Yakobus 5 - Taaz Weru Witu u Nunuwu'en Tombulu

A sésésa wia sé tou wa'ilan

¹ Niitumo, ni kamu sé tou wa'ilan, mamé'mola wo mamé'la karia i mahkérét pahpaan ni kamu é mamendan an zézéha!

² Ung kawa'ilanan niou ém wuulo wo ang karai niou éng kinetketola né mengetket.

³ A mas wo am péra' niou én tina'ingkéré'ano. An ta'ingkéré'na itii a mapailek ang kasumalaan niou wo luméwo' un tou niou tanu un api. Ni kamu é mahréwok uman a sangkum wia ung kaayahan wana an endo merétémoma ung kaakazan ung kaayahan.

⁴ Sé tou nimaayang un umamu én zéi'kan pahwaérannu. In tarékan én talingana am pa'os néra. Sé tou nimupu' witu un umamu é mahkérét mekisawang, wo an ipahkérét néra én tinalingamoma ni Mahpiara, si Opo Empung mahkawasa.

⁵ Ni kamu im wia ung kaayahan kenu é menou-nou wana ang kawa'ilanan wo mahkiit uman am paaz niou. Ni kamu é nimahwuwutulola ang kapaaz an até niou, tanu si tatamun i mapahrerembuz un touna i makerizen witu un endo ing kumeriz.

⁶ Ni kamu é nimukummola wo nimunu'mola sé tou ulit wo séra zéi'kan mahsaru ni kamu.

Meze-ezen im wana an zézéha

⁷ Pahpaano niitu, katuari-katuari, meze-ezenla makaz si Mahpiara i mawurimé sumaup. Si mahuma én ezen i ma'ento' am wua'na am wéwéhan torona im witu un umana. Ni sia kasii én ezen i ma'ento' un uzan in tumumpamé oras in tumanem wo un uzan in tumumpamé in oras i mahwua'.

⁸ Ni kamu kasii é léwo'zéi' i mezenla wo menté'la un até, pahpaan si Mahpiara i mawurimé sumaup én zéi'mo uré.

⁹ Katuari-katuari, ni kamu én tia' mema'o-ma'os wo mahpasasala' si esa wo si esa, wo kamu zéi'kan ukumen. Si mahtotoz am winangun né tou in ulit kaapa zéi'kan é rimendaio witu um pepenet.

¹⁰ Katuari-katuari, kéréala an zézéha wo ang kaezenan né nabi sé nimuwu'mola witu ngaran ni Mahpiara.

¹¹ Ni séra ém pahkuan i mahpaa-paazo, pahpaan ni séra én totoz ezen i mahsaru an zézéha. Ni kamu én timalingamo ung kaezenan ni Ayub wo kata'uan niouo ing kamurian kura si Mahpiara ing kimamang ni sia. Pahpaan si Mahpiara én totoz rumaraaté wo meripu' umané i rumaraaté.

Kura i mengaléi

¹² Katuari-katuari, un totoz wéhan nioula genang én tia' kamu mahtiwa' karia u ngaran kasendukan kaapa ung kaayahan kaapa am walina. Sa éné éng kumuala éné, sa zéi'kan éng kumuala zéi'kan, wo kamu zéi'kan ukumen.

¹³ Sa wéwéhan im wia ni kamu si zézéha, tawimo sia i mengaléila! Sa wéwéhan si mahpaa-paaz tawimo sia ing kumantarla i lumooz si Opo Empung.

¹⁴ Sa wéwéhan im wia ni kamu si saki, tawimo sia in tumawahla sé penatua né jamaat, wo sia ipengaléi néramé karia in isu'en néramé u lana witu u ngaran ni Mahpiara.

¹⁵ Sa séra mengaléi karia um pa'émanen, si tou saki itii é malé'os. Si Mahpiara é mangun si tou itii in uli-ulit malé'os, wo sa sia nimangunla a singkéla', ni sia én ampungan.

¹⁶ Pahpaano niitu, si esa wo si esa é léwo'zéi' i makaulitla a singkéla'na wo pahpengaléila si esa im wia sé walina, wo kamu malé'os. Um pengaléien né tou ulit én totoz wangko' ung kawasana wo wéwéhan wua'na.

¹⁷ Si Elia én tou uman masuat wo ni kita. Ni sia én uli-ulit nimengaléila wo zéi'kan muzan. Téntutuu, teluna ta'un enemna loloho'en zéi'kan nimahuza-uzané.

¹⁸ A sia mengaléi sumaup, mahaléi uzan. An tumumpamé un uzan im witi langit makaz an tinanem é nimua'mé.

¹⁹ Katuari-katuariku, sa wéwéhan im wia ni kamu si zéi'mo mahkiit ung kaulitan, am wéwéhan si tou walina nimangunla ni sia i nimawurila sumaup witu ung kaulitan,

²⁰ kata'uan nioula, séi si nimangunla si tou mahsingkéla' timula'umé u lalan simala' a mawurila sumaup witu u lalan kaulitan, si tou itii é nimilotola si roh ni tou itii im witu um patéan wo nimangun lakez a singkéla'na niampungan.