Markus 15 - Taaz Weru Witu u Nunuwu'en Tombulu

Si Yesus witu u sinaru ni Pilatus

¹ In totozpé' woondo, sé tonaas né walian, sé pahtutu'an né tou Yahudi, sé tou tulap un Torat wo sé walina sé méikauntep witu u Mahkama Agama, nimaréwok wo nimaesaan. A si Yesus apusen nérala an ipahwalima i maiayo wia si Pilatus.

² Ikaayola wia si Pilatus, a si Pilatus meligau wia ni Sia, “Ni Ko si Kolano né tou Yahudi?” A si Yesus mingkotla, “Ni ko in esa si kimuamé niitu.”

³ Lakez an totoké ipahkua né tonaas né walian wia ni Sia.

⁴ A si Pilatus lumigau kasiila sumaup wia ni Sia, “Soopé' kasii mingkot Ko? Ilekena! Téntumokan ung kalakez an ipahtoké néra wia ni Ko!”

⁵ Taan si Yesus é memene-menes uman, taka-takazan si Pilatus é mengusi-ngusingsing.

Si Yesus tinotoz im wunu'en

⁶ Sekez i lumé'os um Paskah, si Pilatus é milot si esaané im wia sé binui, mengiit um paaz né tou lakez.

⁷ In toro niitu, wéwéhan si tou makangaran Barabas, si binui karia né tou walina pahpaan ni séra é nimahwunu' tou i mahsaru sé pemerénta Romawi.

⁸ A sé tou lakez méyé wia si Pilatus, mahaléi i miloté si esaané im wia sé binui, tanu um pemamangunenna.

⁹ A si Pilatus meligau wia ni séra, “Apa kapaaz niou in ipilotkuma si kolano né tou Yahudi kenu?”

¹⁰ Kata'uano ni Pilatus i sé tonaas né walian é mahtéutéu si Yesus, niitumo si Yesus é méiayo néra wia ni sia.

¹¹ Taan sé tonaas né walian é mahaker sé tou lakez i mahaléi wia si Pilatus i miloté si Barabas.

¹² A si Pilatus lumigau sumaup wia ni séra, “Sa téntu, apa u léwo'zéi' im wangunengku wia si tou si pahkuan niou ing kolano né tou Yahudi kenu?”

¹³ A séra kumérét kasiima, “Salipenola Sia!”

¹⁴ A si Pilatus meligau sumaup kasii wia ni séra, “Taan apa a léwo'an winangun-Na?” Taan ni séra éng karimezna uman taré i mahkérét, “Salipenola Sia!”

¹⁵ Pahpaan si Pilatus paaz i mangun sé tou lakez itii i mahpaa-paaz, a sia milota si Barabas wia ni séra, taan si Yesus é méipekisaboknama an iayonala i masalipen.

Si Yesus im pahséro'an

¹⁶ Tumondong niitu, a si Yesus ipahwalima né suraro witi lésaz u istana ni gubernur Pilatus. An tawahené péléng sé kasuraro néra i maréwoké witu.

¹⁷ A ni Sia karaian nérala ung karai tonton monong, ni séra mayamla um poporongen um panga rintek menulah am wangunen, an iporong nérala wia ni Sia.

¹⁸ Tumondong niitu, ni séra tanu a mahsigi' ni Sia, kuan néra, “Sigi' wangko', é Kolano né tou Yahudi!”

¹⁹ Ni séra é mahwélwél un ulu ni Yesus karia am wéwélwél wo mahrura' wia ni Sia. A séra kumuruzla tanu a mahsigi' ni Sia.

²⁰ Kumawusa Sia im penéro-néro'an néra, am wuka nérala ung karai tonton monong kinarai-Na, ang karaian nérala sumaup ung karai-Na. A Sia iondol néramé i masalipen.

Si Yesus i sinalip

²¹ In toro niitu a lumangkoi si tou makangaran Simon, tou Kirene, ama' ni Aleksander wo ni Rufus, si witi wanua walina a méyé, taré mahuuntep witu um wanua tua'na. Ni sia én tinutu' nérala i masaan u salip ni Yesus.

²² Ipahwali nérama si Yesus witi tampa makangaran Golgota, ung kalakoana: Tampa an Tengkora'.

²³ Im witu, sé suraro é niméhéla un anggor sinembor mur, taan si Yesus é soo melep.

²⁴ Tumondong niitu a si Yesus salipen nérala, am wéténgen nérala ung karai-Na karia i simawutla lot in tumotoz um wéténg ni esa wo ni esa.

²⁵ Si Yesus é sinalip néra witu un jam kasiou im woondo.

²⁶ Ung kinawalian si Yesus i niukum é méipantik witu um papang u méipaku witu un atas un ulu-Na: “Kolano né tou Yahudi”.

²⁷ Ni séra kasii é simalipla karia-Na sé zua maremu', si esa ém witu ung kakan-Na wo si esa witu ung kawihi-Na. [

²⁸ Karia in téntu, nimalekepola u méipantik witu um Pinantik Lenas, “Ni Sia é maikarékén wia sé tou léwo'.”]

²⁹ Si Yesus ém pahséro'an né tou mahlangkoi witu. Ni séra é mahséro' wia ni Sia karia i mengusi-ngusingsing wo mahkua, “É Ko si kumemu um Walé ni Opo Empung, wo rumendai niitu sumaup witu un teluna endo.

³⁰ Tumumpamomé im witu u salip itii wo tulungela un tou-Mu!”

³¹ Sé tonaas né walian wo sé tou tulap un Torat kangkasii é mahséro' wia ni Sia wo mahkua, “Sé tou walina én tinulung-Na, taan un tou-Na in esa én zéi'kan katulungan-Na!

³² Sa ni Sia é Mesias, si Kolano né tou Israel si méitaaz ni Opo Empung, iwayamola Sia in tumumpamé witu u salip itii, wo kita toro milek wo ma'éman.” Sé zua sinalip karia-Na kangkasii é mahséro' wia ni Sia.

Si Yesus nimaté

³³ Péléng un tana' itii é nimarimbengbenga rengan witu un jam mapulu' wo zua i lolambot makaz witu un jam katelu im wengindo.

³⁴ Wo witu un jam katelu im wengindo, si Yesus kuméréta totoz rimez, “Eloi, Eloi, lama sabakhtani?” Ung kalakoana, “Opo Empung-Ku, Opo Empung-Ku, kaa Aku méitula'u-Mu?”

³⁵ Kaitalingamé niitu, sé woopira tou rimendai witu é mahkua, “Talingané, ni Sia é mahtawah si Elia.”

³⁶ Am wéwéhan si tou esa mereweka in timo'to'ma um wunga karang pahkuan spons witu un anggor esem an itundaknala witu un dondohan, a niitu iwéhénama witu um wiwih ni Yesus karia i mahkua, “Ento'enta wo ilekenta, sa si Elia é méyé i métumumpa ni Sia.”

³⁷ A si Yesus kuméréta totoz rimez, a Sia kalekepala.

³⁸ In toro niitu, u roko' méiapé' witi tampa Totoz Lenas witi Walé ni Opo Empung é nimapahzuama witi atas makaz witi wawa'.

³⁹ I si tonaas né sana atus suraro si rimendai simaru u salip ni Yesus nimileka si Yesus ing kinalekepan én téntu u nimamuali, kuana, “Totoz ulit, si Tou kenu én Oki' ni Opo Empung!”

⁴⁰ Im witu kangkasii ém wéwéhan sé woopira wéwéné sé mengile-ngileké witi zou'ma. Im wia ni séra é si Salome, si Maria tou Magdala wo si Maria ina' ni Yakobus si Tarétumou wo ni Yoses.

⁴¹ Ni séra péléng é sé nimahkii-kiité wo nimahselewiré si Yesus im witipé' Galilea. Wo im witu kasii é lakez sé wéwéné walina sé niméyé witi Yerusalem nimahwalimé karia ni Yesus.

Si Yesus i méileweng

⁴² In toro niitu é mahwengimoma wo un endo itii én endo mahsiwo-siwo i lumé'os un endo Sabat.

⁴³ Si Yusuf, si tou Arimatea, ni sia én esaané im wia sé sana réwok tou né Mahkamah Agama, si pahsigi-sigi'en wo kasii mengento-ngento' ung Kakolanoan ni Opo Empung. Ni sia nimapasuata i masimaru wia si Pilatus i mahaléi un awak ni Yesus i maileweng.

⁴⁴ Si Pilatus é mengompo' in timalingala i si Yesus é nimatémo. An tawahennamé si tonaas né sana atus suraro a lumigau sa ulit si Yesus nimatémo.

⁴⁵ In timalingamé u méiwingkotnamé, an énéala ni Pilatus si Yusuf i maméndo un awak ni Yesus i maileweng.

⁴⁶ Si Yusuf matumelesé u roko' lenan, an itumpanamé un awak ni Yesus im witu u salip, saputenala karia u roko' lenan itii. A maizeta'namé un awak ni Yesus witu u lelewengan u méikiar witu ung kentur watu. An isoro'namé um watu i malot u lelewengan itii.

⁴⁷ In toro niitu, si Maria tou Magdala wo si Maria ina' ni Yoses én totoz nima'uma u linewengan si Yesus.