Roma 5 - Taaz Weru Witu u Nunuwu'en Tombulu

Sé tou niéndo ulit ni Opo Empung pahpaan si Yesus Kristus

¹ Pahpaan um pa'émanenta, ni kita é niéndo ulit ni Opo Empung. Niitumo ni kita menou-nou witu u mahlé'o-lé'osan karia ni Opo Empung, mengiité si Mahpiarata, si Yesus Kristus.

² Ni kita sé ma'éman ém winéhan u lalan i mé'an ung kamang itambéré ni Opo Empung pahpaan si Yesus Kristus. Ung kamang kenu u nimangun ni kita menou-nou wo mahpaa-paaz pahpaan mahéré'la i makailek u sigi' wo looz ni Opo Empung.

³ Zéi'kan uman niitu, taan taré kita én toro mahpaa-paaz im wana am pengalinta, pahpaan kata'uanta sa am pengalinta itiimo a mangun ni kita ezen,

⁴ wo pahpaan ung kaezenan itii a ni kita makailek ung kaenté'an im wana am pema'wa'en wo pahpaan ung kaenté'an im wana am pema'wa'en itii a ni kita makailek um pahéré'an.

⁵ Wo um pahéré'an én zéi'kan merara un até, pahpaan si Opo Empung timambéré si Roh Lenas wo kita toro mé'an u raraatéan ni Opo Empung.

⁶ I ni kita zéi'kan makawawa i mapapilot un touta in esa im witu un ukuman pahpaan a singkéla', si Kristus nimaté pahpaan ni kita mahsingkéla', witu un oras tinotozo ni Opo Empung.

⁷ Pahpaan zéi'kan meripu' umané si tou im paaz maté i sumawel si tou ulit. Taan wia si tou lé'os uman ém woo wéwéhan si tou paaz maté i sumawel ni sia.

⁸ Taan si Opo Empung é mapailek u raraatéan-Na wia ni kita karia ung kenu: I ni kita mahsingkéla'pé', si Kristus é nimaté pahpaan ni kita.

⁹ In tarékan ni kita é niéndo ulit ni Opo Empung pahpaan un zaha' ni Kristus i nimaté. Niitumo, tantumo ni kita én ipilot-Na im witu un upi' ni Opo Empung.

¹⁰ I ni kita makahkoro'pé' karia ni Opo Empung, a si Oki'-Na nimaté pahpaan ni kita akaz ni kita nimawurian sumaup karia ni Opo Empung. Woopé' kasii in tarékan. Sa kita nimawuriano sumaup karia ni Opo Empung, tantumo ni kita én ipiloté im witu un ukuman wana a singkéla', pahpaan ni Sia é mémoitoumé sumaup ni Opo Empung.

¹¹ Zéi'kan uman niitu! U raraatéan ni Opo Empung mangun ni kita mahpaa-paaz pahpaan si Yesus Kristus Mahpiarata si nimangun ni kita i nimawurian karia ni Opo Empung.

Si Adam wo si Kristus

¹² U singkéla' é nimuntepé wia ung kaayahan pahpaan si tou esa, ni siamo si Adam. Pahpaan u singkéla' a méyé um patéan. Niitumo um patéan é nimelapu-laputola wia péléng sé tou, pahpaan péléng sé tou nimangunola a singkéla'.

¹³ In zéi'kampé' wia un ukum Torat, u singkéla' ém wiamo ung kaayahan. Taan u singkéla' itii zéi'kampé' ipahrékén singkéla' sa zéi'kan siapa un ukum Torat.

¹⁴ Zozo' in téntu, um patéan éng kimawasa rengané witu un oras ni Adam makaz witu un oras ni Musa, téntu kangkasii um patéan éng kimawasa wia sé tou simingkéla' zéi'kan tanu a singkéla' pinahwanguné ni Adam. Si Adam én tumuzu'mé si Kristus si méitaaz ni Opo Empung i méyé in tumondong.

¹⁵ Taan un tatambér ni Opo Empung én zéi'kan masuat karia a singkéla' ni Adam. Pahpaan u singkéla' ni Adam é nimangun sé tou lakez nimaté, taan u lumouspé'mé ung kawangko'na é raraatéan ni Opo Empung wo un tatambér méiwéhé-Na wia sé tou lakez pahpaan si tou esa, ni Siamo si Yesus Kristus.

¹⁶ Un tatambér ni Opo Empung itii én totoz lumouspé'mé u singkéla' ni Adam. Pahpaan u singkéla' winangun ni Adam a méyé un ukuman; taan sé tou lakez sé mahsingkéla' é niéndo ulit witu u sinaru ni Opo Empung pahpaan un tatambér-Na.

¹⁷ Pahpaan si tou esa simingkéla'mo, um patéan éng kimawasamo wia péléng sé tou pahpaan si tou itii. U lumousé um winangun ni tou esa walina, si Yesus Kristus, ni Sia nimangun sé tou nimakailek u raraatéan ni Opo Empung u malake-lakez wo un tatambér-Na makaz ni séra niéndo-Na ulit. Ni séra é mamenou-nou wo mahkawasa makaz ing kauré-uré pahpaan si Yesus Kristus.

¹⁸ Niitumo, pahpaan u singkéla' ni Adam péléng sé tou makailek un ukuman. Téntu kangkasii, pahpaan ung kaulitan winangun ni Yesus Kristus, péléng sé tou niéndo ulit é makailek ung katou-touan.

¹⁹ Pahpaan tanu si tou esa zéi'kan mahtali-talinga, lakez sé tou nimangun a singkéla', téntu kangkasii pahpaan si tou esa mahtali-talinga wia si Opo Empung, lakez sé tou niéndo ulit ni Opo Empung.

²⁰ Si Opo Empung niméhémé un ukum Torat wo kata'uala né tou ing kalakeznamo a singkéla' né tou. Taan zozo' ing kalakezna a singkéla', ung kamang méitambér-Na kangkasii éng kalakezna.

²¹ Niitumo, im puuna sé tou menou-nou kinawasa u singkéla', niitu kangkasii u nimahwali ni kita witu um patéan. Téntu kangkasii, pahpaan ung kamang méitambér ni Opo Empung éng kimawasa wia ni kita, ni kita é niéndo ulit i makailek ung katou-touan makaz ing kauré-uré, pahpaan si Yesus Kristus Mahpiarata.