Roma 8 - Taaz Weru Witu u Nunuwu'en Tombulu

Ung katou-touan mahkiit si Roh ni Opo Empung

¹ Niitumo, in tarékan én zéi'mo siapa un ukuman wia sé menou-nou nimaesamo karia ni Kristus Yesus.

² Pahpaan si Roh ni Opo Empung si nimangun ung katou-touanta nimaesa karia ni Kristus Yesus si nimilotomé ni kita im witu un ukuman wana a singkéla' u nimahalimé um patéan.

³ An zéi'kan kawawaan im wangunen witu un ukum Torat pahpaan ni kita én tou zéi'kan enté' ém winanguno ni Opo Empung. Ni Sia é nimatumé si Oki'-Na in esa in tou uman tanumokan si tou simingkéla', in zuméi' a singkéla' wo méhé ukuman wana a singkéla' witu un awakta.

⁴ Si Opo Empung nimangun niitu wo ni kita mawutul i mahwangun ung kapaaz-Na mengiit un ukum Torat, pahpaan in tarékan ni kita makawawa i menou-nou mahtali-talinga wia si Roh ni Opo Empung wo zéi'mo mahkiit ang kapaaz un awakta.

⁵ Pahpaan sé menou-nou mahkiit um paaz un awakna in esa é megena-genang uman i mangun um paaz un awakna in esa; taan sé menou-nou mahkiit um paaz ni Roh ni Opo Empung é megena-genang uman i mangun ang kapaaz ni Roh ni Opo Empung.

⁶ Si tou mahgenang um paaz un awakna in esa é mahwali ni sia witu um patéan, taan si tou mahgenang ang kapaaz ni Roh ni Opo Empung é mahwali ni sia witu ung katou-touan wo ung kaluasan witu un até.

⁷ Si tou mahgenang um paaz un awakna in esa é makahkoro wo si Opo Empung. Pahpaan si tou itii én zéi'kan mahtali-talinga an tinotoz-Na wo ni sia én zéi'kan mamuali i mahtali-talinga an tinotoz-Na.

⁸ Sé mahkiit um paaz un awakna in esa én zéi'kan mamuali i mangun si Opo Empung mahpaa-paaz.

⁹ Taan ung katou-touan niou én zéi'kan mahkiit ung kapaaz un awak niou in esa taan mahkiit ung kapaaz ni Roh ni Opo Empung, pahpaan si Roh ni Opo Empung é nimaesamo karia niou. Si tou zéi'kan siapa Roh ni Kristus witu un aténa, ni sia én zéi'kan anu ni Kristus.

¹⁰ Taan sa si Kristus é nimaesamo karia niou, zozo' un tou niou é maté pahpaan a singkéla', taan si Roh ni Opo Empung é méhé ung katou-touan wia ni kamu pahpaan ni kamu é niéndo-Na ulit.

¹¹ Si Roh ni Opo Empung, si timou sumaup si Yesus im wia sé nimaté é nimaesamo karia niou. Ni Sia si timou sumaup si Kristus Yesus im wia sé nimaté é méhé ung katou-touan witu un awak niou u maléwo' itii mengiité si Roh-Na si nimaesaan karia niou.

Si Roh ni Opo Empung si nimangun ni kita i maéndo tou-Na

¹² Niitumo katuari-katuari, ni kita ém wéwéhan u léwo'zéi' im wangunen, taan zéi'kan mengiit ung kapaaz un awak in esa. Ni kita én tia' menou-nou mahkiit ung kapaaz un awak in esa.

¹³ Pahpaan, sa ung katou-touan niou é mahkiit ung kapaaz un awak in esa, ni kamu é makailek um patéan. Taan sa ung katou-touan niou é mahkiit ung kapaaz ni Roh Lenas, ni kamu é mahpapaté um pahwangunen un awak niou u mahsingkéla', wo ni kamu é mamenou-nou.

¹⁴ Péléng sé tou pahahkiten ni Roh ni Opo Empung én oki' ni Opo Empung.

¹⁵ Pahpaan si Roh ni Opo Empung si kinailekan niou én zéi'kan nimangun ni kamu nimaéndo ata makaz nimangun ni kamu kinaindé'ampé', taan si Roh ni Opo Empung si kinailekan niou é nimangun ni kamu maéndo oki' ni Opo Empung. Karia ni Roh ni Opo Empung itii ni kita én toro tumawah si Opo Empung, “O Abba, o Ama'ku!”

¹⁶ Si Roh ni Opo Empung in esa si nimaesamo karia ni roh si wia ni kita é mapailek i ni kita én oki' ni Opo Empung.

¹⁷ Sa ni kita én oki'-Na, ni kita kangkasii é maéndo tou makasangkum a méitaaz ni Opo Empung. Ni kita é makailek a sangkum itii karia ni Kristus. Niitu éng kailekanta sa ni kita mazéha karia-Na, wo ni kita kangkasii é loozen wo sigi'en karia-Na.

Sé tou niéndo ulit é loozen wo sigi'en ni Opo Empung

¹⁸ Pahpaan totoz kata'uangku, an zézéha pahpendanenta in tarékan zéi'kan mata'u pasuaten karia u lolooz wo u sisigi'an u maipapailek wia ni kita.

¹⁹ Pahpaan péléng sé wia ung kaayahan én totoz melelo i ma'ento' un oras i si Opo Empung mapata'u sé maéndo oki'-Na.

²⁰ Pahpaan péléng sé wia ung kaayahan é méiwayamo i maéndo zéi'kan siapa torona, zéi'kan pahpaan um paazna in esa, taan pahpaan um paaz ni Opo Empung.

²¹ Taan wéwéhan um pahéré'an, pahpaan péléng sé wia ung kaayahan én ikapilot im witu ung kawasa u mangun ni séra i léwo'en, wo péléng sé wia ung kaayahan én uli-ulit méikapilot i loozen wo sigi'en karia né oki' ni Opo Empung.

²² Pahpaan kata'uanta, makaz in tarékan péléng sé wia ung kaayahan é mahpa'os, tanumokan si ina' in tumoumé si oki'na.

²³ Zéi'kan uman ni séra, ni kita kangkasii é nimakaileko si Roh Lenas si kataré-taré méiwéhé ni Opo Empung im wana ang kamang mahtondongé. Ni kita kangkasii é mahpa'os witu un atéta karegas i ma'ento' in éndon oki' ni Opo Empung u mangun un awakta uli-ulit méikapilot.

²⁴ Witu um pahéré'an kenumo ni kita méipiloté im witu un ukuman wana a singkéla'. Taan sa um pahéré'anta itii ém pahilekenola, niitu én zéi'mo pahkuan pahéré'an. Pahpaan, kura kahuman kita mahéré' witu um pahilekentamola?

²⁵ Taan sa um pahéré'anta én zéi'kan pahilekenta, ni kita é léwo'zéi' in ezen i ma'ento' niitu.

²⁶ Téntu kangkasii, si Roh Lenas é sumawang ni kita sa kita zéi'kan enté'. Pahpaan, zéi'kan kata'uanta kura un ulitna i mengaléi; taan si Roh Lenas in esa si nimengaléila am pema'o-ma'os an zéi'mo kakuaan.

²⁷ Si Opo Empung si mata'u am witu un até né tou, mata'u ung kapaaz ni Roh Lenas pahpaan si Roh Lenas itii si mahpengaléi sé tou linenas ni Opo Empung mengiit ung kapaaz-Na.

²⁸ Kata'uanta i si Opo Empung é mimek péléng am péléng wo péléng niitu é mahalimé ung kalé'osan wia sé rumaraaté ni Sia, sé tinawah mengiit ung ginenang-Na.

²⁹ Pahpaan péléng sé kata'uano ni Opo Empung rengané im puuna, ni séra én tinotoz-Namo rengané im puuna i maéndo tanu si Oki'-Na. Si Oki'-Na itii é maéndo Oki' tu'a im wia sé lakez mahtuari.

³⁰ Péléng sé tinotoz-Namo rengané im puuna, ni séra sé tinawah-Na. Ni séra sé tinawah-Na, ni séra kangkasii sé niéndo-Na ulit. Sé niéndo-Na ulit, ni séra itiimo sé sigi'en wo loozen-Na.

U raraatéan ni Opo Empung wia ni kita

³¹ Niitumo, apa un ikuatama tumoro niana péléng? Sa si Opo Empung kimaria ni kita, séi si sumaru ni kita?

³² Si Opo Empung én zéi'kan sume'sel si Oki'-Na in esa taan si Oki'-Na itii é méiwéhé-Na wia ni kita péléng, kura kahuman ni Sia zéi'kan tumambéré péléng am péléng wia ni kita karia ni Oki'-Na itii?

³³ Séi si wuaya i mapahsasala' sé tou sé pinéléng ni Opo Empung? Apa si Opo Empung, si niméndo ulit ni séra? Séi si mamukum ni séra?

³⁴ Si Kristus Yesus si nimaté wo méitou sumaup im wia sé nimaté an irumez witu ung kakan ni Opo Empung, si Kristus itiimo si masumawang ni kita i mamengaléi wia si Opo Empung.

³⁵ Wéhan wé un toro tuma'sa ni kita im witu u raraatéan ni Kristus? Apa an zézéha, kaapa ang kasusaan, kaapa ang kapendisan, kaapa ang kaahreman, kaapa un zéi'kan siapa karaien, kaapa a makaindé'en, kaapa im wunu'en? Péléng niana én zéi'kan mamuali in tuma'sa ni kita im witu u raraatéan ni Kristus.

³⁶ Tanu u méipantik witu um Pinantik Lenas, “Pahpaan ni Ko, sekez in endo ni kai makalakez nimasaruan karia um patéan. Ni kai én tanumokan sé domba sé mamokerizen.”

³⁷ Taan wana péléng am péléng, ni kita é lumouspé'mé sé tou nimuntung, pahpaan si Kristus é rumaraaté ni kita.

³⁸ Pahpaan totoz kata'uangku zozo' i nimaté kaapa i menou-nou, sé malaekat kaapa sé mahkawasa wana ang karimbengbengan, u mahmuali in tarékan kaapa u mamuali im woo sawisa,

³⁹ kaapa sé mahkawasa witi langit kaapa sé wia ung kaayahan, kaapa apa uman niitu, zéi'kan siapa sé makawawa tuma'sa ni kita im witu u raraatéan ni Opo Empung, tanu u méipapailek-Na wia si Kristus Yesus, si Mahpiarata.