Wahyu 19 - Taaz Weru Witu u Nunuwu'en Tombulu

Sé witi kasendukan mahlooz si Opo Empung

¹ Kumawusa niitu, an talingangkumé u nuwu' totoz rimez tanu u nuwu' né tou totoz lakez witi kasendukan, mahkuamé, “Haleluya! Si Opo Empungta uman si milot sé tou im witu un ukuman wana a singkéla', si pahsigi'en wo pahloozen, wo si mahkawasa.

² Pahpaan ni Sia i mahtotoz ulit kaapa zéi'kan am pahwangunen né tou én ulit wo zéi'kan mahsanaweka. Ni Siamo si nimukum um wanua tua'na Babel un tanumokan si wéwéné sangaya si ipahkua-kua itii, si liméwo' sé tou wia ung kaayahan kenu karia ang kasamekanna; wo um wanua tua'na itii é niukum-Na pahpaan nimunu'mo sé ata-Na.”

³ Wo ing kazua ni séra é mahkuamé, “Haleluya! An teremuzna an api lima'unga um wanua tua'na itii é mahlintooza makaz ing kauré-uré!”

⁴ Ang kumuruzla sé zuana pulu' wo epat pahtutu'an wo sé epat tumou-tou itii wo mahsigi' si Opo Empung si rimumez witu u rurumezan-Na ing Kolano. Ang kuan néra, “Amin! Haleluya!”

⁵ An talingangkumé u nuwu' witi rurumezan ni Kolano itii mahkuamé, “Loozenola si Opo Empungta, é kamu péléng in ata-Na, ni kamu sé maindé' ni Sia, ni kamu in tou kanaramen kaapa in tou pahsigi-sigi'en!”

Um pésta kawéng ni Anak ni Domba

⁶ An talingangku kasiimé un tanu u nuwu' né sana réwok tou lakez i mahnuwu', tanumokan un enderna un tapahan wo tanumokan un zanina un erut totoz rimez, mahkuamé, “Haleluya! Pahpaan si Mahpiara, si Opo Empungta, Si Totoz Mahkawasa é mahkawasamo ing Kolano.

⁷ Méyémo kita péléng kumérét karia mahpaa-paaz, i sumigi' wo lumooz ni Sia! Pahpaan un endo si Anak ni Domba ing kumawéng é mémoikaayola, wo si kawéngen-Na é nimimeko.

⁸ Si wéwéné kawéngen-Na itii é niénéanola ni Opo Empung ing kumarai u roko' lenan totoz wangun u meto-petot wo totoz kulo'!” (U roko' lenan kulo' itii, nianamo an ulit pahlé'osen né tou ni Opo Empung).

⁹ A si malaekat itii kumuamé wia ni aku, “Ipantikola in téntii, ‘Mahpaa-paazola sé tou kinua i méyé witu um pésta kawéng ni Anak ni Domba.’ ” Ang kuana kasii wia ni aku, “A méikuaku kenu én ulit, ang kenu é Nuwu' wia si Opo Empung a méyé.”

¹⁰ A ni aku kumuruzla witu u sinaru un a'é ni malaekat itii i mongkot wo sumigi' ni sia, taan kuana wia ni aku, “Tia'mo mahasar téntu! Ni aku én ata, masuat wo ni ko karia né katuarimu esa pa'émanen sé mahkua a niilek wo an tinalinga néra tumoro si Yesus. Pahongkotala wo pahsigi'ela si Opo Empung! Pahpaan sé tou mahkua a niilek wo an tinalinga néra tumoro si Yesus ém wéwéhan roh i mahkua a méikuamé ni Opo Empung.”

Si simaké wia si kawalo kulo'

¹¹ An ilekengkuma ung kasendukan é nimawukama, im witu ém wéwéhan si kawalo kulo' sinakéan ni makangaran, ‘Si Toro Pa'émanen wo Si Ulit’. Ni Sia én zéi'kan mahsanaweka i mahtotoz ulit kaapa zéi'kan am pinahwanguné né tou wo i mahkoro'.

¹² Um weren-Na én tanumokan u layasna un api wo witu um wawo un ulu-Na é lakez am poporongen né kolano wo im wia ni Sia ém pinantikan ngaran un zéi'kan siapa si mata'u, akaz uman ni Sia in esa si mata'u.

¹³ Ni Sia éng kimarai ung karai tonton u mémoisousou witu un zaha' wo u ngaran-Na é “Nuwu' ni Opo Empung.”

¹⁴ Péléng sé suraro witi kasendukan é mahkiit ni Sia. Ni séra é simaké wia sé kawalo kulo' wo kimarai a roko' lenan totoz wangun wo totoz kulo'.

¹⁵ Im witu u sumah-Na é nimondolé um pisou tewel ung kumala péléng sé tahsasana wanua, wo ni Sia é merénta ni séra karia ung ketez totoz wangko', tanumokan i merénta karia un teken uaséi, wo ni Sia é mapailek un upi' ni Opo Empung, si Totoz Mahkawasa wia sé kakoro'-Na, tanumokan i mahlééka am wua'na an anggor witi pahpesutan an anggor.

¹⁶ Witu ung karai tonton-Na wo witu um paa-Na ém pinantikan u ngaran, “Kolano péléng né kolano wo Tuang péléng né tuang.”

Si binatang makaindé'en wo si nabi towo ing kinala

¹⁷ Ilekengkuma si malaekat esa rimendai witu um wawo ni endo, a sia kuméréta totoz rimez wia péléng sé menéwé-néwél witi langit, “Méyémo wia'i, maréwoké mémahwali-wali witu um pésta wangko' ni Opo Empung,

¹⁸ wo ni kamu sumeza' a lé'ona né kolano, né tonaas né suraro, né suraro totoz ketezen, né kawalo wo né simaké wia sé kawalo itii. Wo kasii seza'en niouola a lé'ona péléng né tou: séra in ata kaapa zéi'mo ata, sé tou kanaramen wo sé tou pahsigi-sigi'en.”

¹⁹ An ilekengkuma si binatang makaindé'en itii wo sé kolano wia ung kaayahan karia né suraro néra é nimaréwoko ing kumoro' sumaru si Simaké wia si kawalo kulo' itii wo sé suraro-Na.

²⁰ A si binatang makaindé'en karia si nabi towo itii kationala. Si nabi towo itii é si nimahwangunola a makakompo'en witu u sinaru ni binatang itii karia ung kawasa méiwéhénamé. Karia a makakompo'en itii, méipahlulunamé sé tou nimakaileko un tanda ni binatang itii wo nimahongkot wo nimahsigi'mola si patongna. Si binatang makaindé'en wo si nabi towo itii é menou-noupé' an ilombo'ma witu un tasik api wo walélang melaya-layas.

²¹ Péléng sé nimatezama ém winunu' karia um pisou nimondolé witu sumah ni Simaké wia si kawalo itii; wo péléng sé menéwé-néwél é nimawesuh ing kiman a lé'ona né winunu' itii.