Matius 7 - Taaz Weru Witu u Nunuwu'en Tombulu

Tia' mahtotoz ulit kaapa zéi'kan a liné'os né tou

¹ Kuan ni Yesus, “Ni kamu én tia' mahtotoz ulit kaapa zéi'kan a liné'os né tou walina, wo ni kamu zéi'kan totozen ni Opo Empung tanu niitu.

² Pahpaan kuramo ni kamu i mahtotoz a liné'os né tou walina, téntumo si Opo Empung in tumotoz a liné'os niou. Wo kuramo um pakahilek niou wia sé tou walina, téntu kangkasii um pakahilek ni Opo Empung wia ni kamu.

³ Kaa un emu' witu um weren ni katuarimu éng kaile-ilekannu, taan u salawako witu um werenmu én zéi'kan kailekannu?

⁴ Kura ko toro kumua wia si katuarimu, ‘Wia'i, éndongkumokan un emu' witu um werenmu,’ taan ndéén witu um werenmu ém wéwéhan u salawako?

⁵ É tou mahgau-gau lé'os! Éndompé'la u salawako witu um werenmu, wo taré kaile-ilekannu un emu' witu um weren ni katuarimu wo niitu taré éndonnu.

⁶ Tia' mahwéhé u lenas wia si asu én taa si asu itii mézuméha ni kamu. Wo tia' mahwéhé u mutiara wia si wawi én taa niitu maipeléé-léékna uman.”

Mahaléila wia si Opo Empung

⁷ Kuano kasii ni Yesus, “Mahaléila, ni kamu ém wéhan. Menérola, ni kamu é makailek. Tuméngkorla, ni kamu ém wukaan um pepenet.

⁸ Pahpaan séi uman si mahaléi ém wéhan, séi uman si mahpenéro é makailek wo séi uman si mahténgkor ém wukaan pepenet.

⁹ Wéwéhan wé im wia ni kamu si méhé um watu wia si oki'na, sa si oki'na itii mahaléi roti?

¹⁰ Kaapa méhé ulé', sa si oki'na mah- aléi seza'?

¹¹ Niitumo, sa kamu sé léwo' é mata'u mahwéhé am wangun wia sé oki' niou, apapé' kasii si Ama' niou witi kasendukan! Ni Sia é méhé am wangun wia sé tou mahaléi wia ni Sia.

¹² Péléng ang kapaaz niou im wangunené né tou wia ni kamu, téntu kangkasii um wangunen nioula wia ni séra. Nianamo a méipantik witu un ukum Torat wo wana ang kitap am pinantik né nabi.”

Um pepenet pesut

¹³ Ang kuan kasii ni Yesus, “Muntepa kumiita witu um pepenet pesut, pahpaan um pepenet loang wo u lalan lempaz é mangé witi naraka, wo lakez sé tou mahuntep mahkiita witu.

¹⁴ Taan um pepenet i mangé witu ung katou-touan ém pesut wo u lalan mangé witu ém pesut wo toyo' uman sé tou kumiit witu.”

Tumoro an tutuzu' towo

¹⁵ Ang kuan kasii ni Yesus, “Mile-ilek im wia sé nabi towo! Ni séra méyé wia ni kamu é mahwangu-wangun lé'os tanu sé domba, taan ndéén ni séra é masuat wo si serigala meneza' tou.

¹⁶ Ni séra én toro kata'uan niou im wana am wua'na am pahwangunen néra. Toro wé si tou i mupu'mé um wua'na un anggor wana am panga menulah kaapa um wua'na un ara wana an zukut menulah?

¹⁷ Péléng ang kai wangun é méhémé am wua'na wangun, taan ung kai zéi'kan wangun é méhémé am wua'na zéi'kan wangun.

¹⁸ Zéi'kan mamuali ung kai wangun wo am wua'na én zéi'kan wangun, kaapa ang kai zéi'kan wangun wo am wua'na ém wangun.

¹⁹ Péléng ang kai zéi'kan mahwua'mé wangun, niitu ém wanti'en wo ziketan.

²⁰ Niitumo, im wana am wua'na am pahwangunen néra, toro kata'uan niou sa séra ulit nabi kaapa zéi'kan.”

Zéi'kan péléng sé tou maéndo tou ni Opo Empung

²¹ Kuan kasii ni Yesus, “Zéi'kan péléng sé tou sé sekezé é mahtawah ni Aku, ‘Tuang, Tuang!’ é maéndo tou witi Kakolanoan ni Opo Empung. Taan akaz uman sé tou mahwangun ang kapaaz ni Ama'-Ku si witi kasendukan sé maéndo tou-Na.

²² Im witu un endo kaakazan ung kaayahan, lakez sé matumawah ni Aku, ‘Tuang, Tuang, ni kai mahkua a méikua-Mumé karia u ngaran-Mu wo mahwoho sé sétang karia u ngaran-Mu wo ni kai kangkasii mahwangun a makakompo'en karia u ngaran-Mu.’

²³ In toro niitumo ni Aku makaulit ing kumua wia ni séra, ‘Ni Aku én zéi'kan nimahta'u-ta'ula ni kamu! Tumingkasa im witu u sinaru-Ku, ni kamu péléng sé memua-muali a léwo'an!’ ”

Un aandéan tumoro si tou tulap wo si tou lemou

²⁴ Kuano kasii ni Yesus, “Séi sé mahtalinga an ipahkua-Ku kenu wo mahwangun niitu, ni séra é masuat wo si tou tulap si rimendai um walé witu un to'tolan watu.

²⁵ I muzané totoz repet makaz i mahlewuh wo kasii u reges repet tumoromé um walé itii, um walé itii én zéi'kan marewa. Pahpaan um walé itii é méirendai witu un to'tolan watu.

²⁶ Taan péléng sé mahtalinga an ipahkua-Ku kenu wo zéi'kan mahwangun niitu, ni séra é masuat wo si tou lemou si rimendai um walé witu um wawo un eris.

²⁷ I muzané totoz repet makaz i mahlewuh wo kasii u reges repet tumoromé um walé itii, um walé itii é rengan i marewama wo totoz maléwo- léwo'ma.”

Sé tou lakez in timalinga an tutuzu' ni Yesus

²⁸ I simampetoma si Yesus i mahtuzu', sé tou lakez itii é mengusi-ngusingsing in timalingama am pahtuzu'-Na,

²⁹ pahpaan ni Sia i mahtuzu' ni séra éng karia ung kawasa, zéi'kan tanu sé tou tulap un Torat.