Markus 14 - Taaz Weru Witu u Nunuwu'en Tombulu

Sé tonaas né walian nimaesaan i munu' si Yesus

¹ Zuana endomokan sé tou Yahudi é lumé'oso un endo mahpésta pahkuan Paskah wo i lumé'os un endo Roti Zéi'kan Rinagian. In toro niitu, sé tonaas né walian wo sé tou tulap un Torat é menéro-néro lalan in tumion si Yesus wo munu' ni Sia karia i mahwuni-wuni.

² Ni séra é nimahkuaala, “Ni Sia én tia'mo pahtitionan witu un endo i mahpésta, én taa sé tou rumikoka'.”

Un ulu ni Yesus winuwu'an u lana mahwou tariis

³ I si Yesus witi Betania, ni Sia é rimumez mahkan witi walé ni Simon si i makasa én tinoro ung kusta. Karegas niitu a méyé si wéwéné esa mahali-ali um wotel pualam am wangunen, un tinahu'an u lana narwastu un totoz mahal. In tinarazola ni wéwéné itii u rawisna um wotel itii, an iwuwu'nala u lana itii witu un ulu ni Yesus.

⁴ Taan sé woopira tou sé mengile-ngilek niitu é maupi' a mahkua si esa im wia sé walina, “Apa un torona i mahtitia' u lana narwastu itii?

⁵ U lana itii én toro iwangkér teluna atus dinar tezaan wo un zoitna én toro iwéhéma wia sé tou zéi'kan siapa apa.” Ang kakoro'an nérala si wéwéné itii.

⁶ Taan kuan ni Yesus wia ni séra, “Iwayamola sia. Kaa sia pahsususan niou? Ni sia é nimangunola um wangun im wia ni Aku.

⁷ Pahpaan sé tou zéi'kan siapa apa sekezé ém witu u liklik niou wo sawisa uman ni kamu paaz, ni kamu én toro sumawang ni séra. Taan ni Aku zéi'kan sekezé é memali-mali karia niou.

⁸ Si wéwéné kenu é nimangunola un toro wangunenna. Un awak-Ku kenu ém winéhannamola lana, un tanumokan ni Aku é niimeknamola i mamoileweng.

⁹ Uli-ulit ikua-Kuma wia ni kamu, wisa uman wia ung kaayahan kenu u mawokaan né tou u Nuwu' Lé'os ni Opo Empung, um winangun ni wéwéné kenu én ikua néra kangkasii ing gumenang ni sia.”

Si Yudas gimenango i mayo si Yesus

¹⁰ A si Yudas Iskariot, si esaané im wia sé mapulu' wo zua pahtuzu'en ni Yesus, mangé wia sé tonaas né walian karia ung genang i mayo si Yesus wia ni séra.

¹¹ Ni séra én totoz mahpaa-paaz in timalingala um pahwawangunen ni Yudas wo timaazla i méhé zoit wia ni sia. Kumawusa niitu, si Yudas é menéro-néro un oras i mayo si Yesus.

Si Yesus kiman karia né pahtuzu'en-Na in endo Paskah

¹² Witu un endo kataré im wana an endo mahpésta Roti Zéi'kan Rinagian, sé tou Yahudi é mahkeriz sé domba Paskah. Witu un endo itii, sé pahtuzu'en ni Yesus é meligau wia ni Sia, “Wisa ung kapaaz-Mu i maimekan nai ung kanan i lumé'os um Paskah?”

¹³ An iatu-Nama sé zua pahtuzu'en-Na karia ing kimuama, “Mangémo witi wanua tua'na. Im wana ni kamu é masungkul karia ni tuama si memasaan un tampayang tinahu'an un zano. Ni kamu éng kumiita ni sia.

¹⁴ Muntepla witu um walé untepanama wo kumuala wia si makawalé in téntii, ‘Si Méster é meligau, wisa un tampa-Ku ing kuman karia né pahtuzu'eng-Ku i lumé'os un endo Paskah?’

¹⁵ Si makawalé itii én tumuzu' wia ni kamu um porés selah witu un atas um walé wo am pemandungen é sana witumo. Witumo u léwo'zéi' in imekan nioula i ni kita lumé'os um Paskah!”

¹⁶ A sé zua pahtuzu'en itii rengan i nimangé witi wanua tua'na. I méikaayomola witu, maileken néra én tanu u méikuama ni Yesus wia ni séra. A séra mimekla i lumé'os um Paskah.

¹⁷ Im wengimo, a si Yesus karia né mapulu' wo zua pahtuzu'en-Na méyé.

¹⁸ Karegas séra rimumez i mahkan witu, kuan ni Yesus, “Uli-ulit ikua-Kuma wia ni kamu, wéwéhan si esaané im wia ni kamu é mayo ni Aku. Si tou itii éng karegas mahkan karia-Ku.”

¹⁹ Kaitalingamé niitu, un até néra é rengan i rumara. A séra mahta'sama i mahkuama wia ni Sia, “Méster, zéi'kan ni aku to?”

²⁰ A si Yesus mingkotla, “Si tou itii é si esaané im wia ni kamu i mapulu' wo zua kenu, ni sia é si simousoua u roti witu um piring esa karia-Ku.

²¹ Si Oki' ni Tou é léwo'zéi' i maté tanu u méipantik witu um Pinantik Lenas tumoro ni Sia. Taan ikaléwo'la si tou nimayo si Oki' ni Tou. Tawimo si tou itii in zéi'kan méitoumé.”

Si Yesus karia né pahtuzu'en-Na limé'os um perjamuan

²² I si Yesus wo sé pahtuzu'en-Na karegas i mahkan, si Yesus méndomé u roti, kumuama u makasé wia si Opo Empung, pemété-météngen-Nala u roti, an ipahwéhé-Nama wia ni séra ang kumua, “Endonoma, ung kenumo un awak-Ku.”

²³ Tumondong niitu a Sia méndomé um pengengelepan un tinahu'an anggor, kumuama u makasé wia si Opo Empung an iwéhé-Nala um pengengelepan itii wia ni séra, a séra péléng melep witu um pengengelepan itii.

²⁴ Ang kuan-Na wia ni séra, “Ung kenumo un zaha'-Ku, u nimenté' um pinataazan ni Opo Empung, un isaroi wia sé tou lakez.

²⁵ Uli-ulit ikua-Kuma wia ni kamu, ni Aku én zéi'mo mahele-elepla un anggor, makaz witu un endo ni Aku i melep un anggor weru witi Kakolanoan ni Opo Empung.”

²⁶ Tumondongla niitu a séra kumantar ung kakantaren lolooz, a séra mangé witi kentur Zaitun.

Si Yesus nimapata'u i si Petrus éng kumélong ni Sia

²⁷ Ang kuan ni Yesus kasii, “Ni kamu péléng én tumula'u ni Aku. Pahpaan witu um pinantik, si Opo Empung éng kimua, ‘Si memimiara sé domba ém wunu'eng-Ku, wo sé domba itii én ikasera.’

²⁸ Taan i ni Aku méitoumomé sumaup, ni Aku é mangé witi Galilea puunala ni kamu.”

²⁹ Ang kuan ni Petrus wia si Yesus, “Zozo' ni séra péléng tumingkasa tumula'uma ni Ko, taan ni aku én zéi'kan masar téntu.”

³⁰ Ang kuan ni Yesus wia ni sia, “Uli-ulit ikua-Kuma wia ni ko, in endo kenu, im wengi kenukan, puunala si laka' kumukuké ing kazua, ni ko é nimakatelumola ing kimélong ni Aku.”

³¹ Taan kaulitna uman taré si Petrus i nimingkotla, “Zozo' aku i maté karia ni Méster, ni aku én zéi'kan kumélong si Méster.” Sé pahtuzu'en walina kangkasii éng kimuala in téntu.

Si Yesus mengaléi witi Getsemani

³² A si Yesus karia né pahtuzu'en-Na ikaayola witi tampa makangaran Getsemani. Ang kuan ni Yesus wia ni séra, “Rumumezola wia'i karegas ni Aku i mamengaléi.”

³³ An tawahen-Namé si Petrus, si Yakobus wo si Yohanes i mangé karia-Na. In toro niitu, un até-Na én totozo zéha wo zéi'mo katu'tulan.

³⁴ Ang kuan-Na wia ni séra, “Un até-Ku én totozo rumara, kua é matémo um pendanen. Ni kamu é mento'mola wia'i wo tuméga-tégam.”

³⁵ Sia lumampanga oki' ang kumepama witu un tana' a mengaléi, sa tanu an toro ni Sia én zéi'kan mendan un oras in zézéha itii.

³⁶ Kuan-Na, “O Abba, o Ama'-Ku. Kata'uang-Ku, péléng am péléng én toro wangunen ni Ama'. Éndonoma an zézéha kenu im wia ni Aku. Taan tia'mo ikiit um paaz-Ku, taan ikiit umanla um paaz ni Ama'.”

³⁷ Kumawusa niitu, si Yesus mawurimé wia sé pahtuzu'en-Na itii, maileken-Na ni séra é nimatekelo. Ang kuan-Na wia si Simon Petrus, “Simon, ni ko é nimatekel é kuaa? Zéi'kan makawawa ko wé in tumégamla zozo' i sana jam uman?

³⁸ Tuméga-tégam wo mengaléila wo ni kamu zéi'kan ikakiit witu um pema'wa'en. Ulit i si roh ém paaz i mangun a lé'os, taan in tou uman, ni kamu én zéi'kan makawawa.”

³⁹ A si Yesus mangé sumaup mamengaléi tanu u méikua-Namé ing kataré.

⁴⁰ I ni Sia mawurimé sumaup, ileken-Nala sé telu pahtuzu'en-Na é nimatekelo sumaup pahpaan ni séra én totozo mahtetekel. Ni séra im winongké-Nala, zéi'mo kata'uan néra apa un ikua néra wia ni Sia.

⁴¹ A si Yesus mawurimé sumaup wia ni séra ing katelu, ang kumuama wia ni séra, “Timekel wo kimana'pé' kasii kamu? Toromo! Un orasna é méikaayomola. Ilekena, si Oki' ni Tou én iayo wia sé tou mahsingkéla'.

⁴² Rumendaiomé! Méyémo kita mangémo. Ilekna, si tou mayo ni Aku é merétémomé.”

Si Yesus in tinionan

⁴³ I si Yesus karegaspé' mahnuwu', méyé si Yudas, si esaané im wia sé mapulu' wo zua pahtuzu'en-Na, nimahwalimé karia né sana réwok tou sé mahali-ali am pisou wo am wéwélwél. Ni séra é méiatumé né tonaas né walian, né tou tulap un Torat wo né pahtutu'an.

⁴⁴ Puunala niitu, si Yudas éng kimuamo wia ni séra, “Si tou siomengku, ni Siamo Sia. Tionané Sia wo téi-téizan i ni Sia ipahwali niou.”

⁴⁵ I si Yudas méikaayola witu, ni sia é rengan i rimétéla si Yesus ang kuana, “Méster!” A Sia siomennama.

⁴⁶ A si Yesus tionan nérala.

⁴⁷ Si esaané im wia ni séra sé witu sé kimiité si Yesus, simawuté um pisou, am wira'ennama si ata ni Walian Wangko', makaz u luntengna é nimatengkola.

⁴⁸ Ang kuan ni Yesus wia ni séra, “Pahgenangen nioula ni Aku én tou léwo', taka-takazan ni kamu nimahalimé am pisou wo am wéwélwél i métumion ni Aku?

⁴⁹ Sekez in endo ni Aku é mahkari-karia ni kamu i mahtuzu' witi lésaz um Walé ni Opo Empung wo ni Aku én zéi'kan pahtitionan niou. Taan u méipantik witu um Pinantik Lenas é léwo'zéi' malekep.”

⁵⁰ Am péléng sé pahtuzu'en ni Yesus tumula'uma ni Sia an tumingkasa.

⁵¹ In toro niitu, wéwéhan si tarétumou si simaput u roko' lenan, mahkiité si Yesus. Ni sia kangkasii ém pahtitionan néra,

⁵² taan ni séra é méikation umana u roko' pinakéna, iwayanama u roko'na a sia tumingkasa karia in timangkol.

Si Yesus witu u sinaru né Mahkama Agama

⁵³ A si Yesus ipahwali nérama in isaru wia si Walian Wangko'. A makaréwoké sé tonaas né walian, sé pahtutu'an karia né tou tulap un Torat.

⁵⁴ Karegas niitu, si Petrus é mahkiité si Yesus witi zou'ma, mémakaz witu u lésaz um walé ni Walian Wangko'. Im witu ni sia é rimumez kimaria sé menénéiz um walé ni Opo Empung witu i merarang.

⁵⁵ Sé tonaas né walian wo sé tou méikauntep witu u Mahkamah Agama é menéro-néro tou sé toro kumua a niilek wo an tinalinga néra i mapahsasala' si Yesus wo Sia toro ukumen i maté, taan ni séra én zéi'kan méikailekla.

⁵⁶ Lakez sé tou mahnuwu' an towo i mapahsasala' si Yesus, taan péléng an ipahkua néra én zéi'kan nimahéndoan.

⁵⁷ Ing kamurian, sé woopira tou sé mahnuwu' an towo tumoro a niilek wo an tinalinga néra éng kimuala,

⁵⁸ “Tinalinga nai si tou kenu kimuala in téntii, ‘Ni Aku éng kumemu um Walé ni Opo Empung wo witu un teluna endo ni Aku é rumendai um Walé ni Opo Empung walina, un zéi'kan winangun né tou.’ ”

⁵⁹ Taan a méipahkua néra itii si esa wo si esa én zéi'kan nimahéndoan.

⁶⁰ A si Walian Wangko' rumendaila witu un unez um paheruzan a meligau wia si Yesus, “Kaa Ko soo mingkot an ipahtoké né tou wia ni Ko?”

⁶¹ Taan si Yesus é memene-menes uman, ni Sia én zéi'kan nimingkotla apa. A si Walian Wangko' itii lumigau kasiila wia si Yesus, “Apa ni Ko é Mesias, si Oki' ni Opo Empung, Si Pahloozen?”

⁶² A si Yesus mingkotla, “Ni Akumo Sia, wo ni kamu é milek si Oki' ni Tou i rimumez witu ung kakan ni Totoz Mahkawasa wo méyé witu um wawo a ninahak witi langit.”

⁶³ A si Walian Wangko' itii sumangsanga ung kinaraina, ang kumua, “Apapé' un torona kita i menéro tou ing kumua a niilek wo tinalinga tumoro ni Sia?

⁶⁴ Tinalinga niouoma ni Sia i mahséro' wia si Opo Empung. Sa kamu éng kura?” Ni séra péléng maesaan an tumotozla i ni Sia é léwo'zéi' in ukumen maté.

⁶⁵ A sé woopira tou rengan i mahrura' wia si Yesus. Apé'an nérala ung gio-Na, a Sia pahsondo'en néra karia i meligau, “É nabi, pahteterangené séi si mahsondo' ni Ko!” Wo sé menénéiz kangkasii é mahsondo' ni Sia.

Si Petrus ing kimélong si Yesus

⁶⁶ In toro niitu, si Petrus ém witipé' wawa' witi lésaz um walé ni Walian Wangko', a méyé wia ni sia si ata wéwéné ni Walian Wangko'.

⁶⁷ I niileknama si Petrus merarang, na'u-na'uannala lé'os ung gio ni Petrus ang kuana, “Ni ko kangkasii sekezé é memali-mali karia ni Yesus si tou Nazaret itii.”

⁶⁸ Taan si Petrus é mahkélong uman, kuana, “Zéi'kan kata'uangku wo zéi'kan katulapangku ung kalakoan un ipahkuamu.” A si Petrus mangé witi loloangan um walé ni Walian Wangko'. [In toro niitu, kumukuké si laka'].

⁶⁹ I si Petrus niilek ni ata itii, ang kuanamo kasii wia sé tou witu, “Si tou kenu én esaané im wia ni séra.”

⁷⁰ Taan si Petrus kasii éng kimélong umanla. Zéi'kan uré, sé tou witu é mahkua kasii wia si Petrus, “Ulito, ni ko én esaané im wia ni séra, pahpaan ni ko én tou Galilea!”

⁷¹ A si Petrus rengan i mahsalou wo mahtiwa', “Zéi'kan kata'uangku si tou pahkua nioué itii!”

⁷² In toro niitukan ang kumukuké ing kazua si laka'. Ang kagenangala ni Petrus u méikua ni Yesus wia ni sia, “Puunala si laka' kumukuké ing kazua, ni ko é makatelumo ing kimélongla ni Aku.” A si Petrus mamamé' karia i sindekokan.