Kolose 4 - Taaz Weru Witu u Nunuwu'en Tombulu

¹ É kamu in tuang, mapailekla an ulit wo tia' mahtémbo-témbo wia sé ata niou. Gena-genangen, ni kamu in tuang kangkasii ém wéwéhan si tuang im witi kasendukan.

² Tia' mazéi' i mengaléi wia si Opo Empung wo tuméga-tégamla karia i mahkua u makasé wia si Opo Empung.

³ Ipahpengaléipé' kasiimé kai, wo si Opo Empung mukamé lalan wia ni kai i mangé mahwoka', wo kai toro makumua u méikawunipé' tumoro si Kristus. Pahpaano i mahwoka' niitu, ni aku in tarékan ém wiapé' um bui.

⁴ Karia in téntu, ni aku toro mapata'u péléng niitu, tanu u léwo'zéi' in ipapata'uku.

⁵ Ni kamu é léwo'zéi' tulap i menou-nou karia né tou zéi'kan ma'éman wo un témpo ém pahpakéla lumé'o-lé'os.

⁶ I mahnuwu' wia sé tou, pahwangunela um pakahnuwu' niou i makapaazen wo tariis im pahtalingan, wo kata'uan nioula kura i mahwiwingkot wia si séi uman si meligau.

Sigi' kamurian

⁷ Péléng a nimamuali wia ni aku é mamokan ikuala ni Tikhikus wia ni kamu, ni sia éng katuari esa pa'émanen si ikararaatéta, wo kasii ata mahtali-talinga uman wo kapaayang i mahpaayang wia si Mahpiara.

⁸ Ni sia é méiatukuma wia ni kamu wo sia toro kumua wia ni kamu kura ni kai im wia'i wo ni sia kangkasii én toro mahenté'la un até niou.

⁹ Ni sia é mangé karia ni Onesimus, si katuari esa pa'émanen, si esaané im wia ni kamu. Ni sia kasii én tou mahtali-talinga uman wo ni kai é rumaraaté ni sia. Ni séra zua é makumua wia ni kamu péléng a nimamuali wia un tampa nai kenu.

¹⁰ Si Aristarkhus, si binui kariaku é mapaayoma u sigi'na wia ni kamu. Téntu kangkasii si Markus, si oki' né mahtuari wo si Barnabas. (Tumoro ni sia ni kamu é nimakaileko um perénta; sa sia méyé wia ni kamu, sungkulela sia.)

¹¹ Wo si Yesus si pahkuan i Yustus kangkasii é mapaayoma u sigi' wia ni kamu. Im wia sé tou Yahudi sé ma'émano wia si Yesus Mahpiara, ni séra telu uman sé in tarékan mahpaayang kariaku i mahwangun a méiatu ni Opo Empung. Ni séramo sé mahenté' un atéku.

¹² U sigi' ni Epafras wia ni kamu; ni sia én tou esaané wia ni kamu, ata ni Kristus Yesus, ni sia én zéi'kan mazéi' i mahpengaléi ni kamu, wo ni kamu enté' im wana am pa'émanen, in tanu tou lutu'mo wo uli-ulit ma'éman wo mata'u péléng ang kapaaz ni Opo Empung.

¹³ Ni aku in esa é nimileko wo timalingamo i si Epafras nima'ulito nimaayang wia ni kamu wo im wia sé tou witi Laodikia wo sé witi Hierapolis.

¹⁴ Si dokter Lukas si ikararaatéta, wo si Demas kasii é mapaayoma u sigi' wia ni kamu.

¹⁵ Ipapaayopé'la u sigi' nai wia sé katuari esa pa'émanen witi Laodikia; téntu kangkasii wia si Nimfa wo sé jamaat sé meraragés wia si Opo Empung witi waléna.

¹⁶ Wo sa um pinantik kenu ém binacamoma im wia ni kamu, pahtututu'en kangkasiila im bacana wia sé jamaat witi Laodikia. Téntu kangkasii um pinantik méiwéhé wia sé jamaat witi Laodikia én ibaca wia ni kamu.

¹⁷ Wo ikuapé'la wia si Arkhipus: Wéhanla genang, ipakasampetla am paayangen méiwéhémé ni Mahpiara wia ni ko.

¹⁸ Ni aku Paulus kasii é mapaayoma u sigi wia ni kamu. U sigi' kenu ém pinantikku in esa. Gena-genangen, ni aku é rinantépé' im wia um bui! Mengalé-ngaléi uman ung kamang tatambér ni Opo Empung menaté-natér ni kamu.