Matius 14 - Taaz Weru Witu u Nunuwu'en Tombulu

Si Yohanes Menanarani winunu'

¹ In toro niitu, si Herodes Antipas si kolano witi Galilea én timalingala a sirita tumoro si Yesus.

² Ang kuana wia sé touna, “Si tou makangaran Yesus itii, ni siamo si Yohanes Menanarani. Ni sia é méitoumomé sumaup ni Opo Empung im wia sé nimaté. Niitumo ni sia ém wéwéhan kawasa i mahwangun a makakompo'en.”

³ Si Herodes é mahgenangla in téntu, pahpaan im puuna si Yohanes é méipekitiona an iuntepna witu um bui. Winangunna téntu pahpaan si Yohanes é siméro'la si Herodes ing kumawéng si Herodias, si mahayo ni Filipus katuarina.

⁴ Si Yohanes nimenau-naupola i siméro'la si Herodes, kuana, “Ni ko én zéi'kan toro kumawéng si Herodias, si mahayo ni katuarimu!”

⁵ Zozo' si Herodes paaz i mahwuwunu' si Yohanes, taan ni sia é maindé' sé tou lakez sé mahgenangla si Yohanes i nabi.

⁶ Taan im witu un endo i lumé'os un endo kinatouan ni Herodes, si raraha ni Herodias é mahmanari witu u sinaru ni Herodes wo né sakéina, a mangun si Herodes totoz mahpaa-paaz.

⁷ Ni- itumo, si Herodes timiwa'la i méhé apa uman um pahaléien ni raraha itii.

⁸ Pahpaan niakerla ni ina'na a sia kumuala wia si Herodes, “Iwéhémé wia ni aku un ulu ni Yohanes Menanarani méizeta' witu um wawo um baki!”

⁹ I si Herodes timalingala um pahaléien ni raraha itii, un aténa é rumara. Taan pahpaan ni sia én timiwa'mola wia si raraha itii witu u sinaru né sakéina, ang kiitannala um pahaléien ni raraha itii.

¹⁰ Iatunama sé touna i mamokolé un ulu ni Yohanes witi bui,

¹¹ am pahalin nératuumé un ulu ni Yohanes méizeta' witu um baki an iwéhéla wia si raraha itii. Éndona ni raraha itii un ulu ni Yohanes an alinama wia si ina'na.

¹² Kumawusa niitu, a méyé sé pahtuzu'en ni Yohanes Menanarani, éndo nérama un awak ni Yohanes a maileweng néramé. A séra makumua u nimamuali itii wia si Yesus.

Si Yesus niméhé ung kakanen wia sé limana riwu tou

¹³ Ing kinatalingaala ni Yesus u nimamuali itii, a Sia mondolé im witu, sumakéma londéi a mangé witi tampa zou'ma im wana am wanua, in tumampas. Taan un angéan ni Yesus éng kinata'uanla né tou lakez, a séra kumiita ung katanaan wana am wanua néra i mahtondonga si Yesus.

¹⁴ I si Yesus timumpamomé im witu u londéi, ileken-Nama sé tou totoz lakez, a mawiamé u raraatéan-Na wia ni séra. A lé'osen-Nala sé tou saki im wia sé tou lakez itii.

¹⁵ Im wengindomo, a méyé sé pahtuzu'en ni Yesus wia ni Sia ang kumua, “Un tampa kenu én zou'mé im wana am wanua wo mawengimo. Iatumoma sé tou kenu i mangé wana am wanua rété wia'i wo séra toro matumelesé ung kanen néra.”

¹⁶ Taan kuan ni Yesus wia ni séra, “Ni séra én zéi'kan mangé wisa, ni kamu sé léwo'zéi' i méhé ung kanen néra.”

¹⁷ A séra mingkotla, “Um wia ni kai in tarékan én akaz uman u roti lima wo seza' zua.”

¹⁸ Ang kuan ni Yesus, “Pahaliné niitu wia ni Aku.”

¹⁹ A sé tou lakez itii pekirumez-Nala wana an zukut. Éndo-Namé u roti lima wo sé seza' zua itii, Sia lumoho'ma witi langit ang kumuama u makasé wia si Opo Empung. Am pemété-météngen-Nama a roti itii an iwéhéma wia sé pahtuzu'en-Na. Am peméténg nérama wia sé tou lakez.

²⁰ Ni séra péléng éng kiman makaz nimawesuh. A réwokené né pahtuzu'en ni Yesus a roti nimateza. Péléng a nimateza é mapulu' wo zuana lo'lo' kumuwu-kuwu.

²¹ Sé kiman ém woo limana riwu tuama, zéi'kampé' méikarékén sé wéwéné wo sé koki'.

Si Yesus limampang witu um wawo un zano

²² Tumondong niitu, si Yesus rengan nimatuma sé pahtuzu'en-Na i sumakéma witu u londéi mapuunama i lumeweta. Karegas niitu, sé tou lakez ém pahatu-Nama i mawuri.

²³ I sé tou lakez itii méipekiwuri-Namoma, a si Yesus mengesama i simosoza witu ung kimeleng i mamengaléi. Im wengimo, si Yesus ém witupé' mengesa-ngesa.

²⁴ Karegas niitu, u londéi sinakéan né pahtuzu'en-Na én zou'momé im witi katanaan. U londéi itii ém pemolé-moléi u sempa', pahpaan u reges totoz repet.

²⁵ Im woo jam katelu i maayah, si Yesus méyé wia ni séra mahlampangé witu um wawo un zano.

²⁶ I sé pahtuzu'en-Na nimileka ni Sia mahlampang witu um wawo un zano, ni séra é mengompo' wo mahkérét pahpaan i maindé', “Mengingindé'!”

²⁷ Taan si Yesus é rengan ing kimuama wia ni séra, “Menesola! Kenu é ni Aku, tia'mo maindé'!”

²⁸ Ang kuan ni Petrus wia ni Sia, “Tuang, sa uli-ulit ni Ko, tawahena ni aku i mangé wia ni Ko lumampang witu um wawo un zano.”

²⁹ Ang kuan ni Yesus wia ni sia, “Méyémo!” A si Petrus tumumpamé im witu u londéi a lumampang witu um wawo un zano mangé wia si Yesus.

³⁰ Taan im pahpendanenala u reges repet é mahtoromé ni sia, a sia maindé' am pahkatenema, ang kumérét, “Tuang, tulungené ni aku!”

³¹ A si Yesus rengan i mayola u lengen-Na an tumioné si Petrus, ang kuan-Na, “É tou zéi'kan tahlous ma'éman, kaa ko mahzua-zua genang?”

³² A séra sumakéla witu u londéi ang kumana'la u reges itii.

³³ Sé tou witu u londéi é mahongkot wo mahsigi' si Yesus, kuan néra, “Ni Ko én uli-ulit Oki' ni Opo Empung.”

Sé tou saki witi Genesaret liné'os ni Yesus

³⁴ I mémoikaayola witi lewet u louz, a séra sumuwa'la witi Genesaret.

³⁵ I si Yesus kinana'uanola né tou witu, a Sia ipahwoka' nérama wana péléng an tampa witi tana' itii. Péléng sé tou saki é méipahwalimé wia ni Sia.

³⁶ Ni séra é mahaléi wia si Yesus in énéané zozo' uman i sumahiza witu u rawisna ung karai tonton-Na. Péléng sé tou simahiza u rawisna ung karai tonton-Na é nimalé'os.