Yohanes 1 - Taaz Weru Witu u Nunuwu'en Tombulu

U Nuwu' ni Opo Empung nimaéndomo tou

¹ Ing kataré-taré, puunala ung kaayahan im winangun, u Nuwu' ni Opo Empung ém wiamo. U Nuwu' ni Opo Empung é mengari-ngaria si Opo Empung wo ni Sia é si Opo Empung in esa.

² Ing kataré-taré puunala ung kaayahan im winangun, u Nuwu' ni Opo Empung é mahwali-wali karia ni Opo Empung.

³ Peléng am péléng ém winangun ni Opo Empung mengiité u Nuwu' ni Opo Empung. Wo zéi'kan siapa zozo' in esa im wia péléng am winanguno kenu ém winangun sa zéi'kan siapa u Nuwu' ni Opo Empung.

⁴ U Nuwu' ni Opo Empung itii é mahwéhémé ung katou-touan wo ung katou-touan itii é sena' im wia sé tou.

⁵ U sena' itii é mahsena' witu u rimbengbeng wo u rimbengbeng itii én zéi'kan kimawasa u sena' itii.

⁶ A méyé si méiatumé ni Opo Empung, ni sia é makangaran Yohanes.

⁷ Ni sia i niméyé é mékumua a niilek wo an tinalingana tumoro u sena' itii, wo péléng sé timalingama a méikuana é ma'éman u sena' itii.

⁸ Si Yohanes én zéi'kan u sena' itii, taan ni sia éng kumua a niilekna tumoro u sena' itii.

⁹ Un uli-ulit sena' u mahsena' wia péléng sé tou é mahéyémo wia ung kaayahan.

¹⁰ Taan un ulitna u sena' itii ém wiamo ung kaayahan kenu wo ung kaayahan kenu ém winangun mengiité ni Sia, taan péléng sé tou wia ung kaayahan kenu zéi'kan mata'u ni Sia.

¹¹ Ni Sia niméyé wia sé tou sé anu-Na, taan sé anu-Na itii é soo sumungkul ni Sia.

¹² Taan péléng sé tou simungkul ni Sia wo ma'éman ni Sia ém winéhan-Na kawasa i maéndo oki' ni Opo Empung.

¹³ Ni séra nimaéndo oki' ni Opo Empung én zéi'kan uman pahpaan um paaz né tu'a, zéi'kan pahpaan um paaz un awak wo kasii zéi'kan pahpaan um paaz ni tuama, taan pahpaan um paaz ni Opo Empung.

¹⁴ U Nuwu' ni Opo Empung itii é nimaéndomo tou wo menou-nou im wia ni kita wo ni kita é nimileko ung kawangko'an-Na. Ung kawangko'an-Na itii éng kinailekan-Na pahpaan ni Sia én Oki' esa uman ni Opo Empung. Wo ni Sia én tumuzu'mé i si Opo Empung én ulit wo ni Sia mahtambéré ung kamang wia ni kita.

¹⁵ Si Yohanes Menanarani éng kimua a niilekna tumoro ni Sia karia i mahkérét, “Kelamo Sia si paza'ingkula i ni aku mahkua wia ni kamu: Wéwéhan si méyé tumondongé ni aku. Ni Siapé' si pahpuu-puuna taan ni aku pahpaan ni Sia ém wiamo puunala ni aku i nimatou.”

¹⁶ Pahpaan u raraatéan-Na én zéi'kan ikana', wo im witu u raraatéan-Na ni kita mahkaileké ung kamang un zéi'kan ipahkana-kana'la im pahtambéré.

¹⁷ Pahpaan un ukum Torat é méiwéhé mengiité si Musa, taan ung kamang tatambér wo ung kaulitan é méyé mengiité si Yesus Kristus.

¹⁸ Zéi'kan siapa si tou nimahile-ilekola si Opo Empung, akaz uman si Oki'-Na si esa uman si nimileko si Opo Empung. Si Oki'-Na sekezé é mengari-ngaria si Ama' wo ni Siamo si mahtuzu'mé wia ni kita séi si Opo Empung.

Si Yohanes Menanarani nimapata'u tumoro un touna in esa

¹⁹ Téntii u méiwingkot ni Yohanes Menanarani im wia sé woopira walian wo sé suzu ni Lewi, sé méiatumé né tonaas né tou Yahudi sé witi Yerusalem, i meligau, “Séi ndéén ko wé?”

²⁰ Si Yohanes Menanarani é nimakaulit wo zéi'kan mahtowo, kuana, “Ni Aku én zéi'kan Mesias.”

²¹ A séra meligau wia ni sia, “Sa téntu, séi ko? Ni ko si Nabi Elia?” Wingkotenala, “Zéi'kan!” A séra meligau kasii, “Apa ni ko si Nabi si méyé itii?” Am wingkotenala, “Zéi'kan!”

²² A séra mahkua wia ni sia, “Sa téntu, ikuamé wia ni kai séi ko? Pahpaan ni kai é léwo'zéi' im wéwéhan u maiwingkot wia sé nimatumé ni kai. Apa un ikuamu tumoro un toumu in esa?”

²³ Am wingkotenala, “Ni akumo si pahkuala ni Nabi Yesaya, ‘Wéwéhan si tou mengéré-ngérét witi kapelasan: Terénela u lalan lampangan ni Mahpiara!’ ”

²⁴ Im wia sé méiatumé itii ém wéwéhan sé woopira im wia sé sana réwok tou Farisi.

²⁵ Ni séra é meligau wia ni sia, “Sa téntu, kaa ko mahsarani sé tou, sa ko zéi'kan Mesias, zéi'kan Nabi Elia wo zéi'kan nabi si méyé?”

²⁶ A si Yohanes mingkotla wia ni séra, “Ni aku é mahsarani karia un zano, taan witu un unez niou é makarendai ni Sia si zéi'kan kata'uan niou,

²⁷ ni Sia si niméyé timondongé ni aku. Maan i mowar uman un tali sapatu-Na ni aku én zéi'kan wangun.”

²⁸ Niitu é nimamuali witi wanua Betania, witi sendangané u so'so'an Yordan, un tampa ni Yohanes Menanarani i mahsarani.

Si Yesus én Anak ni Domba ni Opo Empung

²⁹ Masandonamé, si Yohanes nimilek si Yesus méyé wia ni sia. A si Yohanes kumuala, “Ilekena si Anak ni Domba ni Opo Empung, si zuméi' a singkéla' né tou wia ung kaayahan.

³⁰ Ni Sia si paza'ingkula i ni aku mahkua, ‘Wéwéhan si méyé tumondongé ni aku, ni Siapé' si pahpuu-puuna taan ni aku. Pahpaan ni Sia ém wiamo puunala ni aku i nimatou.’

³¹ Im puuna, ni aku in esa én zéi'kan mata'u ni Sia, taan ni aku niméyé i mahsarani karia un zano, wo sé tou Israel mata'u séi Sia.”

³² Tumondong niitu si Yohanes Menanarani mahkua tumoro a niilek wo an tinalingana, kuana, “Ni aku é nimileko si Roh ni Opo Empung timumpamé im witi langit tanu si bombo menéwé-néwél nimento' witu um wawo-Na.

³³ Wo ni aku in esa im puuna én zéi'kan mata'u ni Sia, taan si Opo Empung si nimatumé ni aku i mahsarani karia un zano éng kimuamo wia ni aku, ‘Sa ko milek si Roh itii timumpama wia si tou wo mento'la wia ni Sia, ni Siamo si mésumarani karia si Roh Lenas.’

³⁴ Ni aku é nimileko ni Sia wo kumuama u niilekku, ‘Ni Siamo si Oki' ni Opo Empung.’ ”

Sé pahtuzu'en ni Yesus kataré-taré

³⁵ Masandonamé si Yohanes Menanarani é rimendai kasii witi tampa itii karia né zua pahtuzu'enna.

³⁶ I ni sia mileka si Yesus lumangkoi, ang kuana, “Ilekena si Anak ni Domba ni Opo Empung!”

³⁷ Sé zua pahtuzu'enna én timalingama u méikuanama itii, a séra mangé ang kumiit si Yesus.

³⁸ Taan si Yesus é liméngéma muri. I nimilek-Nama ni séra é mahkiité ni Sia, ang kuan-Na wia ni séra, “Apa um penéron niou?” Ang kuan néra wia ni Sia, “Méster, wisa um pahento'an-Nu?”

³⁹ A Sia kumuala wia ni séra, “Méyémo wo méileken niou.” A séra mamilek um pahento'an-Na, wo in endo itii ni séra é nimento' mahwali-wali karia-Na, in toro niitu ém woo jam kaepat im wengindo.

⁴⁰ Si esaané im wia sé zua kimiité si Yesus pahpaan timalinga a méikua ni Yohanes Menanarani é makangaran Andreas, katuari ni Simon Petrus.

⁴¹ Si Andreas ing kataré-taré é nimahilekan karia ni Simon si katuarina ang kumua wia ni sia, “Si Mesias éng kinailekan naimo (Mesias ung kalakoana éng Kristus).”

⁴² Si Simon é méipahwalima ni Andreas wia si Yesus. I si Yesus nimileka wia si Simon a Sia kumua, “Ni ko é Simon, oki' ni Yohanes. Ni ko é mangaranan Kefas (Kefas é masuat wo Petrus).”

Si Yesus timawah si Filipus wo si Natanael

⁴³ Masandonamé si Yesus timotozla i mangé witi Galilea. Im wana ni Sia é nimahilekan karia ni Filipus, a si Yesus kumuala wia ni sia, “Méyémo, kumiitomé ni Aku!”

⁴⁴ Si Filipus én tou Betsaida, téntu kangkasii si Andreas wo si Petrus én tou wana.

⁴⁵ Si Filipus mangé mahilekan karia ni Natanael ang kumua wia ni sia, “Ni kai é nimahilekano karia ni Tou si mémoipahkuamé ni Musa witu ung kitap Torat wo si mémoipahkuamé né nabi. Ni Sia é si Yesus, oki' ni Yusuf tou Nazaret.”

⁴⁶ Si Natanael kimuala wia si Filipus, “Amo kahuman im wéwéhan um wangun witi Nazaret a méyé?” A si Filipus kumuala wia ni sia, “Méyémo wo méileken!”

⁴⁷ Ilekena ni Yesus si Natanael mahéyé ang kumua tumoro ni sia, “Ilekena, kela siamo si uli-ulit tou Israel. Wia ni sia én zéi'kan siapa towo.”

⁴⁸ Ang kuan ni Natanael wia ni Sia, “Kaa rékén ni aku kata'uannu?” Am wingkotela ni Yesus, “Puunala si Filipus timawahmé ni ko, ni ko é niilek-Kumomé i simuut witu ung kai ara.”

⁴⁹ Ang kuan ni Natanael wia si Yesus, “Méster, si Méster én Oki' ni Opo Empung. Si Méster éng Kolano né tou Israel.”

⁵⁰ A si Yesus kumuama, “Apa pahpaan ni Aku ing kimuala, ‘Ni Aku nimilek ni ko simuut witu ung kai ara’, ang ko ma'éman? Ni ko é mamilek a mamuali a lumouspé'mé niitu.”

⁵¹ Ang kuan ni Yesus kasii wia ni sia, “Uli-ulit ikua-Kuma wia ni kamu, ni kamu é mamilek u langit nimawuka wo sé malaekat ni Opo Empung mahsakéma wo mahtumpamé witu u sinaru ni Oki' ni Tou.”