Roma 12 - Taaz Weru Witu u Nunuwu'en Tombulu

Iragésla un tou niou wia si Opo Empung

¹ Niitumo, katuari-katuari, pahpaan ung karipu'an ni Opo Empung wia ni kita, ni aku sumésama wia ni kamu, iragésla un tou niou wia si Opo Empung tanu u raragés menou-nou linenas wo ung kapaaz-Na. Niitumo un uli-ulit raragésmu wia si Opo Empung.

² Ni kamu én tia'mo mahkii-kiit am pahwangunen né tou wia ung kaayahan, taan iwayamola ung genang lé'os niou im werun ni Opo Empung. Karia in téntu ni kamu én toro makatulap ung kapaaz ni Opo Empung: Am wangun, a mahwangun ni Sia mahpaa-paaz wo zéi'kan siapa pahséro'an.

³ Ung kamang tatambér ni Opo Empung é méiwéhémomé wia ni aku. Niitumo ni aku sumésama wia ni kamu: Ni kamu én tia'mo megena-genang lumousé séi un ulitna ni kamu, taan tawimo ni kamu gumenangola lumé'o-lé'os mengiit um pa'émanen niou tanu a méitambér-Namo wia ni kamu si esa wo si esa.

⁴ Pahpaan tanu un awak, lakez am witu un awak itii, taan zéi'kan péléng am witu un awak itii é masuat um paayangen.

⁵ Téntu kangkasii ni kita, zozo' i lakez taan ni kita ém pina'esamo witu un awak esa wia si Kristus wo si esa wo si esa é mahpapandungan.

⁶ Ni kita ém winéhan un tatambér ni Opo Empung nimahwali-walinaan. Un tatambér itii éng kamang tatambér-Na. Sa kita tinambéran un toro mahkua a méikuamé ni Opo Empung in esa, wangunenola niitu mengiit um pa'émanenta.

⁷ Sa un tatambér ni Opo Empung é mahsawang sé tou walina, wangunenola niitu uli-ulit i sumawang sé tou walina; sa un tatambér ni Opo Empung é mahtuzu', wangunenola niitu in uli-ulit mahtuzu'.

⁸ Sa un tatambér ni Opo Empung é mahenté' un até, wangunenola niitu in uli-ulit mahenté' un até né tou walina. Sa un tatambér ni Opo Empung é mahwéhé wia sé tou walina, wangunenola niitu karia i mahpaa-paaz. Sa un tatambér ni Opo Empung é maéndo tonaas, uli-ulit wangunela niitu. Sa un tatambér ni Opo Empung é rumaraaté sé tou walina, wangunela niitu karia i mahpaa-paaz.

A sésésa i mahraa-raatéan

⁹ Sa rumaraaté sé tou walina, tia' mahtowo-towo uman. Ikazi'zisla a léwo'an wo tia' mazéi' mahwangun a lé'os.

¹⁰ Mengalé-ngaléi ni kamu é mahraa-raatéan tanu a mahtuari wo mahpuu-puunala i mahwéhé a sisigi'an.

¹¹ Ma'ulitla i mahpaayang. Ni kamu én tia'mo soo i mahtututu'. Maayangla wia si Mahpiara karia ung kaenté'an u méiwéhémé ni Roh ni Opo Empung si mahkawasa.

¹² Mahpaa-paazola im wana am pahéré'an, meze-ezen im wana am pengalin wo tia' mahkana' i mahmengaléi.

¹³ Sawangala am pemandungen né tou sé linenas ni Opo Empung wo sungkulela karia u mahpaa-paaz sé tou mento' witu um walému.

¹⁴ Mengaléila wia si Opo Empung ing kumamangé sé tou mahzézéha ni kamu. Pekikamangé si Opo Empung séra wo tia' mahaléi wia si Opo Empung i méhé un epa' wia ni séra.

¹⁵ Mahpaa-paazola karia né tou mahpaa-paaz wo mamé'mola karia né tou mahamé'.

¹⁶ Menou-noula i ma'esaan witu ung katou-touan niou. Tia' loozan, taan pasuatela un toumu karia né tou ipahwawa-wawa'. Tia' mahgenangla un toumu én tulapo.

¹⁷ Tia' mahwaér a léwo'an wia sé tou mahwangun a léwo'an wia ni kamu, taan wangunela am pahgenangen i lé'os wia péléng sé tou.

¹⁸ Wia ni kamu, sa toro mahtututu'la i menou-nou mahlé'o-lé'osan karia péléng sé tou.

¹⁹ Katuari-katuari iraraatéku! Ni kamu én tia'mo menutu' i mahwaér wia sé tou nimangunla a léwo'an wia ni kamu. Taan wéhanla témpo si Opo Empung i mapaileké un upi'-Na, pahpaan witu um Pinantik Lenas é méipantik téntii, “Ni Aku uman si toro maér, ni Akumokan si maér,” Nuwu' ni Opo Empung.

²⁰ Taan tanu u méipantik witu um Pinantik Lenas, ni kamu é mangunola an téntii, “Sa si kakoro'mu maharem, wéhanla kakanen sia; sa sia maré'o, wéhanla elepen sia! Karia in téntu, ni kamu é nimangunola ni sia i maizang, tanumokan riméwoka um waha witu un uluna.”

²¹ Ni kamu én tia'mo kinala a léwo'an, taan kalanola a léwo'an karia ung kalé'osan.