Wahyu 11 - Taaz Weru Witu u Nunuwu'en Tombulu

Sé zua tou mahkua tumoro si Opo Empung

¹ Tumondong niitu, an aku wéhanla u sana repu' kai tanu un teken ipahukur wo pineréntamé in téntii, “Mangémo wo ukurela um Walé ni Opo Empung wo um pahtunuan a raragés wo rékénennula sé tou mahragés wia si Opo Empung witu.

² Taan u lésaz witi ondol um Walé ni Opo Empung én tia'mo pahuukurennu. Pahpaan, niitu é mémoiwéhé wia sé tahsasana wanua walina sé zéi'kan mata'u si Opo Empung. U Yerusalem um wanua tua'na lenas é maipeléé-léék néra, epatna pulu' wo zuana loloho'en ung kauréna.

³ Ni Aku é matu sé zua tou sé nimilek wo timalinga a méikua-Ku, i makumua a méi'kua-Ku itii, karia ing kimarai ung karai zemdem, ung kauréna é sana riwu zuana atus wo enemna pulu' endo.”

⁴ Sé tou zua itii én tanu ung kai zaitun zua, wo un zua pezezetaan solo a méipenoo-nooz witu u sinaru ni Opo Empung si mahkawasa wia péléng ung kaayahan.

⁵ Sa wéwéhan tou mahwawa'wa' in zuméha ni séra, u sumah néra é mondolé api i luma'ung péléng sé kakoro' néra. Wo sa wéwéhan sé tou mahwawa'wa' in zuméha ni séra, sé tou itii é maté tanu niitu.

⁶ Ni séra ém wéhan ung kawasa i mapé' u langit wo zéi'kan mahuza-uzané, karegas séra i mahkua a méikuamé ni Opo Empung. Ni séra kangkasii ém wéhan ung kawasa i mangun péléng an zano maéndo zaha' wo i mukum ung kaayahan karia a meléwo' makaindé'en nimahwali-walinaan, sekez séra im paaz mangun niitu.

⁷ Sa séra nimakakuamoma an tinalinga wo am pina'ilek néra, wéwéhan si meneza' tou mondolé witu um woso um patéan, mékumoro' karia néra zua wo kumala ni séra wo munu' ni séra.

⁸ Sé zua tou nimatémo itii é mamezeta-zeta' witu u lalan tua'na um wanua tua'na un tampa kangkasii ni Mahpiara néra i sinalip. U ngaran um wanua tua'na itii é méiandé né tou i Sodom wo Mesir.

⁹ Sé tou wia péléng sé tahsasana wanua, sé tahsasana suzu, sé tahsasana nunuwu'en wo sé tahsasana réwok mahtuari é mengile-ngilek sé zua nimatémo itii, ung kauréna én telu wo sana pahzuana endo. Zéi'kan iwéhé né tou itii sé zua nimatémo itii i maileweng.

¹⁰ Sé tou wia ung kaayahan én totoz mahpaa-paaz, pahpaan sé tou zua itii é nimatémo. Sé tou itii é mahpésta wo mahsasawelan ang kukulu, pahpaan sé zua nabi itiimo sé im puuna nimangun sé tou wia ung kaayahan totoz nimazéha-zéhama.

¹¹ Lumangkoia un telu wo sana pahzuana endo, si Opo Empung é niméhéma un asengan wia sé tou zua itii a séra rumendaié wo péléng sé tou nimileka sé tou zua itii én totoz maindé'.

¹² A sé nabi zua itii tumalingamé u nuwu' rimez witi kasendukan u mahkuamé wia ni séra, “Mazémomé wia'i!” Pengile-ngileken né kakoro' néra, a séra mazéma witi kasendukan, sinaputa a ninahak.

¹³ In toro niitu, a méhzo'mé totoz repet. U sana pahpulu' um wanua tua'na itii é nimakemu, wo sé pituna riwu tou é nimaté pahpaan un éhzo' itii. Sé tou walina én totoz maindé', a séra mahsigi' wo mahlooz si Opo Empung si witi kasendukan.

¹⁴ U meléwo' kazua é limangkoioma. Taan ilekena, u meléwo' katelu é mahéyémo.

Si malaekat kapitu simengo um pontuang

¹⁵ A si malaekat kapitu sumengoma um pontuangna, an talingangkumé a nuwu' totoz rimez witi kasendukan a mahkuamé, “Ung kawasa i mahperénta wia ung kaayahan én anu uman ni Opo Empungta wo ni Kristus si méitaaz-Na, wo ni Sia éng kumawasa ing Kolano makaz ing kauré-uré.”

¹⁶ Sé zuana pulu' wo epat pahtutu'an sé rimumez witu u rurumezan néra ing kolano witu u sinaru ni Opo Empung é nimongkota wo mahsigi' si Opo Empung.

¹⁷ Ni séra é mahkua, “Ni kai éng kumuama u makasé wia ni Ko, o Opo Empung, si Totoz Mahkawasa, si wia wo wiamo, pahpaan ni Ko én timiono ung kawasa totoz wangko' wo mahkawasamo ing Kolano.

¹⁸ Péléng sé tahsasana wanua é maupi'mo, taan méikaayomola un oras-Mu i mapailek un upi'-Mu, wo oras-Mu in tumotoz ulit kaapa zéi'kan am pahwangunen né tou nimatémo wo méhé um wawaér wia sé ata-Mu, wia sé nabi-Mu, wo wia sé tou linenas-Mu, wo wia sé tou maindé' u ngaran-Mu, wo wia sé tou kanaramen wo sé tou pahsigi-sigi'en, wo i luméwo' séi uman sé mahléléwo' ung kaayahan.”

¹⁹ A mawukama um Walé ni Opo Empung um witi kasendukan. Ilekengkuma un Tatahu'an liné'osan um pinataazan ni Opo Empung witi untep um Walé-Na itii. A mahsena'mé an tila'pong wo mahzanimé an erut, méhzo'mé wo mahuzané éis totoz repet.