Wahyu 15 - Taaz Weru Witu u Nunuwu'en Tombulu

Ung kakantaren lolooz wia si Opo Empung

¹ An ilekengku kasiima un tanda walina un zéi'kan kakuaan wo makakompo'en witi kasendukan. Un tanda itii é sé pitu malaekat sé wéwéhan ung kawasa i mangun am pitu meléwo' kamurian wia ung kaayahan. Pahpaan sa nimamualimoma am pitu meléwo' itii, un upi' ni Opo Empung é nimakazola.

² Tumondong niitu, an ilekengkuma wéwéhan un tanu un tasik kaca nimasembor wo un api. Wo witu un tembir un tanu un tasik kaca itii ém wéwéhan sé tou rimendai. Ni séramo sé kimalamoma si binatang makaindé'en itii wo si patongna wo kasii u rérékénan u ngaranna. Wia sé tou itii ém wéwéhan ung kecapi ni Opo Empung.

³ Wo ni séra é mahkantar ung kakantaren ni Musa, si ata ni Opo Empung wo kasii ung kakantaren ni Anak ni Domba, u mahkuamé in téntii, “Wangko' wo zéi'kan kakuaan péléng am pinaayang-Mu, o Mahpiara, Opo Empung, Si Totoz Mahkawasa! Péléng am winangun-Mu én zéi'kan mahsanaweka wo ulit, o Kolano péléng né tahsasana wanua!

⁴ Séi si zéi'kan maindé' wia ni Ko, o Opo Empung, wo zéi'kan mahsigi' wo mahlooz u ngaran-Mu? Pahpaan ni Ko uman si lenas; pahpaan péléng sé tahsasana wanua é mémongkot i sumigi' ni Ko, Pahpaan méikatuzu'momé ung kaulitan i ni Ko mahtotoz ulit kaapa zéi'kan péléng am pahwangunen né tou.”

Sé pitu malaekat

⁵ Kumawusa niitu, an ilekengkuma um Walé ni Opo Empung, um pahkuan kasii in Ténda pahento'an ni Opo Empung um witi kasendukan, nimawukama.

⁶ A sé pitu malaekat sé wéwéhan ung kawasa i mangun am pitu meléwo' itii, mondolé im witu um Walé ni Opo Empung. Ni séra éng kimarai ang karai lenan kulo' weresi wo meto-petot, wo wana am wezwez néra é rinikezan um pahsaléléng mas am wangunen.

⁷ A si esa im wia sé epat tumou-tou itii méhéma wia sé pitu malaekat itii am pitu eelepan a mas am wangunen a mawuta-wuta un upi' ni Opo Empung, si menou-nou makaz ing kauré-uré.

⁸ A mawutama karia an teremuz um Walé ni Opo Empung itii pahpaan ung kawangko'an ni Opo Empung wo pahpaan ung kawasa-Na. Zéi'kan siapa zozo' in esa si tou toro muntep witu um Walé ni Opo Empung itii, sa zéi'kampé' simampeta am pitu meléwo' né pitu malaekat itii.