Lukas 23 - Taaz Weru Witu u Nunuwu'en Tombulu

Si Yesus méisaru wia si Pilatus

¹ Am péléng sé mahkiit um paheruzan itii rumendaié a mahwalima si Yesus in isaru wia si Pilatus.

² Im witumo u sinaru ni Pilatus a séra mahtoké tumoro si Yesus, kuan néra, “Si Tou kenu é mahlululu sé tahsasana wanua nai. Pahséro'en-Na sé tou i mahwaér um pajak wia si Kaisar. Ni Sia kasii mahkua i ni Sia é si Kristus, si Kolano.”

³ A si Pilatus meligau wia ni Sia, “Ni Ko si Kolano né tou Yahudi?” A si Yesus mingkotla, “Ni ko in esa si kimuamé niitu.”

⁴ Ang kuan ni Pilatus wia sé tonaas né walian karia né tou lakez witu, “Zozo' in esa én zéi'kan siapa ung kasumalaan niilekku wia si Tou kenu.”

⁵ Taan ni séra éng karimezna uman taré i menutu' karia i mahkua, “Pahenouen-Na sé tou wia un tana' Yudea karia an tutuzu'-Na, rengané witi tana' Galilea wo makaz wia'i.”

Si Yesus méiayo ni Pilatus wia si Herodes

⁶ In timalingamé niitu, a si Pilatus meligau, “Si Tou kenu ndéén én tou Galilea?”

⁷ Ing kinata'uanla ni Pilatus i si Yesus én tou Galilea, un tampa kinawasaan ni Herodes, a Sia pekiwalinama in isaru wia si Herodes, si in toro niitu kangkasii ém witi Yerusalem.

⁸ I nimilekla si Yesus, si Herodes én totoz mahpaa-paaz. Pahpaan urémo sia i menali-nalinga tumoro si Yesus wo paaz i mahilekan karia-Na wo mahéré'la in toro milek kura Sia i mangun u makakompo'en.

⁹ Lakez am peligauenna wia si Yesus taan zozo' in esa én zéi'kan siapa u méiwingkot-Nala.

¹⁰ Karegas niitu sé tonaas né walian wo sé tou tulap un Torat mangé witi puuna karia i ma'ulit mahkua an totoké wia ni Sia.

¹¹ Lumousé niitu si Herodes wo sé surarona é mahséro' wo mahléléong wia ni Sia. Si Herodes éng kimaraila wia si Yesus ung karai tonton totoz wangun, a Sia iwurinama sumaup wia si Pilatus.

¹² Rengané in toro niitu si Herodes wo si Pilatus sé im puuna é makahkoro' woan é mahkaloano.

Si Yesus tinotoz im wunu'en

¹³ A réwokené ni Pilatus sé tonaas né walian, sé tonaas wo sé tou lakez.

¹⁴ Ang kuana wia ni séra, “Méipahwali nioué wia ni aku si Tou kenu wo pahkuan niou si Tou kenu é mahlululu sé tou lakez. Ilekené, witu u sinaru niou ém pahpenérongku ang kasumalaan-Na taan maan in esa én zéi'kan siapa u niilekku a méipahtoké niou wia ni Sia.

¹⁵ Si Herodes kangkasii én zéi'kan nimakaileké ang kasumalaan-Na. Niitumo ni Sia é méiwurimé sumaup ni Herodes wia ni kai. Uli-ulit ikuakuma wia ni kamu, zéi'kan siapa um winangun ni Tou kenu un toro kawalian wo Sia ukumen im wunu'en.

¹⁶ Niitumo, ni Sia é saboken umana wo Sia ipilota.” [

¹⁷ Sekez i lumé'os un endo Paskah né tou Yahudi, si Pilatus é léwo'zéi' i milot si esaané wia sé witi bui.]

¹⁸ Taan sé tou lakez nimaréwok witu é mahkérét, “Wunu'enola Sia wo ipiloté si Barabas wia ni kai!”

¹⁹ Si Barabas ém binui pahpaan mahsaru sé pemerénta witi wanua tua'na wo pahpaan nimunu' tou.

²⁰ Si Pilatus makasapé' i nimuwu'ma rimez wia ni séra pahpaan ni sia ém paaz milot si Yesus.

²¹ Taan ni séra é mahkérét, “Salipenola Sia! Salipenola Sia!”

²² Ang katelu si Pilatus kimua wia ni séra, “Apa a léwo'an winangun ni Tou kenu? Zéi'kan siapa zozo' in esa a sinala' kinailekangku wia ni Sia un toro kawalian wo Sia ukumen i maté. Niitumo ni Sia é saboken umana wo Sia ipilotku.”

²³ Taan ni séra éng karimezna uman i mahkérét karia mahlusu wo menutu' ni Sia i salipen. Ing kamurian um pengéré-ngérét néra éng kinakiitané.

²⁴ A si Pilatus tumotozla ing kiitan um penutu'en néra.

²⁵ Méipilotna si tou binui pahpaan mahsaru sé pemerénta wo nimunu' sé tou méikiit um penutu'en néra, taan si Yesus é méiayona wia ni séra i mualian néra kiit um paaz néra.

Si Yesus i sinalip

²⁶ I si Yesus méipahwali nérama, witi lalan ni séra mahilekan karia ni Simon tou Kirene, si witi wanua walina a méyé, mahuuntep witi wanua tua'na. Ni sia é méipekiento' nérala am pasaanan nérala u salip karia i mahkiita si Yesus.

²⁷ Lakez sé tou mahkiita si Yesus, im wia ni séra lakez sé wéwéné mahamé' ni Sia karia i mahkérét.

²⁸ Si Yesus luméngéma wia ni séra ang kuan-Na, “É kamu wéwéné tou Yerusalem! Ni Aku én tia'mo ipahamé' niou, taan iamé' nioula un tou niou in esa karia né koki' niou.

²⁹ Pahpaan méyé un orasna sé tou ing kumua, ‘Totoz mahpaa-paaz sé wéwéné pesel wo sé zéi'kampé' nimakaoki' wo sé zéi'kampé' pinahsusu-susuala.’

³⁰ In toro niitumo sé tou é mahkua wana ang kentur, ‘Marewamomé wo ikaempisé wia ni kai!’ Wo wana ang kimeleng, ‘Tawunanomé kai!’

³¹ Ni Aku éng kimuama un téntu pahpaan sa im wia ni Aku si zéi'kan nimahwangu-wangunla a singkéla' ni séra é nimangun an téntu, tantumo im wia ni kamu sé mahwangun a singkéla', ni séra é mangun a lumouspé'mé niitu. Ni Aku én tanu ung kai mata'pé' un zéi'kan mala'ung péléng in tutungana, taan ni kamu én tanu ang kai pera u mala'ung péléng in tutungana.”

³² Wéwéhan kasii sé zua tou walina, sé tou léwo' méipahwali i maukumen wunu'en karia-Na.

³³ I ni séra méikaayola witi tampa makangaran Tengkora', si Yesus méisalip néra witu karia né zua tou léwo' itii, si esa ém witu ung kakan-Na wo si esa ém witu ung kawihi-Na.

³⁴ [A si Yesus kumua, “Ama', ampungan ndootuumé séra pahpaan zéi'kan kata'uan néra am pahmualin néra.”] A séra sumawut u lot i mahwéwéténg ung karai-Na.

³⁵ Lakez sé tou rimendai witu nimilek péléng u mahmuali. Taan sé tonaas né tou Yahudi é mahséro' wia ni Sia, kuan néra, “Sé tou walina én tinulung-Na, iwayamola ni Siamokan si tumulungla un tou-Na in esa, sa Sia uli-ulit Mesias si pinéléng ni Opo Empung.”

³⁶ Sé suraro kangkasii é mahké'ké' ni Sia wo niméhé un anggor esem wia ni Sia

³⁷ wo mahkua, “Sa Ko uli-ulit kolano né tou Yahudi, tulungela un tou-Mu in esa!”

³⁸ Witu un atas un ulu-Na kasii ém pinantikan: “Si kenumo si Kolano né tou Yahudi”.

³⁹ Si esa im wia sé tou léwo' sinalip witu mahséro' ni Sia, kuana, “Zéi'kankuaa ni Ko éng Kristus? Tulungela un tou-Mu karia nai!”

⁴⁰ Taan si walina é siméro'la, “Zéi'kan ikaindé'mu wé si Opo Empung, pahpaan ni ko é nimakailek un ukuman masuat karia-Na?

⁴¹ Ni kita ém wangun in ukumen pahpaan ung kenumo um wawaér wana am pemuali-mualinta, taan si Tou kenu én zéi'kan siapa u sinala' zozo' in esa.”

⁴² A sia kumua kasii, “Yesus, genangen ndootuumé ni aku i ni Ko méyé ing Kolano.”

⁴³ A si Yesus mingkotla wia ni sia, “Uli-ulit ikua-Kuma wia ni ko, in endo kenu ni ko é mahwali-wali karia-Ku witi Firdaus.”

Si Yesus nimaté

⁴⁴ In toro niitu im woo jam mapulu' wo zua i lolambot, péléng un tana' itii é nimarimbengbenga makaz witu un jam katelu im wengindo,

⁴⁵ pahpaan si endo én zéi'kan mahsena'. U roko' méiapé' witi tampa Totoz Lenas witi Walé ni Opo Empung é nimapahzuama.

⁴⁶ A si Yesus kumérét totoz rimez, “Ama', ung katou-touang-Ku én iayo-Kuma wia ni Ko.” Makakuama niitu a Sia kalekepala.

⁴⁷ I si tonaas né sana atus suraro nimilek a nimamuali, a sia mahlooz wo mahsigi' si Opo Empung, kuana, “Totoz ulit, si Tou kenu én zéi'kan siapa sinala'!”

⁴⁸ Sé tou lakez sé nimilek u nimamuali itii é nimawuri karia mahpéhos um wezwez pahpaan in totoz mene'sel.

⁴⁹ Péléng sé totoz mata'u si Yesus, méikauntep witu sé wéwéné nimahkiité ni Sia im witi Galilea, rimendai witi zou'ma wo nimilek péléng niitu.

Si Yesus méileweng

⁵⁰ Wéwéhan si makangaran Yusuf, si esaané im wia sé Mahkama Agama. Ni sia én tou mahwangun a lé'os wo an ulit.

⁵¹ Ni sia én tou Arimatea, um wanua né tou Yahudi wo ni sia é ma'ento' ung Kakolanoan ni Opo Empung. Ni sia én zéi'kan esa genang karia un tinotoz wo um pahwangunen né kakariana witi Mahkama Agama itii.

⁵² Ni sia é masimaru wia si Pilatus i mahaléi un awak ni Yesus.

⁵³ Itumpanamé un awak ni Yesus, saputennala karia u roko' lenan, an izeta'nala witu u lelewengan ung kiniaro witi kentur watu. U lelewengan itii én zéi'kampé' pinahlewe-lewengala.

⁵⁴ Un endo itii én endo mahsiwo-siwo wo u Sabat é lelezo.

⁵⁵ Sé wéwéné sé nimahwalimé karia ni Yesus witi Galilea a méyé, ni séra é nimahkiité wo nimilek u lelewengan itii wo kura un awak ni Yesus i méizeta'.

⁵⁶ Mawurima séra a mamimek um pengingisu' wia sé nimatémo wo u lana mahwou tariis in iisu' witu un awak ni Yesus. In endo Sabat, ni séra éng kimana' i mahpaayang pahpaan kumiit an tinotoz witu un ukum Torat.