Matius 25 - Taaz Weru Witu u Nunuwu'en Tombulu

Un aandéan tumoro sé raraha mapulu'

¹ Kuan ni Yesus, “In toro niitu, ung Kakolanoan ni Opo Empung én tanu sé raraha mapulu' mahali-ali a solo i masumungkul si brédégom.

² Sé lima im wia ni séra é lemou wo sé lima én tulap.

³ Sé raraha lemou itii nimahalimé a solo taan zéi'kan nimahalimé lana un ipahtégam.

⁴ Taan sé raraha tulap nimahalimé a solo wo kasii a lana wana am wotel néra in ipahtégam.

⁵ Pahpaan si brédégom itii urémo én zéi'kan mahééyé, ni séra mahtatando'mo ang katekelanla.

⁶ Im wengi urémo an talingané sé tou mahkérét in téntii, ‘Si brédégom é mahéyémo! Sungkulenola sia!’

⁷ Kaitalingamé niitu, sé raraha mapulu' itii é rengan in timoozé a séra mimekla a solo néra.

⁸ Sé raraha lemou éng kimuala wia sé raraha tulap, ‘Wéhané lana toyo' kai, pahpaan a solo nai én tawimo maté.’

⁹ Taan sé raraha tulap é nimingkot umanla in téntii, ‘Ni kamu én zéi'kan wéhan nai, én taa u lana nai én zéi'mo maawes im wana a solo nai wo wana a solo niou. Tawimo ni kamu mangé wia sé mahwangkér lana wo matumelesé lana witu.’

¹⁰ Taan karegas sé raraha lemou itii i matimeles lana, a mawiamé si brédégom. Sé lima raraha tulap sé nimimeko é nimuntepa kariana witu um pahkawéngan, am penetené um pepenet.

¹¹ A mawiamé sé raraha lemou itii, a séra mahkéréta, ‘Tuang! Tuang! Wukaan ndootuumé kai!’

¹² Taan si brédégom nimingkot umané, ‘Uli-ulit ikuakuma wia ni kamu, zéi'kan kata'uangku sa séi kamu.’ ”

¹³ Ang kuan ni Yesus, “Niitumo, tuméga-tégam, pahpaan zéi'kan kata'uan niou sa sawisa un endo wo un oras niitu i mamuali.”

Un aandéan tumoro sé ata telu

¹⁴ Ang kuan ni Yesus, “Ung Kakolanoan ni Opo Empung én tanu si tou masuméngkot witi wanua zou'ma. Puunala sia i mangé, sia timawahmé sé atana. An itarawésanama wia sé atana itii a sangkumna.

¹⁵ Si ata esa ém winéhannala u limana riwu zoit mas, si esa ém winéhannala un zuana riwu zoit mas wo si ata esa kasii é sana riwu zoit mas, mengiit un toro kawawaan ni esa wo ni esa, a sia suméngkota.

¹⁶ A si ata si nimakailek u limana riwu zoit mas rengan i nimangé. An zoit itii é méilampangnala makaz ing kinaawesané limana riwu zoit mas.

¹⁷ Si ata nimakailek un zuana riwu zoit mas kangkasii nimangunla un téntu. Un zoit wia ni sia éng kinaawesané zuana riwu zoit mas.

¹⁸ Taan si ata si nimakailek u sana riwu zoit mas itii, mangé a makimiar woso witu un tana', an iwuninala witu un zoit ni tuangna.

¹⁹ In urémo, a mawurimé si tuang né ata itii. An tawahennamé sé atana i mahtata'u sa kinura nérala an zoit méitarawésama wia ni séra.

²⁰ A méyé si ata si nimakailek u limana riwu zoit mas, nimahalimé un zoit ung kinaawesanomé limana riwu zoit mas. Ang kuan ni ata itii wia si tuangna, ‘Tuang, u limana riwu zoit mas méitarawésamé ni Tuang wia ni aku, in tarékan éng kinaawesanomé limana riwu zoit mas.’

²¹ Ang kuan ni tuangna wia ni sia, ‘Totoz wangun um winangunmula itii. Ni ko én ata lé'os wo toro pa'émanen. Ni ko én toro pa'émanen i mahpaayang ang kori', niitumo ni ko én tarawésaangku u lumouspé'mé niitu. In tarékan muntepomé wo méyémo i mahpaa-paaz kariaku!’

²² Tumondong niitu, a méyé si ata si nimakailek un zuana riwu zoit mas. Ang kuan ni ata itii wia si tuangna, ‘Tuang, un zuana riwu zoit mas méitarawésamé ni Tuang wia ni aku, ilekené, kinaawesanomé zuana riwu zoit mas.’

²³ Ang kuan ni tuangna itii wia ni sia, ‘Totoz wangun um winangunmu itii. Ni ko én ata lé'os wo mahtali-talinga. Pahpaan ni ko én toro pa'émanen i mahpaayang ang kori', ni ko én tarawésaangku u lumouspé'mé niitu. Niitumo in tarékan, muntepomé wo méyémo i mahpaa-paaz kariaku.’

²⁴ A méyé si ata si nimakailek u sana riwu zoit mas. Ang kuana wia si tuangna, ‘Tuang, kata'uangku sa si Tuang éng ketéh. Si Tuang é mahupu' wana an zéi'kan méikeroz ni Tuang, wo mengéngéndo wana an zéi'kan méitanem ni Tuang.

²⁵ Niitumo, ni aku é maindé' a mailé'oskumé an zoit itii méikiaré witu un tana'. In tarékan, kenumo an zoit ni Tuang.’

²⁶ Ang kuan ni tuangna wia ni sia, ‘Ni ko én ata léwo' wo soo mawendu. Kata'uannumo ndéén sa ni aku é mahupu' wana an zéi'kan méikerozku wo mengéngéndo wana an zéi'kan méitanemku.

²⁷ Niitumo, un ulitna an zoitku itii é léwo'zéi' i méiwéhémula wia sé tou mahlampang an zoit wo ni aku i mawurimé, ni aku é makailek an zoit itii karia a méikaawesé witu.

²⁸ Niitumo, éndonomé un zoit mas itii im wia ni sia wo iwéhéla wia si ata si nimakailek u mapulu'na riwu zoit mas itii.

²⁹ Pahpaan séi si tou wéwéhano, ni sia én awesampé' makaz i malake-lakez. Taan si tou zéi'kan siapa, apa uman um wia ni sia én éndon im wia ni sia.’

³⁰ Wo si ata zéi'kan siapa torona itii, ilombo'moma sia witu ung karimbengbengan totoz rimbengbeng. Im witu ém wéwéhan an amé' makaz am waang éng karékétokan.”

Si Oki' ni Tou in tumotoz a singkéla' né tou

³¹ Ang kuan ni Yesus, “I si Oki' ni Tou méyé karia ung kawangko'an-Na wo péléng sé malaekat é méyé karia-Na, ni Sia é rumumez witu u rurumezan-Na ing Kolano um pahsigi'en wo pahloozen.

³² Péléng sé tahsasana wanua é réwoken witu u sinaru-Na wo patampasen-Na sé tou maéndo zuana réwok, tanu si mahtéiz sé domba in timampas sé domba im wia sé kambing.

³³ Sé domba én iwéhéna witu ung kakan-Na wo sé kambing ém witu ung kawihi-Na.

³⁴ Tumondong niitu, si Kolano éng kumua wia sé tou witu ung kakan-Na in téntii, ‘Méyémo, é kamu sé kinamango ni Ama'-Ku. Muntepomé witu ung Kakolanoan u niimeko wia ni kamu rengané ung kaayahan kenu im winangun.

³⁵ Pahpaan i ni Aku maharem, ni Aku ém winéhan niou kakanen, i ni Aku maré'o, ni Aku winéhan niou elepen. I ni Aku limepuh umané, ni Aku sinungkul niou witi walé niou.

³⁶ I ni Aku zéi'kan kimarai, ni Aku winéhan nioula karaien. I ni Aku saki, ni Aku é maniilek nioué. I ni Aku méiuntep witu um bui, ni Aku é maniilek nioué.’

³⁷ Wo sé tou ulit itii éng kumua in téntii wia ni Sia, ‘Mahpiara ing kawisa ni kai nimilek ni Ko i maharem wo ni Ko ém winéhan nai kakanen, kaapa ni Ko i maré'o am wéhan nai elepen?

³⁸ Wo kawisa kasii kai nimilek ni Ko in tou limepuh umané wo ni Ko é sinungkul nai im wana am walé nai? Kaapa kawisa ni Ko i niilek nai in zéi'kan kimarai a ni Ko wéhan naila karai?

³⁹ Wo kawisa ni Ko i niilek nai i saki kaapa méiuntep bui a maileken naimé?’

⁴⁰ Si Kolano itii é mingkot wia ni séra in téntii, ‘Uli-ulit ikua-Kuma wia ni kamu, péléng am winangun niouola wia si esaané im wia sé katuari-Ku sé totoz roros kenu, niitu ém winangun niouola wia ni Aku.’

⁴¹ Ang kuan-Na wia sé tou witu ung kawihi-Na, ‘Tumingkasa im witu u sinaru-Ku, é kamu sé tou tinoro un epa'! Muntepoma witu un api zéi'kan mahpaté u niimek in iwéhé wia si tonaas né sétang wo sé malaekatna.

⁴² Pahpaan i ni Aku maharem, ni Aku én zéi'kan winéhan niou kakanen, i ni Aku maré'o, ni Aku én zéi'kan winéhan niou elepen.

⁴³ I ni Aku tou limepuh umané, ni Aku én zéi'kan sinungkul niou witi walé niou, i ni Aku zéi'kan kimarai, ni Aku én zéi'kan winéhan nioula karai. I ni Aku saki wo i méiuntep bui, ni Aku én zéi'kan maniilek nioué.’

⁴⁴ Ni séra é mingkot wia ni Sia, ‘Mahpiara, ing kawisa ni kai nimilek ni Ko i maharem, kaapa i maré'o, kaapa in tou limepuh umané, kaapa zéi'kan kimarai, kaapa saki, kaapa witi bui wo ni kai zéi'kan timulung ni Ko?’

⁴⁵ Ni Sia é mingkot wia ni séra, ‘Uli-ulit ikua-Kuma wia ni kamu, péléng an zéi'kan winangun niou wia si esaané im wia sé katuari-Ku sé totoz roros kenu, ni kamu kangkasii én zéi'kan nimangun niitu wia ni Aku.’

⁴⁶ Sé tou kenu én iuntep witi tampa pahukuman makaz ing kauré-uré, taan sé tou ulit én iuntep witu ung katou-touan makaz ing kauré-uré.”