Wahyu 21 - Taaz Weru Witu u Nunuwu'en Tombulu

U langit wo un tana' weru

¹ An ilekengkuma u langit weru wo un tana' weru, pahpaan u langit kataré wo un tana' kataré é nimazéi'moma, maan kangkasii un tasik é nimazéi'moma.

² Ni Aku kangkasii nimileka um wanua tua'na lenas, u Yerusalem weru, um wia si Opo Empung witi kasendukan an itumpamé. Um wanua tua'na itii é niimek tanumokan si wéwéné kawéngen, niimek i mahilekan karia ni tuama kumawéng ni sia.

³ An talingangkumé u nuwu' totoz rimez kimérété im witi rurumezan ni Kolano kimuamé, “Ilekena, um pahwéha-wéhan ni Opo Empung ém witumo un unez né tou wo ni Sia é mamento' mahwali-wali karia néra. Ni séra é maéndo tou-Na, wo ni Sia é menaté-natér ni séra wo maéndo Opo Empung néra.

⁴ Péléng a lué' néra é maisu'en-Na im wana am weren néra. Zéi'mo siapa si maté, zéi'mo siapa si mahpengasi', kaapa mahamé' karia i mahkérét, kaapa mendan u rumara un até. Pahpaan péléng an urémo itii é limangkoioma.”

⁵ Ni Sia si rimumez witu u rurumezan-Na ing Kolano éng kimuamé, “Ilekena, péléng am péléng ém pahwerung-Kumo!” Ang kuan-Na wia ni aku, “Ipantikla, pahpaan péléng a méikuama kenu én toro pa'émanen wo ulit.”

⁶ Kuan-Na kasii wia ni aku, “Niana péléng é nimamualimoma. Ni Akumo Si Alfa wo Si Omega, Si Kataré-taré wo Si Kamurian. Séi si maré'o, ni sia én tambérang-Ku un zano elepen, u mahondolé witu ung kembu'an u mahwéhémé ung katou-touan.

⁷ Séi si nimuntung, niitu péléng éng kailekanna. Ni Aku é maéndo Opo Empungna, wo ni sia é maéndo oki'-Ku.

⁸ Taan sé tou talo, sé zéi'kan ma'éman, sé mahwangun a makati'tiren, sé memumunu' tou, sé tou samek, sé meriara, sé mahongkot wo mahsigi' wia sé opo-opo wo péléng sé tantowo, ni séra péléng én ukumen iwerit witu un tasik api wo walélang melaya-layas. Ung kenumo um patéan kazua.”

U Yerusalem weru

⁹ Tumondong niitu, méyé si esa im wia sé pitu malaekat sé timion am pitu eelepan mawuta-wuta am pitu meléwo' kamurian. A si malaekat itii kumuamé wia ni aku, “Méyémo wia'i, ipapailekku wia ni ko si wéwéné kawéngen ni Anak ni Domba.”

¹⁰ A ni aku kawasanla ni Roh ni Opo Empung, an iwalima ni malaekat itii witi wawona ung kentur tua'na wo rakék. Im witu an ipapaileknamé wia ni aku um wanua tua'na lenas, u Yerusalem, um wia si Opo Empung witi kasendukan an itumpamé.

¹¹ Um wanua tua'na itii é mahsena'mé u sena' ni Opo Empung. U sena'na um wanua tua'na itii én tanumokan u sena'na um watu totoz wangun wo mahal, tanumokan um watu yaspis wo ung kalénona én tanumokan ung kaléno ung kristal.

¹² U ri'riz makaliklik um wanua tua'na itii én tua'na wo rakék. Am pepenetna é mapulu' wo zua, wo im wana am wawo am pepenetna én tata'saan malaekat mahtéiz. Wo wana am wawo am pepenetna ém pinantikan a ngaran né mapulu' wo zua suzu ni Israel.

¹³ Im witu u sendangan, amian, timuh wo talikuzan én tahtetelu am pepenet tua'na.

¹⁴ U ri'riz méiliklik um wanua tua'na itii é méirendai witu u mapulu' wo zua watu to'tolan. Wo wana am wawo am watu to'tolan itii ém pinantikan a ngaran ni esa wo ni esa né mapulu' wo zua aatu ni Anak ni Domba itii.

¹⁵ Si malaekat nimahnuwu'mé wia ni aku, ni sia ém wéwéhan un teken ipahukur u mas am wangunen. Un ipahukur itii ém pahukur um wanua tua'na itii karia am pepenet tua'na wo u ri'riz makaliklik um wanua tua'na itii.

¹⁶ Um wanua tua'na itii én epat zuhuna, masuat ung kalambo' wo ung kalempazna. Um wanua tua'na itii é niukura ni malaekat itii karia un ipahukur. Ung kalambo'na é mapulu' wo zuana riwu stadia, um woo zuana riwu wo epatna atus kilometer, téntu kangkasii ung kalempaz wo ung karakékna.

¹⁷ Kumawusa niitu, an ukurena kasiima u ri'riz makaliklikna. U ri'riz itii é sana atus epatna pulu' wo epat hasta, um woo enemna pulu' meter, mengiit un ipahukur né malaekat, u masuat karia um ipahukur né tou.

¹⁸ U ri'riz itii ém watu totoz wangun wo mahal yaspis am wangunen wo um wanua tua'na itii é mas nahas am wangunen, wo léno tanumokan kaléno ung kaca.

¹⁹ An to'tolan u ri'riz makaliklik um wanua tua'na itii ém pinerong karia péléng am watu totoz wangun wo mahal. Un to'tolan kataré ém pinerong um watu yaspis, un to'tolan kazua éng karia um watu nilam, un to'tolan katelu éng karia um watu mirah, un to'tolan kaepat éng karia um watu zamrud,

²⁰ un to'tolan kalima éng karia um watu unam, un to'tolan kaenem éng karia um watu sardis, un to'tolan kapitu éng karia um watu ratna cempaka, un to'tolan kawalu éng karia um watu beril, un to'tolan kasiou éng karia um watu krisolit, un to'tolan kamapulu' éng karia um watu krisopras, un to'tolan kamapulu' wo esa éng karia um watu lazuardi, wo un to'tolan kamapulu' wo zua éng karia um watu kecubung.

²¹ U mapulu' wo zua pepenet tua'na itii é mapulu' wo zua mutiara am wangunen, un esa wo un esa é mutiara esa am wangunen wo a lalan witu um wanua tua'na itii é mas nahas am wangunen, léno tanumokan kaléno ung kaca.

²² Ni aku én zéi'kan nimileké um Walé ni Opo Empung witu um wanua tua'na itii. Pahpaan um Walé ni Opo Empung itiimo si Opo Empung, Si Totoz Mahkawasa, wo téntu kasii si Anak ni Domba itii.

²³ Um wanua tua'na itii én zéi'kan memandung u sena' ni endo wo u sena' ni loloho'en i sumena' witu, pahpaan u sena' ni Opo Empung é mahsena'ma witu um wanua tua'na itii wo u solo um wanua tua'na itii é si Anak ni Domba.

²⁴ Péléng sé tahsasana wanua wia ung kaayahan é lumampang witu u sena' itii wo sé kolano wia ung kaayahan é mahali kasiimé ang kawa'ilanan néra witu um wanua tua'na itii.

²⁵ Am pepenet tua'na um wanua tua'na itii én zéi'kan pahpeneten kauré un endo, pahpaan im wana én zéi'mo siapa wengi.

²⁶ Wo ang kawa'ilanan wo a sisigi'an né tahsasana wanua ém pahalin néra witu um wanua tua'na itii.

²⁷ Sé tou mahwangun a makati'tiren, kaapa sé mahwangun a makazi'zisen kaapa mahtowo én zéi'kan toro muntep witu um wanua tua'na itii. Taan sé toro muntep witu én akaz uman sé tou a ngaran néra é méipantik witu ung Kitap Katou-touan un anu ni Anak ni Domba itii.