Wahyu 5 - Taaz Weru Witu u Nunuwu'en Tombulu

Ung kitap ginulung wo si Anak ni Domba

¹ An ilekengkuma ni Sia si rimumez witu u rurumezan ni Kolano itii. Witu u lengen-Na kakan ém wéwéhan ung kitap ginulung. Ung kitap itii ém pinantikan zua masaru, winéhan um pitu segel.

² An ilekengku kasiima si malaekat ketezen. Ni sia é meligau karia i mahkérét, “Séi si wangun i muka am pitu segel wo muka ung kitap ginulung itii?”

³ Taan zéi'kan siapa si toro muka ung kitap ginulung itii, kaapa milek a méipantik witu, zozo' ni séra ém witi kasendukan, wia ung kaayahan kaapa witi lalem un tana' a méyé.

⁴ Un atéku én totoz rumara a ni aku mamé', pahpaan zéi'kan siapa zozo' in esa si wangun i muka ung kitap ginulung itii kaapa milek a méipantik witu.

⁵ A si esaané im wia sé zuana pulu' wo epat pahtutu'an itii kumuamé wia ni aku, in téntii, “Ni ko én tia'mo mahamé'. Wéhanla genang lumé'o-lé'os, si pahkuan i Singa wia sé suzu ni Yehuda, si suzu ni Daud éng kimalamoma sé kakoro'-Na. Niitumo ni Sia toro muka am pitu segel wo ung kitap ginulung itii.”

⁶ An ilekengkuma si Anak ni Domba si tanu ing kinerizo, rimendai witu un unez u rurumezan ni Kolano wo né epat tumou-tou, wo sé zuana pulu' wo epat pahtutu'an limiklik ni Sia. Ni Sia ém wéwéhan am pitu sungé wo am pitu weren: niitu é sé pitu Roh ni Opo Empung, sé méiatu-Na i méyé wia péléng ung kaayahan.

⁷ A si Anak ni Domba itii maméndomé ung kitap ginulung itii, im witu u lengen kakan ni Kolano si rimumez witu u rurumezan-Na.

⁸ I ni Sia niméndomé ung kitap ginulung itii, sé epat tumou-tou karia né zuana pulu' wo epat pahtutu'an é rengan ing kimuruzla karia i nimongkot witu u sinaru ni Anak ni Domba itii. Ni séra péléng én timion tata'saan ung kecapi wo un eelepan u mas am wangunen a mawuta-wuta ang kamania. Ang kamania itii ém pengaléien né tou ni Opo Empung.

⁹ A sé epat tumou-tou wo sé zuana pulu' wo epat pahtutu'an kumantaré ung kakantaren weru. Kuan néra, “Ni Ko si wangun i makailek ung kitap ginulung itii, wo muka a segelna; pahpaan ni Ko si Anak ni Domba éng kinerizo, wo karia un zaha'-Mu sé tou wia ung kaayahan ém winaér-Mumo im wia sé tahsasana suzu, sé tahsasana nunuwu'en, sé tahsasana réwok mahtuari wo wia sé tahsasana wanua i maéndo anu ni Opo Empung.

¹⁰ Ni Ko nimanguno ni séra nimaéndo esa kakolanoan, wo kasii nimaéndo walian wia si Opo Empungta, wo ni séra sé mamerénta ing kolano wia ung kaayahan.”

¹¹ An ilekengkuma wo talingangkumé u nuwu' né malaekat totoz lakez sé limiklik u rurumezan ni Kolano itii, karia né epat tumou-tou wo sé pahtutu'an. Ung kalakez né malaekat itii én zéi'kan karékénan.

¹² Ni séra é mahkantar totoz rimez, kuan néra, “Si Anak ni Domba si kinerizo itii, si wangun i makailek ang kawasa, ang kawa'ilanan, ang katulapan, ang kaenté'an, a sisigi'an, ang kawangko'an wo a lolooz!”

¹³ An talingangkumé péléng sé tumou-tou witi kasendukan, wia ung kaayahan, witi lalem un tana', witi tasik wo péléng sé witu é mahkua, “Wia ni Sia si rimumez witu u rurumezan-Na ing Kolano wo wia si Anak ni Domba, u lolooz, u sisigi'an, ung kawangko'an wo ung kawasa makaz ing kauré-uré!”

¹⁴ A sé epat tumou-tou itii kumuama, “Amin!” A sé pahtutu'an itii rengan ing kimuruza karia i nimongkot wo mahsigi'.