntu kangkasii péléng am winangun néra wia ni Sia.

¹⁷ A sé tou lakez sé memali-mali karia ni Yesus mahkua tumoro a niilek néra i ni Sia timawahmé si Lazarus nimondolé im witu u lelewengan wo timou sumaup ni sia im wia sé nimaté.

¹⁸ Niitumo lakez sé tou masimungkul ni Sia, pahpaan ni séra timalinga i ni Sia si nimangun u makakompo'en itii.

¹⁹ A sé tou im wia sé sana réwok tou Farisi mahkuaala, “Ilekenola, kumurapé' kita! Péléng sé tou mahkiit ni Sia.”

Si Yesus mahkua tumoro um patéan-Na

²⁰ Im wia sé tou marumagés wia si Opo Empung im witu un endo mahpésta itii ém wéwéhan sé woopira tou Yunani.

²¹ Sé tou itii nimangé wia si Filipus. Si Filipus én tou Betsaida um witi Galilea. Ni séra mahkua wia ni sia, “Tuang, ni kai ém paaz mahilekan karia ni Yesus.”

²² A si Filipus makumua tumoro niitu wia si Andreas. A si Andreas wo si Filipus makumua tumoro niitu wia si Yesus.

²³ Ang kuan ni Yesus wia ni séra, “In tarékano un orasna si Oki' ni Tou i loozen wo sigi'en.

²⁴ Uli-ulit ikua-Kuma wia ni kamu: Sa um watuna ung gandum zéi'kan méitanem witu un tana' wo maté, niitu é menéntu-néntu uman zéi'kan mahawes. Taan, sa um watuna ung gandum itii matéma, taré niitu tumoumé wo mua'mé lakez.

²⁵ Séi uman si rumaraaté ung katou-touanna, si tou itii éng kaliongan ung katou-touanna. Taan séi uman si zéi'kan rumaraaté ung katou-touanna im wia ung kaayahan kenu, ni sia éng kumelung ung katou-touanna itii makaz ing kauré-uré.

²⁶ Séi uman si mahpaayang wia ni Aku, ni sia é léwo'zéi' ing kumiit ni Aku wo wisa uman un angéang-Ku, ni sia é léwo'zéi' im witu. Séi uman si mahpaayang wia ni Aku, ni sia é masigi'en ni Ama'.

²⁷ In tarékan un até-Ku én totoz rumara. Apapé' un ikua-Kuma? Apa ni Aku kumua, ‘Ama', tia'mo iwaya ni Aku mazézéha tanu niia.’ Zéi'kan. Pahpaan ni Aku i niméyé wia ung kaayahan kenu é méyé i mazéha.

²⁸ Ama', ituzu'mé ung kawangko'an-Nu!” An talingané u nuwu' witi kasendukan a méyé, “Ni Aku én timuzu'mo ung kawangko'an-Ku. Wo ni Aku kasii é matumuzu' ung kawangko'an-Ku sumaup.”

²⁹ Sé tou lakez rimendai witu wo timalinga niitu mahkua i niitu én tila'pong uman. Wéwéhan kasii sé mahkua, “Si malaekat é nimuwu'moma karia-Na.”

³⁰ Ang kuan ni Yesus, “U nuwu' taré tinalinga nioua itii én zéi'kan ipapaayo wia ni Aku, taan ipapaayo wia ni kamu.

³¹ In tarékan én orasnamo si Opo Empung in tumotoz ulit kaapa zéi'kan am pahwangunen né tou wia ung kaayahan kenu, in tarékan kasii si Tonaas né sétang si mahkawasa wia ung kaayahan kenu éng kalan.

³² Wo ni Aku, sa ni Aku itooz im wia ung kaayahan kenu, ni Aku mangun péléng sé tou méyé wia ni Aku.”

³³ Ni Sia kimua téntu i mapata'u kura Sia i maté.

³⁴ A Sia wingkotela né tou lakez, “Ni kai én timalingamo im wana an tinotoz witu un ukum Torat i si Mesias é menou-nou makaz ing kauré-uré. Kura kahuman ni Ko mahkua i si Oki' ni Tou é léwo'zéi' in itooz? Séi si Oki' ni Tou itii?”

³⁵ Kuan ni Yesus wia ni séra, “U sena' én zéi'mo mauréma i mengari-ngaria ni kamu. Lumampangola karegas u sena itii im wiapé' ni kamu, wo ung karimbengbengan tia' kumawasa wia ni kamu. Séi uman si mahlampang witu ung karimbengbengan, ni sia én zéi'kan mata'u wisa um pahsaruanna.

³⁶ Pa'émanela u sena' itii, karegas u sena itii wia ni kamu, wo ni kamu maéndo oki' ni sena'.” I nimakakuamola niitu, a si Yesus mangé witi tampa zéi'kan kata'uan néra.

Sé tou Yahudi zéi'kan ma'éman si Yesus

³⁷ Zozo' si Yesus nimangun lakez a makakompo'en witu u sinaru néra, taan ni séra én zéi'kan ma'éman wia ni Sia,

³⁸ wo malekepla u méikua ni Nabi Yesaya, “Mahpiara, séi si ma'éman an ipahwoka' nai? Wo wia sé séi ung kawasa ni Mahpiara ipapailek?”

³⁹ Niitumo ni séra zéi'kan mata'u ma'éman, pahpaan si Yesaya kangkasii éng kimuamo,

⁴⁰ “Ni Sia é nimanguno um weren néra nimaletok wo un até néra nimaketéh, wo zozo' ni séra wéwéhan weren taan ni séra én zéi'kan makailek wo ung genang néra én zéi'kan makatulap, a séra méyé wia ni Aku wo séra lé'oseng-Ku.”

⁴¹ Ung kenu é méikua ni Yesaya, pahpaan ni sia é nimileko ung kawangko'an ni Yesus wo kimuamo tumoro ni Sia.

⁴² Zozo' in téntu, im wia sé tonaas né tou Yahudi é lakez kangkasii sé ma'éman wia si Yesus. Taan ni séra é soo kumua i ni séra é ma'éman wia ni Sia, pahpaan ni séra é maindé' wia sé sana réwok tou Farisi sé toro suméro' ni séra i muntep witu um Walé pahragésan né tou Yahudi.

⁴³ Pahpaan u lolooz né toupé' ung kapaaz néra taan u lolooz ni Opo Empung.

A Nuwu' ni Yesus matumotoz ulit kaapa zéi'kan am pahwangunen né tou

⁴⁴ A si Yesus kuméréta, “Séi uman si ma'éman ni Aku, zéi'kan ni Aku si pa'émanenna taan ni sia é ma'éman si nimatumé ni Aku.

⁴⁵ Wo séi uman si mahilek ni Aku, si tou itii é mahilek ni Sia si nimatumé ni Aku.

⁴⁶ Ni Aku é niméyé wia ung kaayahan kenu in tou si nimahalimé u sena', wo sé tou sé ma'éman wia ni Aku én zéi'kan mahwitu-witu ung karimbengbengan.

⁴⁷ Sa si tou timalinga an ipahkua-Ku, taan zéi'kan mahwangun niitu, ni Aku én zéi'kan tumotoz ulit kaapa zéi'kan um pahwangunenna. Pahpaan ni Aku i méyé én zéi'kan i mukum sé tou wia ung kaayahan kenu, taan i milot ni séra im witu un ukuman wana a singkéla'.

⁴⁸ Si tou soo ni Aku wo soo mahtalinga um pahkua-Ku ém wéwéhano si tumotoz ulit kaapa zéi'kan am pahwangunenna. A Nuwu' méipahkua-Ku, niitumo u matumotoz ulit kaapa zéi'kan um pahwangunenna im witu un endo kaakazan ung kaayahan.

⁴⁹ Pahpaan ni Aku zéi'kan mahnuwu' mengiit ung kapaaz-Ku. Si Ama' si nimatumé ni Aku, ni Siamo si mahperéntamé wia ni Aku apa u léwo'zéi' in ikua-Ku wo inuwu'-Ku.

⁵⁰ Kata'uang-Ku um perénta ni Ama'-Ku é mahwéhémé ung katou-touan makaz ing kauré-uré. Niitumo, ni Aku é mahkuama tanu a méikua-Namé wia ni Aku.”