Wahyu 22 - Taaz Weru Witu u Nunuwu'en Tombulu

¹ An ipapailek kasiimé ni malaekat itii wia ni aku u so'so'an un zanona é mahwéhé ung katou-touan. Un zanona én totoz léno tanumokan ung kaléno ung kristal. Wo un zano itii é mahso'so' mahondolé witu um wawa' u rurumezan ni Opo Empung ing Kolano wo ni Anak ni Domba.

² Un zanona é mahso'so'ma witu un unez u lalan witu um wanua tua'na itii. Wana an tembir zua masaru u so'so'an itii ém wéwéhan ung kai u mahwéhémé ung katou-touan u mahwua' makapulu' wo zua witu u sana ta'un. Sekez i loloho'en, ung kai itii é makasa mua'mé. An zani'na ung kai itii ém pahpakén in ipahundam péléng sé tahsasana wanua.

³ Im witu um wanua tua'na itii zéi'mo siapa sé matoron un epa'. U rurumezan ni Opo Empung ing Kolano wo u rurumezan ni Anak ni Domba ing Kolano é maizeta' witu un untep um wanua tua'na itii. Wo sé ata-Na é marumagés wia ni Sia.

⁴ Ung gio ni Opo Empung én ileken néra, wo u ngaran ni Opo Empung én ipantik wana an tungtung néra.

⁵ Im witu um wanua tua'na itii én zéi'mo siapa wengi wo péléng am witu én zéi'mo memandung sena' u solo wo u sena' ni endo, pahpaan si Opo Empung si nimaéndo sena' i mahsena'ma wia ni séra. Wo ni séra é merénta ing kolano makaz ing kauré-uré.

Si Yesus i mawurimé sumaup

⁶ Ang kuan ni malaekat itii wia ni aku, “Péléng a méikuakuma kenu én ulit wo toro pa'émanen. Si Opo Empung, si niméhé roh wia sé nabi é nimatumoma si malaekat-Na wia sé ata-Na i mapata'u an zéi'mo uré in totoz mamuali.”

⁷ Ang kuan ni Yesus, “Un ulitna ni Aku zéi'mo uré é méyémo. Mahpaa-paazla sé tou mahkiit a nuwu' ni Opo Empung a méipantik witu ung kitap kenu!”

⁸ Ni aku Yohanes, ni akumo si timalinga wo nimilek niana péléng. I niana péléng pinakatalingakumola wo pinakailekkumola, an aku kumuruzla witu u sinaru un a'é ni malaekat i mongkot wo sumigi' ni sia, si nimapata'umé péléng niana wia ni aku.

⁹ Taan kuana wia ni aku, “Tia'mo mahasar téntu! Ni aku én ata, kasuatmu wo sé katuarimu esa pa'émanen, sé nabi wo péléng sé tou mahkiit péléng a méipantik witu ung kitap kenu. Pahongkotala wo pahsigi'ela si Opo Empung!”

¹⁰ Ang kuana kasii wia ni aku, “Tia'mo pahsesegelennu a nuwu' ni Opo Empung méipantik witu ung kitap kenu, pahpaan un oras niana péléng i mamuali é lelezokan.

¹¹ Niitumo, séi si mahwangun a léwo', iwayamola sia i memangu-mangun a léwo', wo séi si mahwangun ang kaizangnokané, iwayamola sia i memangu-mangun ang kaizangnokané. Wo séi si mahwangun an ulit, iwayamola sia i memangu-mangun an ulit, wo séi si linenaso, iwayamola sia i menou-nou witu ung kalenasan!”

¹² Ang kuan ni Yesus, “Ni Aku én uli-ulit zéi'mo uré é méyémo wo ni Aku i méyé é mahalimé um wawaér in iwaér wia si esa wo si esa, mengiité am pinahlé'osnamé.

¹³ Ni Akumo Si Alfa wo Si Omega, Si Kataré-taré wo Si Kamurian, ni Aku ém wiamo rengané Im Puuna wo makaz Ing Kauré-uré.”

¹⁴ Mahpaa-paazola sé tou mahkemes ang karai tonton néra akaz i maweresi. Pahpaan ni séra én toro kuman am wua'na ang kai u mahwéhémé ung katou-touan wo toro muntep witu um wanua tua'na itii lumangkoia wana am pepenet tua'na.

¹⁵ Taan sé tou tanumokan sé asu wo sé meriara, sé samek, sé mahwunu' tou, sé mahongkot wo mahsigi' sé opo-opo, wo sé totoz paaz an towo wo mahwangun niana, zéi'kan toro muntep witu um wanua tua'na itii.

¹⁶ Kuan ni Yesus, “Ni Aku, Yesus, nimatumoma si malaekat-Ku i makumua a niilek wo tinalingana tumoro niia péléng wia ni kamu, wo ikua nioula wia sé jamaat. Ni Akumo u suzu, si suzu ni Daud, tototi'en kaendoan, si mahserité totoz sena'.”

¹⁷ A si Roh ni Opo Empung wo si wéwéné kawéngen itii kumuamé, “Méyémo!” Wo séi uman si tumalingama niitu, iwayamola sia ing kumuala “Méyémo!” Wo séi si maré'o, iwayamola sia i méyé, wo séi si paaz melep, iwayamola sia i maméndomé un zano mahwéhémé ung katou-touan u méitambér umané.

Ung kamurian

¹⁸ Ni aku Yohanes éng kumuama a niilek wo tinalingaku wia sé tou sé mahtalinga a nuwu' ni Opo Empung a méipantik witu ung kitap kenu, “Sa wéwéhan si tou mawesla apa uman wana a méipantik witu ung kitap kenu, si tou itii én awesan ni Opo Empung a meléwo' a méipantik witu ung kitap kenu.

¹⁹ Wo sa wéwéhan si tou mina'la apa uman wana a nuwu' ni Opo Empung a méipantik witu ung kitap kenu, si tou itii én éndoan ni Opo Empung um wéténgna im wana am wua'na ung kai u mahwéhémé ung katou-touan wo um wéténgna im witu um wanua tua'na lenas, tanu u méipantik witu ung kitap kenu.”

²⁰ Ni Sia si kimua a niilek wo tinalinga-Na tumoro niana péléng éng kimuamé, “Éné, ni Aku zéi'mo uré é méyémo!” Niitumo ni aku, Yohanes éng kumuama, “Amin. Méyémo, o Yesus Mahpiara!”

²¹ Ung kamang tatambér ni Yesus Mahpiara é menaté-natér ni kamu péléng! Amin.