Wahyu 7 - Taaz Weru Witu u Nunuwu'en Tombulu

Sé tou ni Opo Empung winéhan un tanda

¹ Kumawusa niitu, ilekengkuma sé malaekat epat rimendai witu un epat zuhuna ung kaayahan. Ni séra é nimapé' witu u reges sendangan, u reges timuh, u reges talikuzan wo u reges amian, wo a reges itii zéi'kan mahtoromé ung katanaan kaapa un tasik kaapa ang kai.

² An ilekengkuma si esa malaekat walina nimondolé witi pahondolané ni endo. Si malaekat itii é mahali-ali un ipahtanda anu ni Opo Empung si menou-nou. A si malaekat itii kuméréta wia sé malaekat epat sé winéhano ung kawasa i luméwo' un tana' wo un tasik,

³ kuana, “Tia'pé' pahléléwo'en niou un tana' kaapa un tasik kaapa ang kai, sa zéi'kampé' tinandaan naima an tungtung né ata ni Opo Empungta.”

⁴ An talingangkumé ung kalakez né tou tinandaan wana an tungtung néra é sana atus epatna pulu' wo epatna riwu tou, sé péléng uman wia sé suzu ni Israel a méyé.

⁵ Wia sé suzu ni Yehuda é mapulu' wo zuana riwu tou sé winéhan tanda, wia sé suzu ni Ruben é mapulu' wo zuana riwu tou, wia sé suzu ni Gad é mapulu' wo zuana riwu tou,

⁶ wia sé suzu ni Asyer é mapulu' wo zuana riwu tou, wia sé suzu ni Naftali é mapulu' wo zuana riwu tou, wia sé suzu ni Manasye é mapulu' wo zuana riwu tou,

⁷ wia sé suzu ni Simeon é mapulu' wo zuana riwu tou, wia sé suzu ni Lewi é mapulu' wo zuana riwu tou, wia sé suzu ni Isakhar é mapulu' wo zuana riwu tou,

⁸ wia sé suzu ni Zebulon é mapulu' wo zuana riwu tou, wia sé suzu ni Yusuf é mapulu' wo zuana riwu tou, wia sé suzu ni Benyamin é mapulu' wo zuana riwu tou.

Sé tou totoz lakez zéi'mo karékénan

⁹ Kumawusa niitu, ilekengkuma sé sana réwok tou totoz lakez sé zéi'mo karékénan. Ni séra ém wia péléng sé tahsasana wanua, tahsasana suzu, tahsasana réwok mahtuari, wo sé tahsasana nunuwu'en. Ni séra péléng é rimendai witu sinaru u rurumezan ni Kolano wo witu sinaru ni Anak ni Domba, kimarai ang karai tonton kulo', timion am pala'pa'na am palem.

¹⁰ Karia i rimez ni séra mahkua in téntii, “Si toro milot ni kita im witu un ukuman wana a singkéla' én akaz uman si Opo Empungta si rimumez witu u rurumezan-Na ing Kolano wo si Anak ni Domba.”

¹¹ In toro niitu, péléng sé malaekat é rimendai limiklik u rurumezan ni Kolano, sé pahtutu'an wo sé epat tumou-tou. Ni séra péléng éng kimuruz karia i nimongkot witu u sinaru u rurumezan ni Kolano itii a mahsigi' si Opo Empung,

¹² karia i mahkua, “Amin! A lolooz, ang kawangko'an, ang katulapan, a makasé, a sisigi'an, ang kawasa wo ang kaenté'an ém wia uman si Opo Empungta makaz ing kauré-uré! Amin!”

¹³ Si esaané im wia sé pahtutu'an itii é meligau wia ni aku, “Séi séra sé tou kimarai ang karai tonton kulo' itii? Wisa séra a méyé?”

¹⁴ Am wingkotengkula, “Zéi'kan ndo'tuu kata'uangku tuang, ni ko in esa si mata'u ni séra.” Ang kuana wia ni aku, “Ni séramo sé limangkoiomé wana an zézéha zéi'mo kakuaan. Wo karia un zaha' ni Anak ni Domba, ni séra kimemesoma ung karai tonton néra makaz nimakulo'.

¹⁵ Niitumo, ni séra é rimendai makasaru u rurumezan ni Opo Empung ing Kolano wo mahpaayang wia ni Sia endo wo wengi witi Walé-Na. Ni Sia si rimumez witu u rurumezan-Na ing Kolano én tuméiz ni séra.

¹⁶ Ni séra én zéi'mo mahpendan un ahrem wo maré'o, si endo kaapa um pasu'na ni endo én zéi'mo mahzéha ni séra.

¹⁷ Pahpaan si Anak ni Domba si rimumez witu un unez u rurumezan ni Kolano itii é mamiara ni séra wo mahwali ni séra i mamelep witi kembu'an u mahwéhémé ung katou-touan. Wo si Opo Empung é misu' péléng a lué' néra.”