Titus 2 - Taaz Weru Witu u Nunuwu'en Tombulu

An tutuzu' ulit

¹ Taan ni ko Titus, ipahtuzu'la an tutuzu' ulit.

² Sésaala sé tuama tu'amo wo séra mahime-imek un tou néra, pahsigi'en né tou, tulap, zéi'kan mazéi' i ma'éman, zéi'kan mazéi' rumaraaté si kasuat tou wo ezen witu un zézéha.

³ Téntu kangkasii sé wéwéné tu'amo, ni séra é léwo'zéi' i menou-nou mahkiit ung kapaaz ni Opo Empung, zéi'kan toro mahtawuruk sé tou walina wo zéi'kan toro mahelep a menewelen. Taantaré ni séra é léwo'zéi' i mahtuzu' am wangun,

⁴ wo séra toro mahtuzu' sé wéwéné tuari néramé i rumaraaté si mahayo wo sé oki' néra,

⁵ menou-nou karia in tulap wo zéi'kan siapa pahséro'an, tulap i mahimek sé sana awu néra, lé'os uman wo mahtali-talinga wia si mahayona. Karia in téntu, u Nuwu' ni Opo Empung én zéi'kan pahséro'an né tou.

⁶ Téntu kangkasii sé tarétumou, pahsésaala séra, wo séra makaezen a lelo néra im wana am péléng

⁷ wo wangunela ung katou-touannu i maéndo kékéréan wangun wia ni séra. I mahtuzu' wia sé tou, ni ko é léwo'zéi' in uli-ulit mahtuzu' wo tia' mahtowo,

⁸ an ipahkuamu ém wéwéhan torona wo zéi'kan siapa um pahséro'an, makaz sé mahsaru ni ko é maizang pahpaan zéi'kan siapa un ikua néra i mahtawuruk tumoro ni kita.

⁹ Sé ata é léwo'zéi' i mahtali-talinga wia si tuang néra wo mahwangun si tuang néra i mahpaa-paaz im wana am péléng, tia' mahwingkot,

¹⁰ tia' mahremu', taan tia' mazéi' mapailek in uli-ulit mahpaayang wo toro pa'émanen. Karia in téntu, ni séra im wana am péléng é mahsigi' wo mahlooz an tutuzu' ni Opo Empung, si Milot ni kita im witu un ukuman wana a singkéla'.

¹¹ Pahpaan si Opo Empung é nimapailekoma ung kamang méitambér-Na i nimilot péléng sé tou im witu un ukuman wana a singkéla'.

¹² Ni Sia é mahtuzu' ni kita wo kita zéi'mo menou-nou i mahsaru ni Sia wo zéi'mo mahkiit a lelo léwo' né tou wia ung kaayahan wo menou-nou karia in tulap, zéi'kan mahsanaweka wo mahkiit uman um paaz-Na im wia ung kaayahan in tarékan.

¹³ Karegas niitu, ni kita ma'ento' un endo mawuta-wuta ung kamang, um pengéré-ngéré'enta i lekepené. Witu un endo itii ni kita é milek ung kawangko'an-Na si Totoz wangko' wo si Yesus Kristus si Milot ni kita im witu un ukuman wana a singkéla'.

¹⁴ Ni Sia é nimayomola un tou-Na i milot ni kita im wana péléng a léwo'an wo mangun ni kita maéndo tou lenas wo maéndo tou-Na sé zéi'kan mazéi' mahlé'os am wangun.

¹⁵ Titus, ipakawoka'la niana péléng, pahsésaala wo pahséro'ela séra karia ung kawasa in aatu ni Opo Empung. Tia' ipahwaya séi uman si meroros ni ko.