Wahyu 12 - Taaz Weru Witu u Nunuwu'en Tombulu

Si wéwéné wo si naga

¹ An ilekena un tanda wangko' witi langit. Wéwéhan si wéwéné kimarai si endo, un a'éna é liméék witu um wawo ni loloho'en. Witu un ulu ni wéwéné itii ém wéwéhan um poporongen ing kolano u mapulu' wo zua tototi'en am wangunen.

² Ni sia é mahawa-awak, wo mema'o-ma'osokan karia i mengéré-ngérét pahpaan orasnamo in tumou si oki'na.

³ An ileken kasiima un tanda walina witi langit. Pahilekena im wéwéhan si naga tua'na totoz rangdang. An ulu ni naga tua'na itii ém pitu, a sungéna é mapulu' wo wana am wawo an uluna itii ém péléng wéwéhan am poporongen né kolano.

⁴ Wo un ipusna é mahkéhongé sana pahtelu né tototi'en witi langit, an ilombo'nama sé tototi'en itii witi kaayahan. Si naga tua'na itii é rimendai witu u sinaru ni wéwéné si mahento-ento'mokan in tumoumé si oki'na, i sumo'kep wo luma'meza si itoumé ni wéwéné itii.

⁵ A si wéwéné itii makaileké si Lowai. Si Lowai itii si mamerénta péléng sé tahsasana wanua wia ung kaayahan karia un teken uaséi. Kumompo'mé si Lowai itii éng kinahata am pahalina wia si Opo Empung wo witu u rurumezan-Na ing Kolano.

⁶ A si wéwéné itii tumingkasa witi kapelasan, un tampa niimeko ni Opo Empung in éyéanna. Im witu ni sia éng kelungan, ung kauréna é sana riwu wo zuana atus wo enemna pulu' endo.

Si Mikhael kimala si naga tua'na

⁷ Tumondong niitu, a mamualima um pahkoro'an witi kasendukan. Si Mikhael wo sé malaekatna é mahkoro' mahsaru si naga si pahsawangan né malaekat ni naga itii.

⁸ Taan si naga itii wo sé malaekatna én zéi'kan nimakawawama, a séra iwohomé im witi kasendukan.

⁹ Si naga tua'na itii é si ulé' tu'a, si pahkuan kangkasii in tonaas né sétang kaapa si sétang mahlulu sé tou. Ni siamo si limulu péléng sé tou wia ung kaayahan wo ni sia kasii méilombo'mé wia ung kaayahan karia né malaekatna.

¹⁰ An talingangkumé u nuwu' rimez witi kasendukan u mahkuamé, “In tarékan én orasnamo si Opo Empung i milot sé tou-Na im witu un ukuman wana a singkéla' i mapailek ung kawasa-Na, merénta ing kolano wo si Kristus si méitaaz-Na i mapailek ung kawasa-Na ing kolano wia ung kaayahan. Pahpaan si tonaas né sétang si im puuna endo wo wengi rimendai witu u sinaru ni Opo Empung i mahtoké sé katuari esa pa'émanen é méiondolomé an ilombo'mé wia ung kaayahan.

¹¹ Sé katuari esa pa'émanen itii kasii éng kimalamoma si tonaas né sétang karia un zaha' ni Anak ni Domba, wo karia un tinalinga wo niilek néra tumoro si Anak ni Domba, un ipahkua néra wia sé tou. Ni séra én zéi'mo pandung ung katou-touan néra in esa makaz séra i maté.

¹² Niitumo, o kasendukan, mahpaa-paazola, wo ni kamu péléng sé mahento' witu. Taan ikaléwo'la kamu sé wia um wawo un tana' wo sé witi tasik! Pahpaan karia in totoz maupi' si tonaas né sétang én timumpamoma wia ni kamu. Pahpaan un orasna i mahwangun a léwo' én zéi'mo mauréma.”

Si naga mahkikiit si wéwéné

¹³ I si naga itii nimata'umola i ni sia é mémoilombo'mé wia ung kaayahan, a sia mahkikiit si wéwéné timoumé si Lowai itii.

¹⁴ Taan si wéwéné itii ém winéhan un zua tétéwél ni kiokiok tua'na, wo sia toro tuméwél mangé witi tampana witi kapelasan, un tampa kinelungan ni sia um wa'katé im wia si naga itii, ung kauréna én teluna ta'un wo enemna loloho'en.

¹⁵ A si naga itii mukama u sumahna a mondolé un zano, ung kalakezna én tanumokan un zano witu u so'so'an totoz tember, méisaruma wia si wéwéné itii i mahaayuz ni sia.

¹⁶ Taan un tana' é métimulung si wéwéné itii. Un tana' é nimawekama tanu u sumah i nimawukama a numo'nota an zano mahondolé witu u sumah ni naga itii.

¹⁷ Niitumo si naga itii én totoz maupi' wia si wéwéné itii, a si naga itii mangé i zuméha sé suzu walina ni wéwéné itii, sé mahkiit um perénta ni Opo Empung wo kasii mahkua un tinalinga wo niilek néra tumoro si Yesus.

¹⁸ A si naga itii marumendai witi tembir un tasik.