Markus 10 - Taaz Weru Witu u Nunuwu'en Tombulu

Tumoro un tuma'sa

¹ A si Yesus mangé witi tana' Yudea wo witi tana' leweta u so'so'an Yordan. Sé tou lakez kasii méyé rimimbung limiklik ni Sia. Wo tanu ung kanaramen, ni Sia é mahtuzu' ni séra.

² A sé woopira tou wia sé sana réwok tou Farisi méyé i mema'wa' si Yesus. Ni séra meligau wia ni Sia, “Mengiit an tinotoz witu um pa'émanenta, toro wé si tuama kimawéngo in tuma'sa si mahayona?”

³ A mingkotla si Yesus wia ni séra, “Apa u méiperénta ni Musa wia ni kamu?”

⁴ Ang kuan néra, “Niénéan ni Musa si tuama in tuma'sa si mahayona karia i mangunla um pinantik in tima'samo.”

⁵ Ang kuan ni Yesus wia ni séra, “Pahpaan ung kaketéhan un até niou, a si Musa mantikla um perénta kenu wia ni kamu.

⁶ Pahpaan rengané ung kaayahan kenu im winangun, si Opo Empung é nimangun ni séra in tuama wo wéwéné,

⁷ niitumo si tuama én tumula'u si ama' wo si ina'na wo mahwali-wali karia ni mahayona,

⁸ wo séra zua é maesa. Téntumo ni séra én zéi'mo zua, taan nimaesamola.

⁹ Niitumo, sé pinahwali-walimo ni Opo Empung én zéi'kan toro wo pata'san né tou.”

¹⁰ I si Yesus karia né pahtuzu'en-Na méikaayomola witu um walé, sé pahtuzu'en-Na meligau wia ni Sia tumoro un tutuzu'-Na itii.

¹¹ A si Yesus kumuala wia ni séra, “Séi uman si tuma'sala si mahayona wo kumawéngla sumaup karia ni wéwéné walina, ni sia é simamek im wia si mahayona kataré.

¹² Téntu kangkasii si wéwéné tuma'sala si mahayona ang kumawéng karia ni tuama walina, ni sia é simamek.”

Si Yesus kimamang sé koki'

¹³ A sé tou mahwalimé sé koki' wia si Yesus wo séra toro kamangen-Na. Taan sé tou itii éng kinakoro'an umana né pahtuzu'en-Na.

¹⁴ Kaiileka niitu, si Yesus é maupi' ang kumua wia ni séra, “Iwayamola sé koki' itii i méyé wia ni Aku, tia' pahséro'en niou séra. Pahpaan sé tou tanu sé koki' kenumo sé makaanu ung Kakolanoan ni Opo Empung.

¹⁵ Uli-ulit ikua-Kuma wia ni kamu: Séi uman sé zéi'kan sumungkul ung Kakolanoan ni Opo Empung tanu sé koki' kenu, ni sia én zéi'kan ikauntep witu.”

¹⁶ A sé koki' itii rawaken-Namé wo karia i zimeta'la u lengen-Na wia ni séra, a séra kamangen-Nala.

Si tou wa'ilan én totoz susa i muntep witi Kakolanoan ni Opo Empung

¹⁷ I si Yesus mahlampango, a méyé si tou mengara'mé i mémahilekan karia-Na, wo karia ing kimuruzla witu u saru-sarun-Na, si tou itii é meligau, “Méster lé'os, apa u léwo'zéi' wangunengku i makailek ung katou-touan makaz ing kauré-uré?”

¹⁸ A si Yesus mingkotla, “Kaa pahkuanu ni Aku é lé'os? Si Opo Empung uman si lé'os, zéi'kan siapa walina.

¹⁹ Ni ko é mata'umo tumoro um perénta ni Opo Empung: Tia' mahwunu' tou, tia' mahsamek, tia' mahremu', tia' mahtowo i mahkua tumoro a niilek wo an tinalingamu, tia' mahtowo wia si kasuat tou, wo pahsigi'ela si ama'mu wo si ina'mu!”

²⁰ Ang kuan ni tou itii wia si Yesus, “Méster, péléng niana ém pinahkiitkumomé rengan ni aku in tarétumoupé'.”

²¹ Taan si Yesus mileka karia u raraatéan wia si tou itii ang kumuama, “Taan, wéwéhampé' un esa un zéi'kampé' winangunmu. Mangémo, ipakawangkéré péléng an anumu wo ipeméténgla wia sé tou zéi'kan siapa apa, karia in téntu ni ko é makailek a sangkum witi kasendukan. Tumondong niitu, mawurimé wia'i wo kumiitomé ni Aku.”

²² Kaitalingamé u méikuamé itii, ni sia é nimatekura a mangé karia i rumara un até pahpaan ni sia én totoz wa'ilan.

²³ A si Yesus mileka witu u makaliklik-Na wia sé pahtuzu'en-Na ang kumuama wia ni séra, “Totoz susa si tou wa'ilan i muntep witi Kakolanoan ni Opo Empung.”

²⁴ Sé pahtuzu'en-Na é méikanganga in timalingama u méikua-Nama itii. Taan si Yesus kimua kasiima, “É kamu sé oki'-Ku, totoz susa i muntep witi Kakolanoan ni Opo Empung.

²⁵ Si ontapé' si melé'os umana i muntep witu um wosona ung kéténgen, taan si tou wa'ilan i muntep witi Kakolanoan ni Opo Empung.”

²⁶ Kaitalingamé niitu, sé pahtuzu'en-Na én totoz méikanganga a séra mahliligauan, “Sa téntu, séi si toro ipilot im witu un ukuman wana a singkéla'?”

²⁷ Si Yesus mileka wia ni séra, ang kumua, “Im wia sé tou, niitu én zéi'kan mamuali, taan im wia si Opo Empung én zéi'kan téntu. Pahpaan im wia si Opo Empung péléng am péléng én toro mamuali.”

²⁸ Ang kuan ni Petrus wia si Yesus, “Péléng am péléng é méitula'u naimomé wo kumiit ni Ko!”

²⁹ A mingkotla si Yesus, “Uli-ulit ikua-Kuma wia ni kamu: séi uman si pahpaan mahkiit ni Aku wo pahpaan mahtuzu' u Nuwu' Lé'os ni Opo Empung timula'umé um waléna, kaapa sé katuarina tuama kaapa sé katuarina wéwéné, kaapa si ina'na kaapa si ama'na, kaapa sé oki'na kaapa an umana,

³⁰ si tou itii in oras kenukan é makailek sumaup makasana atusé: um walé, sé katuari tuama, sé katuari wéwéné, ina', koki' wo an uma, zozo' karia an zézéha, taan in oras in tumondong ni sia é makailek ung katou-touan makaz ing kauré-uré.

³¹ Taan lakez sé tou sé ipahpuu-puuna én ipahmuri-muri wo sé tou ipahmuri-muri én ipahpuu-puuna.”

Ing katelu si Yesus i nimapata'u um patéan-Na

³² Si Yesus wo sé pahtuzu'en-Na éng karegas mahlampang mangé witi Yerusalem. In toro niitu si Yesus é mahpuuna. Sé pahtuzu'en-Na ém paharétan wo sé tou mahkiité ni Sia é maindé'. Si Yesus tumawahmé sumaup sé mapulu' wo zua pahtuzu'en-Na a Sia rengan i mahkua wia ni séra u mamuali wia ni Sia.

³³ Kuan ni Yesus, “In tarékan ni kita é mangé witi Yerusalem wo im wana si Oki' ni Tou én iayo wia sé tonaas né walian wo sé tou tulap un Torat wo totozen néra im wunu'en. Ni Sia én iayo néra wia sé tou zéi'kan Yahudi

³⁴ i séro'an, rura'an, saluken wo wunu'en. Taan witu un endo katelu, ni Sia é matou sumaup.”

Um pahaléien ni Yakobus wo ni Yohanes

³⁵ A si Yakobus wo si Yohanes, sé oki' ni Zebedeus, rumétéma wia si Yesus ang kumuama, “Méster, sa toro, kiitané am pahaléien nai.”

³⁶ A si Yesus kumuala wia ni séra, “Apa ung kapaaz niou im wanguneng-Ku wia ni kamu?”

³⁷ Ang kuan néra, “Énéané kai i rumumez witu u rurumezan-Nu ing Kolano wo mahperénta, um pahsigi'en wo pahloozen, si esa witu ung kakan wo si esa witu ung kawihi.”

³⁸ Taan kuan ni Yesus wia ni séra, “Zéi'kan kata'uan niou um pahaléien niou. Makawawa wé kamu i mendan an zézéha pendaneng-Ku un tanumokan i melep witu un eelepan u léwo'zéi' in elepeng-Ku wo u sarani u léwo'zéi' ing kailekang-Ku?”

³⁹ A séra mingkotla, “Ni kai é makawawa!” A si Yesus kumuala wia ni séra, “Totoz ulit, ni kamu é mamendan an zézéha un tanumokan i melep witu un eelepan u léwo'zéi' in elepeng-Ku wo u sarani u léwo'zéi' ing kailekang-Ku.

⁴⁰ Taan séi si marumumez witu ung kakan wo ung kawihi-Ku én zéi'kan kawasa-Ku in tumotoz niitu. Niitu én iwéhé wia sé tinotozo i marumumez witu.”

⁴¹ In timalingamé niitu, sé mapulu' pahtuzu'en ni Yesus é maupi' wia si Yakobus wo si Yohanes.

⁴² A si Yesus tumawahmé ni séra ang kumua, “Kata'uan niou sé tonaas né tahsasana wanua sé zéi'kan mata'u si Opo Empung é mahzézéha sé tou néra wo sé pahsigi-sigi'en witu é mahwangun kiit um paaz néra wia sé tou néra.

⁴³ Taan ni kamu én zéi'kan tanu ni séra! Séi si paaz i maéndo tou pahsigi'en im wia ni kamu, ni sia é léwo'zéi' i maéndo menenelewir im wia ni kamu.

⁴⁴ Wo séi uman si paaz maéndo kataré im wia ni kamu, ni sia é léwo'zéi' i maéndo ata im wia péléng sé tou.

⁴⁵ Pahpaan si Oki' ni Tou i niméyé én zéi'kan i selewiren, taan ni Sia i niméyé é mésumelewir wo i mayo ung katou-touan-Na in tumubus a singkéla' né tou lakez.”

Si Bartimeus liné'os ni Yesus

⁴⁶ A si Yesus wo sé pahtuzu'en-Na ikaayoma witi Yerikho. I si Yesus karia né pahtuzu'en-Na mahoondolomé im witu karia né tou lakez sé nimahtotondongané karia néra, wéwéhan si tou letok rimumez wo mengangaléi witu u ruruh lalan, makangaran Bartimeus, oki' ni Timeus.

⁴⁷ In tinalinganamé si tou itii é si Yesus tou Nazaret a sia kuméréta, “Yesus, Suzu ni Daud! Iraraaté ndootuumé ni aku!”

⁴⁸ Lakez sé tou mahséro' ni sia wo sia menesla. Taan karimezna uman taré sia i mahkérét, “Suzu ni Daud, iraraaté ndootuumé ni aku!”

⁴⁹ A si Yesus mento'la ang kumuama, “Tawahené sia!” An tawahen néramé si tou letok itii ang kumuama wia ni sia, “Enté'ela un atému wo rumendaiomé, ni ko ém penawahen-Na.”

⁵⁰ An iweritnama ung karai tontonna, a sia rengan i rimendaié a mangé wia si Yesus.

⁵¹ Si Yesus meligau wia ni sia, “Apa ung kapaazmu im wanguneng-Ku wia ni ko?” A mingkotla si tou letok itii, “Méster, ni aku ém paaz in toro milek.”

⁵² Ang kuan ni Yesus wia ni sia, “Mangémo, um pa'émanennu u limé'os ni ko!” In toro niitukan, ni sia én toromo mahilek, a sia kumiit si Yesus witi pahlampangan-Na.