Roma 3 - Taaz Weru Witu u Nunuwu'en Tombulu

Si Opo Empung mangun a méitaaz-Na

¹ Sa téntu, apa wé un ikaawesé i nimaéndo tou Yahudi wo apa wé um wangun im pahsunaten?

² Im wana péléng am péléng é lakez, un ipahpuu-puuna ém pahpaan sé tou Yahudi itiimo sé tinarawésaan u Nuwu' ni Opo Empung.

³ Niitumo, kura sa im wia ni séra ém wéwéhan sé zéi'mo ma'éman si Opo Empung? Sa téntu, apa niitumo u mangun si Opo Empung maliuz a méitaaz-Na?

⁴ Zéi'kan! Si Opo Empung é mangun péléng a méitaaz-Na zozo' péléng sé tou én tantowo. Pahpaan witu um Pinantik Lenas é méipantik: “Péléng a Nuwu'-Mu é mémoikatuzu'mé in ulit, wo sa ni Ko im pahtotozen ulit kaapa zéi'kan am pahwangunen, ni Ko é nimuntung.”

⁵ Taan sa karia an zéi'kan ulit am pahwangunenta éng kalousna ni kita i mahilek ung kaulitan ni Opo Empung, apa un ikuata? Mahsanaweka wé si Opo Empung sa mapaileké un upi'-Na? Ni aku ing kimuama téntu mengiit ung genangku in tou uman.

⁶ Zéi'kan téntu! Pahpaan sa Sia mahsanaweka, kura Sia in tumotoz ulit kaapa zéi'kan am pinahwanguné né tou wia ung kaayahan?

⁷ Taan sa pahpaan un zéi'kan ulit um wia ni aku éng kalousna im pahileken ung kaulitan ni Opo Empung makaz ni Sia ém pahloozen wo pahsigi'en, kaa aku totozempé' ulit kaapa zéi'kan wana am pahwangunengku in tou mahsingkéla'?

⁸ Kaa kita zéi'kan kumua, “Mémo kita mangun un zéi'kan wangun wo ikatuzu'mé um wangun?” Wéwéhan sé tou mahwuwuul u ngaranku i ni aku mahkua un téntu. Sé tou téntu ém wangun i makailek un ukuman ni Opo Empung.

Péléng sé tou é simingkéla'

⁹ Niitumo, apa ni kita in tou Yahudi é lumé'ospé'mé sé tou zéi'kan Yahudi? Zéi'kan! Pahpaan ing kataré é méikuatamoma im péléng sé tou Yahudi wo péléng sé tou zéi'kan Yahudi éng kinawasa a singkéla'.

¹⁰ Tanu u méipantik witu um Pinantik Lenas in téntii: “Zéi'kan siapa zozo' in esa si tou ulit.

¹¹ Zéi'kan siapa zozo' in esa si tou mata'u un ulit. Zéi'kan siapa zozo' in esa si mahtututu' i menéro si Opo Empung.

¹² Péléng sé tou é zou'mo im wia si Opo Empung, ni séra péléng mahwangun an zéi'kan siapa torona, zozo' in esa én zéi'kan siapa si mahwangun a lé'os.

¹³ Pahpaan a nunuwu'en néra é mawuta-wuta a sasalou wo ang kaizangnokané, tanu um wou wuul u nimondolé witu u lelewengan i nimawukama, an ipahkua néra é mawuta-wuta an towo, an ipahkua néra é mawuta-wuta a léwo'an tanumokan u melangu né ulé'.

¹⁴ U sumah néra é mawuta-wuta a sasalou wo am pakahnuwu' néra é mahwangun un até né tou i rumara,

¹⁵ ni séra é rorot i mahwunu' tou.

¹⁶ Wisa uman un angéan néramé é luméwo'mé am witu wo mangun sé tou nimasusa,

¹⁷ ni séra én zéi'kan mata'u ung katou-touan mahlé'o-lé'osan si esa karia né walina,

¹⁸ wo ni séra én zéi'kan siapa indé'na im wia si Opo Empung.”

¹⁹ Kata'uanta péléng a méipantik witu un ukum Torat é méiwéhé wia sé tou sé mahkiit un ukum Torat. Karia in téntu péléng a sumah é mapenes wo péléng sé wia ang kaayahan é maukumen ni Opo Empung.

²⁰ Zéi'kan siapa zozo' in esa si tou niéndo ulit im witu u sinaru ni Opo Empung pahpaan mahwangun un ukum Torat. Taan, pahpaan wéwéhan un ukum Torat, a sé tou mata'ula im wéwéhan a singkéla'.

Um pa'émanen u mangun sé tou niéndo ulit

²¹ Taan in tarékan, si Opo Empung én timuzu'momé u lalan wia sé tou kura in éndon-Na ulit, zéi'kan pahpaan i mahkiit un ukum Torat, taan u lalan kura i maéndo ulit itii é mémoipantik im puuna witu un ukum Torat wo wana am pinantik né nabi,

²² im pélén sé tou ma'éman si Yesus Kristus uman sé niéndo ulit ni Opo Empung. Si Opo Empung nimangun niitu wia péléng sé tou ma'éman pahpaan péléng sé tou é masuat uman.

²³ Pahpaan péléng sé tou é simingkéla'mola wo zéi'mo wangun i makailek u lolooz wo sisigi'an ni Opo Empung.

²⁴ Sé tou é niéndo ulit witu u sinaru ni Opo Empung pahpaan ung kamang tatambér-Na. Wo niitu é méitambér umané pahpaan si Kristus Yesus, si timubus ni kita im witu un ukuman wana a singkéla'.

²⁵ Si Kristus Yesus én tinotozo ni Opo Empung i muka u lalan wo sé tou mawurian sumaup karia ni Opo Empung pahpaan ma'éman un zaha'-Na u méikasaroi i sinalip. Niia un tumuzu'mé i si Opo Empung én zéi'kan mahsanaweka. Ni Sia im puuna én ezen im wana a singkéla' né tou taka-takazan ni Sia zéi'kan nimukum ni séra.

²⁶ In tarékan si Yesus nimaté simawel ni kita, niitumo un tumuzu'mé i si Opo Empung én zéi'kan mahsanaweka. Karia in téntu si Opo Empung mapaileké i ni Sia én ulit wo péléng sé ma'éman wia si Yesus én éndon ulit ni Opo Empung witu u sinaru-Na.

²⁷ Sa téntu, apa un toro ipahloo-loozta? Zéi'kan siapa! Apa pahpaan am pahwangunenta? Zéi'kan! Ni kita én niéndo ulit zéi'kan pahpaan i nimanguno un ukum Torat taan pahpaan um pa'émanenta.

²⁸ Totoz kata'uan nai sa sé tou é niéndo ulit pahpaan um pa'émanen, zéi'kan pahpaan i mahwangun un ukum Torat.

²⁹ Si Opo Empung én zéi'kan uman Opo Empung né tou Yahudi. Ni Sia kangkasii én Opo Empung né tahsasana wanua walina.

³⁰ Si Opo Empung én esa uman. Sé tou Yahudi sé ma'éman si Yesus Kristus wo sé tou zéi'kan Yahudi sé ma'éman si Yesus Kristus é niéndo ulit ni Opo Empung.

³¹ Sa téntu, apa pahpaan um pa'émanen wia si Yesus Kristus wo kita mahzézéi' un ukum Torat? Zéi'kan! Lumouspé'tarémé niitu, ni kita éng kalousna i mahsigi' un ukum Torat.