Roma 6 - Taaz Weru Witu u Nunuwu'en Tombulu

Kumana'la i mahsingkéla'

¹ Sa téntu, apa un ikuatama? Toro wé ni kita i memua-muali a singkéla', wo kalousna ung kamang tatambér ni Opo Empung itii?

² Zéi'kan! A singkéla' én zéi'mo kimawasa wia ni kita, kaa kahuman kita memua-mualipé' a singkéla'?

³ Zéi'kan kata'uan niou wé i ni kita péléng sé sinaranimo nimaesa karia ni Kristus Yesus, ni kita ém pinaesamo karia um patéan-Na?

⁴ Karia in téntu, ni kita é méilewengo karia-Na pahpaan i sinarani, wo tanu si Kristus i méitou sumaup ni Ama' im wia sé nimaté pahpaan ung kawangko'an ni Opo Empung, ni kita kangkasii é menou-nou witu ung katou-touan weru.

⁵ Sa kita nimaesamo karia ni Yesus Kristus i ni Sia nimaté, ni kita kangkasii é nimaesamo karia-Na i ni Sia méitou sumaup ni Opo Empung im wia sé nimaté.

⁶ Kata'uanta sa ung katou-touanta im puuna é sinalipo pinahwali-wali karia ni Kristus, wo ni kita zéi'mo kinawasa ung kinanaram i mahsingkéla', wo ni kita zéi'kan pahata-atan a singkéla'.

⁷ Pahpaan tanu si tou sa nimatémo, ni sia én zéi'mo kinawasa u singkéla'.

⁸ Niitumo, pahpaan ni kita nimatémo karia ni Kristus, pa'émanenta i ni kita é menou-nou karia-Na.

⁹ Pahpaan kata'uantamo i si Kristus méitoumomé sumaup ni Opo Empung im wia sé nimaté, ni Sia én zéi'mo maté sumaup wo um patéan én zéi'mo kimawasa wia ni Sia.

¹⁰ Ni Sia nimaté ing kumala ung kawasa a singkéla', niitu é makasa uman makaz ing kauré-uré. Wo ung katou-touan-Na in tarékan ém wia si Opo Empung.

¹¹ Ni kamu kangkasii é léwo'zéi' mahgenangla i ni kamu é nimatémo wana a singkéla', taan ung katou-touan niou ém wia uman si Opo Empung mengiité si Kristus Yesus.

¹² Niitumo, tia' a singkéla' éng kimawasa witu un awak niou u maté, wo ni kamu én tia'mo mahtali-talinga u lelo léwo' un awak.

¹³ Tia' un awak niou iwéhé ing kawasaan a singkéla' i mangun a léwo'an. Taan iwéhéla un tou niou wia si Opo Empung, tanu si tou im puuna nimatémo wo in tarékan é nimakaileko ung katou-touan weru, wo iwéhémola un awak niou i mahwangun um paaz ni Opo Empung.

¹⁴ A singkéla' én zéi'mo kumawasa ni kamu, pahpaan ung katou-touan niou én zéi'mo pahata-atan un ukum Torat, taan méipilotomé pahpaan ung kamang tatambér ni Opo Empung.

Ata i mangun ang kapaaz ni Opo Empung

¹⁵ Kura in tarékan? Toro wé kita mahsingkéla' pahpaan in zéi'mo pahata-atan un ukum Torat taan ung katou-touanta ém witumo ung kamang tatambér ni Opo Empung? Zéi'kan téntu!

¹⁶ Zéi'kan kata'uan niou wé, sa kamu méhéla un tou niou wia si tou i mahtali-talinga ni sia, ni kamu é nimaéndomola ata ni tou itii? Téntu kangkasii, zéi'kan kata'uan niou wé, sa kamu simingkéla', ni kamu é nimaéndo ata a singkéla' itii? Niitu u mangun ni kamu makailek um patéan. Sa kamu méhé un tou niou i mahtali-talinga si Opo Empung, ni kamu é niéndo-Na ulit.

¹⁷ Ni aku é mapaayo u makasé wia si Opo Empung! Pahpaan im puuna ni kamu én ata a singkéla', taan in tarékan ni kamu én uli-ulit mahkiit an tutuzu' méiwéhémo wia ni kamu.

¹⁸ Ni kamu é mémoipilot im wana a singkéla' wo nimaéndomo ata ni Opo Empung i mangun ang kaulitan.

¹⁹ Ni aku i mahkuama éng karia u nunuwu'en toro katulapan ung kinanaram im pengungua né tou sekez in endo. Pahpaan ni kamu in tou én zéi'kan enté', niitumo ni kamu ngerez i mahtutulap niitu. Im puuna ni kamu é niméhé péléng un tou niou i maéndo ata im wana ang kasamekan wo a mahsaru si Opo Empung a nimangun ni kamu kalousna i mahsaru ni Sia. In tarékan, ni kamu é léwo'zéi' méhéla péléng un tou niou i maéndo ata im wana ang kaulitan a mangun ni kamu lenasen ni Opo Empung.

²⁰ I ni kamu ata a singkéla', ni kamu én zéi'kan kinawasa ung kaulitan.

²¹ In toro niitu, apa u méikaawesé wia ni kamu? Um pahwangunen niou itii é nimangun uman taréma ni kamu i maizang, péléng niitu é mahwali ni kamu witu um patéan makaz ing kauré-uré.

²² In tarékan, ni kamu é mémoikapilot im wana a singkéla' wo nimaéndomo ata ni Opo Empung. Niitu u nimangun ni kamu nimakailek ung katou-touan u linenas-Na wo ing kamurian mahalimé ung katou-touan makaz ing kauré-uré.

²³ Pahpaan um wawaér i mahsingkéla' ém patéan, taan un tatambér ni Opo Empung éng katou-touan makaz ing kauré-uré pahpaan nimaesa karia ni Kristus Yesus, si Mahpiarata.