Roma 16 - Taaz Weru Witu u Nunuwu'en Tombulu

Sigi' kamurian ni Paulus

¹ Ni aku é mapata'uma wia ni kamu im wéwéhan si wéwéné katuari esa pa'émanen si mahpaayang wia sé jamaat witi Kengkrea, makangaran Febe.

² Sungkulen nioula sia pahpaan i nimaesa karia ni Mahpiara, tanu um pahwangunen né tou ni Opo Empung. Wo sawangala sia sa wéwéhan am pemandungenna, pahpaan lakezo sé sinawanganna, kariamo ni aku.

³ Ipapaayopé'la u sigi'ku wia si Priskila wo wia si Akwila sé kakariaku i mahpaayang wia si Kristus Yesus.

⁴ Ni séra én tawi maté i mahsawang ni aku. Zéi'kan ni aku uman si kumuama u makasé wia ni séra taan karia péléng sé sanahréréwok jamaat zéi'kan tou Yahudi kangkasii éng kumuama u makasé wia ni séra.

⁵ U sigi'ku wia sé jamaat witi walé néra. U sigi'ku wia si Epenetus, si katuari esa pa'émanen ikararaatéku. Ni sia si kataré-taré nima'éman wia si Kristus im witi tana' Asia.

⁶ U sigi'ku wia si Maria si totozo nima'ulitla i mahpaayang karia niou.

⁷ U sigi'ku wia si Andronikus wo si Yunias sé kawanuaku, sé im puuna ém binui kariaku. Ni séra ém pahsigi-sigi'en im wia sé aatu ni Kristus. Ni séra sé puuna ma'éman si Kristus taan ni aku.

⁸ U sigi'ku wia si Ampliatus si ikararaatéku, si esa pa'émanen kariaku wia si Mahpiara.

⁹ U sigi'ku wia si Urbanus si kakaria i mahpaayang wia si Kristus. U sigi'ku kangkasii wia si kakariaku si Stakhis, si ikararaatéku.

¹⁰ U sigi'ku wia si Apeles. Méikatuzu'mo ung kaezenanna i ma'éman si Kristus. U sigi'ku wia péléng sé witi walé ni Aristobulus.

¹¹ U sigi'ku wia si Herodion, si kawanuaku wo wia péléng sé witi walé ni Narkisus, sé katuari esa pa'émanen.

¹² U sigi'ku wia si Trifena wo si Trifosa. Ni séra é ma'ulit i mahpaayang wia si Mahpiara. U sigi'ku kangkasii wia si Persis ikararaatéku. Ni sia kangkasii én totozo nima'ulitla i mahpaayang wia si Mahpiara.

¹³ U sigi'ku wia si Rufus, si pinéléng ni Mahpiara si totoz im pahsigi-sigi'en. U sigi'ku kangkasii wia si ina'na si tanumokan in ina'ku.

¹⁴ U sigi'ku wia si Asinkritus, si Flegon, si Hermes, si Patrobas, si Hermas wo sé katuari esa pa'émanen sé mahwali-wali karia néra.

¹⁵ U sigi'ku wia si Filologus, si Yulia, si Nereus wo si wéwéné katuarina, wo si Olimpas, wo wia sé tou ma'éman sé mahwali-wali karia néra.

¹⁶ Mahsigi-sigi'ala karia i mahayoala lengen in tou esa pa'émanen. Péléng sé jamaat ni Kristus kangkasii é mapaayoma u sigi' wia ni kamu.

Um papagenang

¹⁷ Katuari-katuariku, ni aku é sumésama wia ni kamu. Tuméga-tégam im wia sé paaz mangun ni kamu i mahéndo-éndoan wo sé mahléléwo' um pa'émanen niou wo mahtuzu' ni kamu in tia' mahkiit an tutuzu ulit am pinahtata'u niouo. Tia'mo mahkari-karia ni séra!

¹⁸ Pahpaan sé tou téntu én zéi'kan mahpaayang wia si Kristus, si Mahpiarata, taan ni séra é mahpaayang i mahwuwutul uman am pemandungen néra. Karia an eenou wo a nunuwu'en tariis im pahtalingan, ni séra é mahtowo wia sé tou sé zéi'kan siapa kata'uan.

¹⁹ Péléng sé tou én timalingamo i ni kamu é mahkii-kiit um paaz ni Opo Empung. Niitumo, ni aku é mahpaa-paaz in timalingamé tumoro ni kamu. Kapaazku ni kamu én tulap wana am wangun wo weresi im wana a léwo'an.

²⁰ Si Opo Empung si mahwéhémé ung kaluasan witu un até é rengan ing kumemuma si tonaas né sétang wo mangun ni sia ing kawasaan niou. Mengalé-ngaléi uman, ung kamang tatambér ni Yesus, si Mahpiarata é menaté-natér ni kamu!

U sigi' né kakaria ni Paulus

²¹ Si kapaayangku, si Timotius é méhéma u sigi'na. Téntu kangkasii sé kakaria kawanuaku si Lukius, si Yason wo si Sosipater.

²² Ni aku Tertius, si nimantik péléng a méikuamé ni Paulus, méhéma u sigi' witu u ngaran ni Mahpiara, wia ni kamu.

²³ Si Gayus, si niméhé um waléna in ento'angku wo pahréwo-réwokan péléng né jamaat é mapaayoma u sigi' wia ni kamu. Téntu kangkasii si Erastus, si melélé'os an zoit pajak wia um wanua tua'na kenu wo si Kwartus, si katuari esa pa'émanen é mapaayoma u sigi'na wia ni kamu. [

²⁴ Mengalé-ngaléi uman ung kamang tatambér ni Yesus Kristus, si Mahpiarata é menaté-natér ni kamu péléng. Amin.]

Péléng u sigi' wo looz ém wia uman si Opo Empung

²⁵ U sigi' wo looz wia si Opo Empung! Ni Sia ém wéwéhan kawasa i menté' um pa'émanen niou mengiit u Nuwu' Lé'os tumoro si Yesus Kristus u méipahwoka'ku mengiit u méipapailek ni Opo Empung, u rengan ing kataré-taré méikawuni im wia sé tou.

²⁶ In tarékan witu um perénta ni Opo Empung si makaz ing kauré-uré, u méikawunipé' itii é mémoipahwoka' wana a méipantik né nabi wia péléng sé tahsasana wanua i mahkit ni séra i mahtali-talinga wia si Opo Empung si pa'émanen néra.

²⁷ Ni Sia uman si Opo Empung, si totoz tulap. Wia ni Sia uman péléng a looz wo a sigi' mengiité si Yesus Kristus, makaz ing kauré-uré! Amin.