Lukas 5 - Taaz Weru Witu u Nunuwu'en Tombulu

Simon wo sé kakariana kimiit si Yesus

¹ Makasamé si Yesus é rimendai witi tembir u louz Genesaret. Lakez sé tou nimaréwoké mahsésé'sé'an witu rété-Na in tumalinga u nuwu' ni Opo Empung un ituzu'-Na.

² Ileken-Nama u londéi zua witi tembir u louz. Sé melolombo' én timumpamé im witu londéi wo ni séra éng karegaso i mahwo'as u lolombo' néra.

³ A si Yesus sumakéla witu u londéi. U londéi itii anu ni Simon. Ikua-Nala wia si Simon u londéi sinakéan-Na in izou'ma oki' im witu un tembir u louz. Sia rumumezla witu londéi itii a mahtuzu' sé tou lakez.

⁴ I nimakatuzu'mola, ang kuan-Na wia si Simon, “Mangé witu ung karareman wo ilombo'ma u lolombo'mu i méndo seza'.”

⁵ A mingkotla si Simon, “Méster, simanawengi kai ma'ulit i mahpenéro seza' taan ni kai én zéi'kan méikailekla zozo' in esa, taan pahpaan si Méster si nimatu, u lolombo' kenu én ilombo'kukana.”

⁶ I ni séra nimanguna u méiatu-Na, sé seza' kinaéndoan néra én téntu ung kalakez, takazan u lolombo' néra én tawimo marepes.

⁷ A séra kumapéia wia sé melolombo' witu londéi walina i mésumawang ni séra. Ni séra nimeyé a mahwali-wali tumahu' sé seza' witu londéi zua akaz a londéi itii tawimo ikatenem.

⁸ I si Simon Petrus nimilekla u nimamuali itii a sia kumuruzla witu u sinaru ni Yesus ang kuana, “Tuang, itula'umoma aku pahpaan ni aku kenu én tou mahsingkéla'.”

⁹ Pahpaan ni sia wo sé tou witu u londéi i nimilekla sé seza' niéndo néra én totoz lakez, ni séra é mengusi-ngusingsing.

¹⁰ Téntu kangkasii sé kakaria ni Simon, si Yakobus wo si Yohanes, sé oki' ni Zebedeus. Ang kuan ni Yesus wia si Simon, “Tia'mo maindé', rengan in tarékan ni ko é mamenéromo sé tou ing kumiit ni Aku.”

¹¹ Itembir néramé u londéi, an ipakatula'u néramé am pahpaayangen néra ang kumiit si Yesus.

Si tou tinoro ung kusta liné'os ni Yesus

¹² Makasamé, si Yesus ém witi wanua tua'na esa. Im witu ém wéwéhan si tuama un touna é mawuta-wuta ung kusta. I ni sia nimileka si Yesus a sia kumuruzla ung gio makaz witu un tana' karia mahaléi, “Tuang, sa si Tuang paaz, si Tuang én toro lumé'osé ni aku.”

¹³ A si Yesus mayoma u lengen-Na, an tumiona wia si tou itii, ang kuan-Na, “Ni Aku ém paaz, malé'osoma.” In toro niitukan a mazéi'ma ung kusta wia si tou itii.

¹⁴ Si Yesus é siméro'la ni sia i mahkua wia si séi uman a nimamualima itii. A Sia kumua kasii, “Mangémo wia si walian wo papailekla wia ni sia i ni ko é lé'oso wo iwéhéla u raragés tanu u méiperénta ni Musa un tumuzu'mé wia ni séra i ni ko é lé'oso.”

¹⁵ Taan u nuwu' tumoro si Yesus éng kazou'na im pahkawoka'ma, a sé tou lakez mahtotondongané méyé wia ni Sia in tumalinga ni Sia wo lumé'os a saki néra.

¹⁶ A Sia mangé witi tampa zéi'kan siapa tou i mengaléi.

Si tou lailai liné'os ni Yesus

¹⁷ I sana endo, si Yesus mahtuzu' sé tou. Im witu ém wéwéhan sé sana réwok tou Farisi wo sé tou tulap un Torat rimumez mahtalinga ni Sia. Ni séra ém wana péléng am wanua witi Galilea wo Yudea wo Yerusalem a méyé. Ung kawasa ni Opo Empung ém wia ni Sia takaz ni Sia toro lumé'os sé tou saki.

¹⁸ A méyé sé woopira tou memuléngé si tou lailai witu um wuwuléngan, ni séra é mahtututu' i mahwali ni sia witi untep um walé wo zumeta' ni sia witu sinaru ni Yesus.

¹⁹ Taan pahpaan im witu é lakez tou, ni séra zéi'kan mata'u muntep, a sia ipenék nérama witi wawo um walé, ang kumayasla un atep, a sia itonton nérama karia um wuwuléngan witu un unez né tou lakez, witu sinaru ni Yesus.

²⁰ I si Yesus nimilekla um pa'émanen néra wia ni Sia, ang kuan-Na wia si tou itii, “É katuari, a singkéla'mu é niampungano.”

²¹ Timalingamé niitu, sé sana réwok tou Farisi wo sé tou tulap un Torat mahgenang in téntii, “Séi kuaa ndéén si tou mahséro' wia si Opo Empung kenu wé? Séi si tou toro méhé un ampungan wana a singkéla' né tou sa zéi'kan si Opo Empung?”

²² Si Yesus é mata'u ang genang néra, ang kuan-Na wia ni séra, “Kaa téntu ang genang niou?

²³ Wisa u meripu' umané, kumuama, ‘A singkéla'mu é niampungano’, kaapa ing kumuama, ‘Tumoozomé wo lumampangoma’?

²⁴ Taan wo kata'uan nioula im wia ung kaayahan kenu si Oki' ni Tou ém wéwéhan kawasa i méhé ampungan wana a singkéla' né tou.” Ang kuan-Na wia si tou lailai itii, “Ikua-Kuma wia ni ko, rumendaiomé, éndonoma um winuléngané ni ko wo mawurimoma witi walému!”

²⁵ In toro niitukan a sia rumendaié witu u saru-sarun né tou lakez a méndomé um wuwuléngan a mawuri witi waléna karia i meloo-looz si Opo Empung.

²⁶ Péléng sé tou é mengusi-ngusingsing, a mahlooz si Opo Empung wo ni séra én totoz maindé', a mahkua, “In endo kenu ni kai é nimileko un totoz makakompo'en.”

Si Lewi kimiit si Yesus

²⁷ Tumondongla niitu, i si Yesus nimondolé, ileken-Nama si menanagi am pajak makangaran Lewi, makarumez witu um pahpaayanganna. Ang kuan ni Yesus wia ni sia, “Kumiitomé ni Aku!”

²⁸ A rumendaié si Lewi, itula'unamé péléng am pahpaayangenna ang kumiit ni Sia.

²⁹ Tumondong niitu, a si Lewi mangunla um pésta selah witi waléna, pahpaan si Yesus. Lakez sé menanagi am pajak wo sé tou walina kiman mahwali-wali karia ni Yesus.

³⁰ Sé sana réwok tou Farisi wo sé tou tulap un Torat é mema'o-ma'os wia sé pahtuzu'en ni Yesus, a mahkua, “Kaa kamu mahkan wo mahelep karia né menanagi am pajak wo né tou mahsingkéla'?”

³¹ A séra wingkotela ni Yesus, “Zéi'kan sé tou zéi'kan saki sé memandung si dokter, taan sé tou saki.

³² Ni Aku i niméyé én zéi'kan métumawah sé tou ulit taan métumawah sé tou mahsingkéla', wo séra tumula'ula a siningkéla' néra.”

Sawisa i mahpuasa

³³ Ang kuano kasii né sana réwok tou Farisi wia si Yesus, “Sé pahtuzu'en ni Yohanes sekezé é mahpuasa wo mahmengaléi, téntu kangkasii sé pahtuzu'en nai, taan sé pahtuzu'en-Nu sekezé é mahkan wo mahelep.”

³⁴ A séra wingkotela ni Yesus, “Sa si brédégom ém witipé' pahpéstaan karia né kakariana, toro wé sé kakariana i mahpuasa?

³⁵ Taan un orasna é méyé, si brédégom in éndon im wia ni séra, in toro niitumo ni séra mahpuasa.”

³⁶ Ni Sia kasii éng kimua un aandéan walina wia ni séra, “Zéi'kan siapa tou kumésé'mé witu ung karai weru wo ipapén witu ung karai tu'amo. Sa téntu, ung karai weru itii é maléwo'. Wo u roko kinésé' witu ung karai weru itii én zéi'kan wangun ipapén witu ung karai tu'amo.

³⁷ Téntu kangkasii zéi'kan siapa tou wo tumahu' un anggor weru witu um penanahu'an anggor ung kawal ni binatang am wangunen un urémo, pahpaan sa téntu, um penanahu'an anggor itii é mawenta' wo un anggor itii én ikatia'.

³⁸ Un anggor weru é léwo'zéi' itahu' witu um pahtahu'an anggor werupé'.

³⁹ Wo zéi'kan siapa tou si nimelepo un anggor tu'a wo paazpé' melep un anggor werupé', pahpaan ni sia éng kumua, ‘Un anggor tu'apé' un tariis taan un anggor weru.’ ”