Wahyu 18 - Taaz Weru Witu u Nunuwu'en Tombulu

Um Babel kinemu

¹ Kumawusa niitu, an ilekengkuma si esa malaekat walina timumpamé im witi kasendukan. Ni sia ém wéwéhan ung kawasa wangko' wo u sena' nimondolé im wia ni sia é nimangun ung kaayahan nimaaya-ayahma.

² Ni sia é mahkérét totoz rimez, kuana, “Kemumo, um Babel itii éng kemumo. Um wanua tua'na itii é nimaéndomola pahwéha-wéhan né sétang, wo wuwunian péléng né roh léwo' wo wuwunian péléng né tumétéwél makati'tiren wo ikazi'zis né tou.

³ Pahpaan péléng sé tahsasana wanua wia ung kaayahan ém winangunnamola mahsamek tanumokan in tewelen pahpaan nimelep un anggor méiwéhéna. Sé kolano wia ung kaayahan é nimahsamekola kariana. Wo sé tou mahwangké-wangkér wia ung kaayahan é nimawa'ilanola pahpaan sé tou witu um wanua tua'na itii én totoz lumelo in tumeles an ipahwangkér.”

⁴ An talingangkumé u nuwu' walina um witi kasendukan kimuamé, “Itula'umomé, é kamu in tou-Ku! Itula'umomé um wanua tua'na itii, wo a singkéla' witi wanua tua'na itii zéi'kan wangunen niou, wo kasii a meléwo' a matumoro um wanua tua'na itii én zéi'kan tumoro ni kamu.

⁵ Pahpaan a singkéla' witi wanua tua'na itii é nimahuusunano makaz witi langit, wo si Opo Empung é mémoikagenanga wana péléng a léwo'anna.

⁶ Kuramo u nimamualimé wia ni kamu im witi wanua tua'na itii, téntumo kangkasii u muali nioula witu um wanua tua'na itii, lumouspé'mé niitu, u muali nioula é makazuamé a nimamualimé witu, tahu'an niouola um pengengelepanna karia un eelepen u makazuamé ung kapa'it un eelepen méiwéhénamé wia ni kamu.

⁷ Kalakez ang kaloozan wo ang kawa'ilanan pinahpé'ananamé, téntu kangkasii ung kalakez an zézéha wo a merara un até iwéhé nioula wia ni sia. Pahpaan witu un aténa, ni sia sekezé é mahkua in téntii, ‘Ni aku éng kolano wéwéné si rimumez witu u rurumezangku ing kolano! Ni aku én zéi'kan wéwéné mahesa-esamokan, wo un atéku én zéi'kan mahpenda-pendanla u rumara pahpaan im pinatéana ni mahayo.’

⁸ Pahpaano niitu, im witu u sana endo ni sia én toron a meléwo': a saki melaput, u merara un até wo ung kaahreman; wo ni sia é la'ungen karia un api, pahpaan si Opo Empung, si mahtotoz ulit kaapa zéi'kan am pahwangunenna éng ketezen.”

⁹ Sé kolano wia ung kaayahan sé nimahsamekola wo sé nimawa'ilanola pahpaan um wanua tua'na itii é mamé' wo mamé' karia i mahkérét i mileka an teremuz um wanua tua'na itii im pahla'ungen.

¹⁰ Ni séra é marumendai zou'ma im witu um wanua tua'na itii, pahpaan i maindé' an zézéha wo ni séra éng kumua, “Méikaléwo'mo, ni ko é méikaléwo'mo, é ko wanua tua'na, Babel, um wanua tua'na enté', pahpaan witu un sana jam uman si Opo Empung é niméhémoma un ukuman.”

¹¹ Sé tou mahwangké-wangkér wia ung kaayahan é mahamé' wo rumara un até tumoro um wanua tua'na itii, pahpaan zéi'mo siapa tou tumeles an ipahwangkér néra.

¹² An ipahwangkér néra é: a mas am wangunen wo am péra' am wangunen, am watu totoz mahal wo a mutiara, a roko' lenan totoz wangun wo a roko' monong mahal, roko' sutra wo kasii a roko' totoz rangdang, ang kai mahwou tariis, ang gading am wangunen, ang kai mahal am wangunen, am perunggu am wangunen, an uaséi am wangunen, wo a marmer am wangunen,

¹³ ang kulit kai tombal wo am pahwangunen lana mahwou tariis kaapa balsem, a mahwou tariis, mur wo kamania, an anggor, a lana zaitun, an topong totoz wangun wo ang gandum, sé sapi, sé domba, sé kawalo wo a roda, sé ata wo un asengan ni tou.

¹⁴ Sé tou mahwangké-wangkér mahkua witu um wanua tua'na itii, “Péléng am pelelo-lelonu é nimaapumoma, wo péléng an totoz mahal wo péléng am wangun, é nimaapumoma, wo zéi'mo pahile-ilekennula.”

¹⁵ Sé tou mahwangké-wangkér sé wa'ilano pahpaan um wanua tua'na itii é rimendai zou'ma im witu, pahpaan ni séra é maindé' én taa toroné an zézéha witu um wanua tua'na itii. Ni séra é mahamé' wo mahamé' karia i mahkérét,

¹⁶ wo mahkua, “Méikaléwo'mo, méikaléwo'mo um wanua tua'na pahkua-kua ung kimarai a roko' lenan totoz wangun, a roko' monong mahal wo kasii a roko' totoz rangdang wo pinerong karia a mas, am watu totoz mahal wo a mutiara,

¹⁷ pahpaan witu u sana jam uman péléng ang kawa'ilanana é nimaapumoma.” Péléng sé mahali-ali a londéi tua'na, wo sé tou simaké wana a londéi tua'na, wo sé tou mahpaayang wana a londéi tua'na, wo péleng sé tou mahpaayang witi tasik é rimendai zimou'ma.

¹⁸ Wo ni séra é mahkérét i nimileka an teremuzna un api a mahla'unga um wanua tua'na itii, in téntii, “Wanua tua'na wisa un ipahkua-kua tanu um wanua tua'na itii?”

¹⁹ An ulu néra ém pahwuzwuzan néra an awu, un tumuzu'mé un até néra é rumara wo mahamé' karia i mahkérét, “Méikaléwo'mo, um wanua tua'na Babel é méikaléwo'mo. Sé tou wéwéhan a londéi tua'na witi wanua tua'na Babel é nimawa'ilano pahpaan an ipahwangkér néra é mahal, pahpaan witu sana jam uman um wanua tua'na Babel itii éng kemumo.”

²⁰ Mahpaa-paazola é kamu sé witi kasendukan, ni kamu sé tou ni Opo Empung, sé aatu wo sé nabi, pahpaan am winangun néra wia ni kamu, sé tou witu um wanua tua'na itii é niukummoma ni Opo Empung!

²¹ An ilekengkuma si malaekat ketezen niménété um watu katua'na um watu pegigilingan wana am pahgilingan ang gandum, an iweritnama witi tasik, ang kuana, “Téntumo um Babel, um wanua tua'na pahkua-kua itii, i méirime-rimeza méiwerit witi wawa', wo um wanua tua'na itii én zéi'mo pahile-ilekela.

²² An zanina ung kecapi im pahléongan wo sé mengangantar, wo sé menenengo am peloit wo am pontuang, zéi'mo talingané im witi wanua tua'na itii, wo si tou siga' memamangun am peperong én zéi'mo pahile-ilekela im witi wanua tua'na itii, wo un zanina am watu pahgiling én zéi'mo talingané im witi wanua tua'na itii.

²³ U sena'na u solo én zéi'mo sumena'mé im witi wanua tua'na itii, wo sé mezazani witi tampa pahkawéngan én zéi'mo talingané im witi wanua tua'na itii. Pahpaan sé tou witi wanua tua'na itii sé mahwangké-wangkér é sé tou totoz ipahkua-kua im wia ung kaayahan, wo pahpaan a riaramu, péléng sé tahsasana wanua é méilulumu.”

²⁴ Um wanua tua'na itii é niukum pahpaan sé nabi, sé tou ni Opo Empung wo péléng sé tou wia ung kaayahan ém winunu'na.