Yakobus 3 - Taaz Weru Witu u Nunuwu'en Tombulu

Pahimekela u lila'

¹ Katuari-katuariku, im wia ni kamu én tia' wo lakez sé paaz maéndo méster, pahpaan kata'uan niou sa un ukuman wia ni kita i méster é lumousé un ukuman wia sé tou walina.

² Pahpaan ni kita péléng é lakez a sinala'. Séi si zéi'kan siapa sinala' im wana a nuwu'na, ni sia én tou wutulo, wo ni sia kangkasii é mata'u mahime-imek un touna.

³ Tanu si kawalo, u sumahna winéhan an tali wo sia mahkiit um paazta. Karia in téntu si kawalo itii én toro kumiit um paazta.

⁴ Wo kasii a londéi tua'na, zozo' niitu in totoz tua'na wo ipahwali-wali u reges repet, taan toro ipahsaru-saruma wisa uman karia ung kamudi ung kori' uman, kiit um paaz ni mengangali u londéi tua'na itii.

⁵ Téntu kangkasii u lila', zozo' niitu kori' uman im witu un touta, taan un toro lumooz un touta tumoro am wangko'. Téntu kasii un api, zozo' niitu kori' uman, taan toro luma'ung un talun tua'na.

⁶ U lila' kangkasii én tanu un api. Im witu un touta, péléng a léwo' ém witu u lila' a lumangkowa wana péléng un awakta. Niitu u mangun ni kita i mahmuali a léwo'. Pahpaan un api itii ém witi naraka a méyé u méluma'ung ung katou-touanta.

⁷ Péléng sé liontana', sé mahtéwé-téwél, sé mahlangko-langkou, wo sé seza' én toro papanaram wo ninaramola né tou.

⁸ Taan u lila' ni tou én zéi'kan siapa si makawawa i mapanaram niitu. U lila' itii é léwo' wo zéi'kan kapalouan, wuta a melanguh an toro munu' tou.

⁹ Karia u lila' kita mahlooz si Opo Empung Ama'ta wo karia u lila' itii kangkasii, kita mahwéhé un epa' wia si kasuat tou si winangun ni Opo Empung mahsua-suatan wo ni Sia.

¹⁰ Im witu u sumah esa é mahondolé a lolooz wo an epa'. Katuari-katuariku, ang kenu én zéi'kan toro mamuali wia ni kita.

¹¹ Wéwéhan wé ung kembu'an esa pahkembu'ané un zano tewang wo un zano pa'it?

¹² Katuari-katuariku, toro wé ung kai ara mua'mé zaitun wo un anggor mua'mé ara? Téntu kangkasii, zéi'kan mamuali ung kembu'an pahkembu'ané un zano mahnanam asin wo pahkembu'an kangkasiimé un zano tewang.

Ung katulapan um wia si Opo Empung a méyé

¹³ Sa wéwéhan si tou tulap wo lakez ang kata'uan im wia ni kamu, ni sia é léwo'zéi' i mapailekla ang katou-touan wangun wo am pahlé'osen wangun karia i roros até wo ung katulapan.

¹⁴ Taan sa kamu téutéu wo akaz uman mahgenang un tou niou in esa, tia' kamu mahwera-wera' un tou niou, wo tia' mahtowo i mahsaru ang kaulitan.

¹⁵ Ung katulapan tanu niitu én zéi'kan witi kasendukan a méyé taan wia ung kaayahan a méyé, witu u lelo ni tou wo wia sé sétang a méyé.

¹⁶ Pahpaan wisa um wéwéhan un téutéu wo mahgenang uman un touna in esa, im witu kangkasii ém wéwéhan ung kayo' wo péléng a léwo' pahmualin.

¹⁷ Taan ang katulapan am wia si Opo Empung a méyé, ung kataré-taré un até ém weresi, tumondongla niitu ém paaz i mahlé'o-lé'osan, roros até wo mahkii-kiit uman, mawuta-wuta raraaté wo mahwua'mé am wangun, zéi'kan mahsanaweka wo zéi'kan mahgau-gau lé'os.

¹⁸ Ung kaulitan ém wua'na u mahlé'o-lé'osan u méikeroz né tou paaz u mahlé'o-lé'osan.