Yohanes 10 - Taaz Weru Witu u Nunuwu'en Tombulu

Un aandéan tumoro si memimiara wo sé dombana

¹ A si Yesus kumuama, “Uli-ulit ikua-Kuma wia ni kamu: Séi uman si muntep witu um pahpiaraan sé domba zéi'kan mahkiit um pepenet, taan mahlawa'mé witu u réhén, si tou itii é maremu' wo mengangahat an anu né tou walina.

² Taan si tou mahuntepé mahkiité um pepenet, ni sia é memimiara sé domba.

³ Si menénéiz um pepenet um pahpiaraan sé domba é muka um pepenet wia si memimiara sé domba wo sé domba é mahkii-kiit u nuwu'na i ni sia mahtawah u ngaran néra si esa wo si esa wo mahwali ni séra i mondolé.

⁴ I nimakaondolomé péléng sé domba itii, si memimiara sé domba itii é mahlampanga mahpuuna im wia ni séra wo sé domba itii mahkiita ni sia pahpaan ni séra é mata'u u nuwu' ni memimiara sé domba itii.

⁵ Ni séra é soo kumiit si zéi'kan kata'uan néra wo ni séra én tumingkas im wia si tou itii pahpaan u nuwu' ni tou itii zéi'kan kata'uan néra.”

⁶ Si Yesus éng kimua u aandéan kenu wia sé sana réwok tou Farisi itii, taan zéi'kan katulapan néra apa un ipahkukua-Na wia ni séra.

⁷ Niitumo si Yesus kimua kasiima, “Uli-ulit ikua-Kuma wia ni kamu, ni Akumo si pepenet wia sé domba itii.

⁸ Péléng sé tou niméyé puunala ni Aku, ni séra é maremu' wo mengangahat taan sé domba itii én zéi'kan mahtalinga ni séra.

⁹ Ni Akumo si pepenet. Séi uman si muntep kimiité ni Aku, ni sia én ipilot im witu un ukuman wana a singkéla'. Ni sia én tanu si domba si muntep wo mondol a makailek kakanen.

¹⁰ Si maremu' é méyé uman i rumemu', munu' wo méluméwo'. Taan ni Aku é niméyé, wo sé tou makailek ung katou-touan, niitumo ung katou-touan linakez ung kamang.

¹¹ Ni Akumo si memimiara sé domba si lé'os uman. Si memimiara domba lé'os é mayo ung katou-touanna pahpaan sé dombana.

¹² Taan si pemamaéran uman ni makaanu sé domba wo zéi'kan makaanu sé domba itii én tumingkas tumula'u sé domba itii i mileka si serigala mahéyé. Niitumo sé domba itii é sineza' wo siniru ni serigala.

¹³ Si tou itii én timingkas pahpaan si tou itii ém pemamaéran uman wo sé domba itii én zéi'mo pinandungnama.

¹⁴ Ni Akumo si memimiara sé domba si lé'os uman wo kata'uang-Ku sé domba-Ku wo sé domba-Ku é mata'u ni Aku,

¹⁵ tanu si Ama' mata'u ni Aku wo ni Aku mata'u si Ama', wo ni Aku mahwéhé ung katou-touang-Ku, wo sé domba-Ku toro menou-nou.

¹⁶ Taan ni Aku kangkasii é makaanu sé domba walina sé zéi'kan wia um pahpiaraan kenu. Sé domba itii kangkasii é léwo'zéi' im pahwali-Ku wo ni séra matumalinga u nuwu'-Ku wo ni séra é maéndo sana réwok domba esa memimiara.

¹⁷ Si Ama' rumaraaté ni Aku pahpaan ni Aku nimayo ung katou-touang-Ku, wo niitu toro kailekang-Ku sumaup.

¹⁸ Zéi'kan siapa si toro méndo ung katou-touang-Ku im wia ni Aku, taan ni Aku mayo niitu mengiit um paaz-Ku in esa. Ni Aku é mahkawasa i mayo niitu wo mahkawasa i méndo niitu sumaup. Niiamo um perénta kinailekang-Kumé wia si Ama'-Ku.”

¹⁹ Pahpaan u méikuama ni Yesus itii, sé tou Yahudi itii mahéndo-éndoano kasii. Lakez im wia ni séra sé mahkua,

²⁰ “Ni Sia é sinelazan ni sétang wo pahléla'eno! Kaa kamu mahtalinga ni Sia?”

²¹ Sé walina é mahkua, “Niitu én zéi'kan kukuan ni sinelazan, toro wé si tou sinelazan lumé'os um weren ni letok?”

Sé tou Yahudi soo si Yesus

²² An ikaayola witu un endo mahpésta ing gumenang um Walé ni Opo Empung witi Yerusalem im wineru sumaup. In toro niitu én oras in zaté.

²³ Si Yesus melampa-lampang witi lésaz um Walé ni Opo Empung witi porés nginaranan Salomo.

²⁴ A sé tou Yahudi rumimbungla wia ni Sia a mahkua wia ni Sia, “Makaz sawisa ni kai iwaya-Mu i mahzua-zua genang? Sa ni Ko é Mesias, ipakaulitomé wia ni kai.”

²⁵ A si Yesus mingkotla wia ni séra, “Mémoikua-Kula wia ni kamu taan ni kamu én zéi'kan ma'éman. Am paayangen pinaayang-Ku karia u ngaran ni Ama'-Ku, nianamo an tumuzu'mé tumoro ni Aku.

²⁶ Taan ni kamu in tou Yahudi én zéi'kan ma'éman pahpaan ni kamu én zéi'kan méikarékén domba-Ku.

²⁷ Sé domba-Ku mahtalinga u nuwu'-Ku wo ni Aku mata'u ni séra wo ni séra mahkiit ni Aku.

²⁸ Ni Aku é mahwéhé ung katou-touan makaz ing kauré-uré wia ni séra wo ni séra uli-ulit zéi'kan maléwo' makaz ing kauré-uré wo zéi'kan siapa zozo' in esa si kumahat ni séra im witu u lengen-Ku.

²⁹ Si Ama'-Ku, si niméhémé ni séra wia ni Aku, ung kawasa-Na é lumousé péléng am péléng. Wo zozo' in esa én zéi'kan siapa si toro kumahat ni séra im witu u lengen ni Ama'.

³⁰ Ni Aku wo si Ama'-Ku én esa.”

³¹ Makasapé' kasii sé tou Yahudi niméndomé watu i merit si Yesus.

³² Kuan ni Yesus wia ni séra, “Lakez am paayangen lé'os am wia si Ama'-Ku a méyé, a méipapailek-Ku wia ni kamu. Im wana am pinaayang-Ku itii, wisa u nimangun ni kamu im paaz merit ni Aku?”

³³ Wingkotela né tou Yahudi itii, “Ni kai paaz merit ni Ko én zéi'kan pahpaan am paayangen lé'os pinaayang-Mu, taan pahpaan ni Ko mahséro' wia si Opo Empung. Wo pahpaan ni Ko, zozo' in tou uman, pahpasuaten-Nu un tou-Mu karia si Opo Empung.”

³⁴ Kuan ni Yesus wia ni séra, “Wéwéhan u méipantik witu un ukum Torat niou: si Opo Empung é nimuwu'mo, ‘Ni kamu én tanu empung’.

³⁵ Kata'uantamo im péléng a méipantik witu um Pinantik Lenas én zéi'kan mata'u zéi'en makaz ing kauré-uré. Niitumo, sa si Opo Empung kimua ‘empung’ wia sé tou nimakailek u nuwu'-Na,

³⁶ kaa ni kamu mahkua ni Aku mahséro' wia si Opo Empung pahpaan mahkua ni Aku én Oki' ni Opo Empung? Ni Aku ém pinéléng ni Ama' wo nimatumé ni Aku i méyé wia ung kaayahan.

³⁷ Sa ni Aku zéi'kan mahpaayang am paayangen ni Ama'-Ku, tia'mo ma'éman wia ni Aku.

³⁸ Taan sa ni Aku nimangun niitu wo ni kamu soo ma'éman wia ni Aku, pa'émanenola am pinaayang-Ku itii, wo ni kamu toro mata'u wo makatulap i si Ama' é nimaesa karia-Ku wo ni Aku é nimaesa karia si Ama'.”

³⁹ Makasapé' kasii ni séra i mahtition ni Sia, taan ni Sia én zéi'kan kinationan néra.

⁴⁰ A si Yesus mangé witi leweta u so'so'an Yordan, witi tampa pahsaranian ni Yohanes im puuna, a Sia mento' witu.

⁴¹ Lakez sé tou mahéyé wia ni Sia a mahkua, “Zéi'kan siapa zozo' in esa a makakompo'en winangunla ni Yohanes Menanarani, taan péléng a méipahkuamola ni Yohanes tumoro si tou kenu én ulit.”

⁴² Im witu, lakez sé tou ma'éman wia ni Sia.