Wahyu 8 - Taaz Weru Witu u Nunuwu'en Tombulu

Si Anak ni Domba nimuka u segel kapitu

¹ I si Anak ni Domba nimukama u segel kapitu, toro niitukan, um witi kasendukan é nimapenesa woo teluna pulu' menit.

² An ilekengkuma sé pitu malaekat rimendai witu u sinaru ni Opo Empung. Ni séra ém winéhan tata'saan um pontuang.

³ Méyé si malaekat walina, a sia rumendaila witu rété um pahtunuan a raragés, mahali-ali um pahtunuan ung kamania u mas am wangunen. Wia ni sia ém winéhan ang kamania lakez in iragés karia péléng am pengaléien né tou ni Opo Empung, witu um wawo um pahtunuan a raragés u mas am wangunen, witu sinaru u rurumezan ni Kolano itii.

⁴ An teremuz ang kamania wo am pengaléien né tou ni Opo Empung itii ém witu u lengen ni malaekat a lumintooza mangé witu u sinaru ni Opo Empung.

⁵ Tumondong niitu si malaekat itii méndomé um pahtunuan ang kamania, tutungannala karia un api niéndonamé witu um pahtunuan a raragés, a niitu ilombo'namé wia ung kaayahan. A zumanimé un erut nimahwalimé karia un tila'pong wo un éhzo'.

Sé malaekat simengo am pontuang

⁶ Tumondong niitu, sé pitu malaekat sé timion tata'saan pontuang én timaano i sumengo am pontuang néra.

⁷ A si malaekat kataré sumengoma um pontuangna, an tumumpamé un uzan éis wo un api sinembor un zaha'. Péléng niitu é méilombo'mé wia ung kaayahan. A mala'unga u sana pahtelu ung kaayahan, u sana pahtelu ang kai wo kasii péléng an zukut mata'pé'.

⁸ Si malaekat kazua sumengoma um pontuangna, am wéwéhan un tanu ang kentur tua'na melaya-layas méilombo'ma witi tasik. U sana pahtelu un tasik é nimaéndomoma zaha',

⁹ wo sé sana pahtelu im wia péléng sé menou-nou witu un tasik é nimaté. Téntu kangkasii u sana pahtelu im wana péléng a londéi tua'na wana an tasik é nimakemu.

¹⁰ Si malaekat katelu sumengoma um pontuangna, a si tototi'en tua'na maragosé im witi langit. Si tototi'en itii é melaya-layas tanu u layasna un obor, nimaragosé witu u sana pahtelu a so'so'an wo wana ang kembu'an.

¹¹ U ngaran ni tototi'en itii é Apsintus. U sana pahtelu un zano kinaragosané ni tototi'en itii é nimapa'it. Lakez sé tou nimaté pahpaan i nimelep un zano nimapa'ito itii.

¹² Si malaekat kaepat sumengoma um pontuangna, an toroana u sana pahtelu ni endo, u sana pahtelu ni loloho'en, wo u sana pahtelu né tototi'en taka-takazan u sana pahtelu un endo én zéi'mo tahlous ayah, téntu kangkasii u sana pahtelu um wengi én totoz nimarimbengbenga.

¹³ An ilekengkuma ém wéwéhan si kiokiok menéwé-néwél rakék witi langit, talingangkumé sia i mahkérété, “Ikaléwo', ikaléwo', ikaléwo'mo sé tou wia ung kaayahan! Pahpaan telupé' sé malaekat sumengo am pontuang néra.”