Wahyu 14 - Taaz Weru Witu u Nunuwu'en Tombulu

Si Anak ni Domba wo sé tou-Na

¹ An ilekengkuma si Anak ni Domba rimendai witi kentur Sion wo sé memali-mali karia-Na é sé sana atus epatna pulu' wo epatna riwu tou-Na. Im wana an tungtung né tou itii ém pinantikan u ngaran-Na wo u ngaran ni Ama'-Na.

² An talingangkumé u nuwu' totoz rimez witi langit, tanumokan enderna un tapahan wo un erut. U nuwu' tinalingakumé itii én tanumokan an zanina ang kecapi am pahléongan né tou.

³ Ni séra é mahkantar ung kakantaren weru witu u sinaru u rurumezan ni Kolano wo witu u sinaru né epat tumou-tou wo né pahtutu'an itii. Zéi'kan siapa zozo' in esa si toro mahtata'u ung kakantaren itii, akaz uman sé sana atus epatna pulu' wo epatna riwu tou sé tinubus im wia ung kaayahan sé toro mahtata'u niitu.

⁴ Ni séra én tanumokan si tuama zéi'kampé' nimahteke-tekela karia ni wéwéné pahpaan kapaaz néra ung katou-touan néra ém weresi. Ni séra é sé mahkii-kiit si Anak ni Domba wisa uman un angéan-Na. Ni séramo sé tinubus im wia sé tou i maéndo tanu raragés kataré-taré wia si Opo Empung wo si Anak ni Domba.

⁵ Ni séra én zéi'kan nimahkua-kuala an towo wo ni séra én zéi'kan siapa pahséro'an.

Sé malaekat telu

⁶ An ilekengkuma si malaekat walina menéwé-néwél witi langit. Ni sia é nimahalimé u Nuwu' Lé'os tumoro si Yesus u makaz ing kauré-uré. U Nuwu' Lé'os itii én iwoka' wia sé tou mahento' wia ung kaayahan wo wia sé tahsasana wanua wo wia sé tahsasana suzu wo wia sé tahsasana nunuwu'en wo wia sé tahsasana réwok mahtuari.

⁷ Si malaekat itii é nimuwu'mé totoz rimez, “Ikaindé'la si Opo Empung, pahsigi'ela wo pahloozela Sia, pahpaan un oras-Na in tumotoz in ulit kaapa zéi'kan am pahlé'osen né tou é méikaayomola. Mahongkotla wo mahsigi'la wia ni Sia si nimanguno u langit, ung kaayahan, un tasik wo péléng ang kembu'an.”

⁸ Wéwéhan kasii si malaekat kazua timondongé si malaekat kataré, ang kumuama, “Kemumo, Babel, um wanua tua'na itii éng kemumo! Sé tou witu é nimangunola péléng sé tahsasana wanua i mahsamek, tanumokan ni séra nimanguna sé tou nimatewelen karia un anggor.”

⁹ Wo wéwéhan kasii si malaekat katelu timondongé sé malaekat zua itii a rumimeza ing kimuama, “Séi uman si mahongkot wo mahsigi' si binatang makaindé'en wo si patongna, wo séi uman sé nimakailek un tanda ni binatang itii witu un tungtung kaapa witu u lengenna

¹⁰ én toron un upi' ni Opo Empung. Ni sia én zézéhan karia un api wo um walélang witu saru-sarun né malaekat lenas wo witu u saru-sarun ni Anak ni Domba, tanumokan ni séra nimelep un anggor pa'it zéi'kan sinembor u méitahu' in esa ni Opo Empung witu un eelepan.

¹¹ Un teremuzna un api mahzézéha ni séra é mahlintooza makaz ing kauré-uré, wo endo wengi ni séra én zéi'kan mazéi' im pahzézéhan. Ni séra é sé mahongkot wo mahsigi' si binatang makaindé'en itii karia ni patongna, wo kasii sé nimakaileko tanda u ngaranna.”

¹² Un ipahpuu-puuna im wia'i éng kaezenan né tou ni Opo Empung, sé mahkiit am perénta-Na wo ma'éman wia si Yesus.

¹³ An talingangkumé u nuwu' witi kasendukan ung kimuamé wia ni aku, “Ipantikla ang kenu: Rengan in tarékan, mahpaa-paazola sé tou nimaté pahpaan nimaesa karia ni Mahpiara!” A si Roh ni Opo Empung kumuamé, “Éné, ulito itu, wo séra toro kumana'la im wana am paayangen néra, pahpaan péléng am pinaayang néramé é mengari-ngaria ni séra.”

Sé tou zéi'kan mahkiit si Opo Empung én ukumen-Na

¹⁴ An ilekengkuma u ninahak kulo', wo witu um wawo u ninahak itii é rimumez si tou tanumokan si Oki' ni Tou. Witu un ulu-Na ém wéwéhan um poporongen ni kolano u mas am wangunen, wo u lengen-Na én timion um pahagi' pengungupu' un totoz tewel.

¹⁵ A mondolé si malaekat walina im witi Walé ni Opo Empung wo karia i rimez ni sia kimuama wia ni Sia si rimumez witu um wawo u ninahak itii, “Itayumoma um pahagi'-Mu itii wo méhémo i mupu', pahpaan an upu'en wia ung kaayahan én orasnamo in upu'en.”

¹⁶ A Sia, si rimumez witu um wawo u ninahak itii tumayuma um pahagi'-Na witu um wawo ung kaayahan i mupu', an upu'enna ung kaayahan.

¹⁷ Tumondong niitu, a mondolé si malaekat walina im witi Walé ni Opo Empung um witi kasendukan. Ni sia kasii én timion um pahagi' pengungupu' un tewel.

¹⁸ Wo wéwéhan kasii si malaekat walina nimondolé witu um pahtunuan a raragés wia si Opo Empung. Ni sia é mahkawasa mahimek un api witu. A sia numuwu'mé karia i rimez wia si malaekat timion um pahagi' tewel itii, kuana, “Itayumoma um pahagi'mu tewel itii wo upu'enoma am wua'na an anggor wia ung kaayahan, pahpaan am wua'na an anggor itii én orasnamo in upu'en.”

¹⁹ An itayuma ni malaekat itii um pahagi'na wia um wawo ung kaayahan, upu'ennama am wua'na an anggor wia ung kaayahan, an ilombo'nama am wua'na an anggor itii witu um pahpesutan an anggor un totoz tua'na. Um pahpesutan an anggor itiimo un tampa ni Opo Empung i mukum sé tou mengiit un upi'-Na.

²⁰ Am wua'na an anggor itii ém pahpesuten witi ondol um wanua tua'na. Im witu um pahpesutan itii mahso'so'mé un zaha', ung karakékna é nimakaz witu u semuz ni kawalo wo kazou'na um pahso'so'ana én teluna atus kilometer.