Kolose 3 - Taaz Weru Witu u Nunuwu'en Tombulu

¹ Niitumo, ni kamu sé méitoumé sumaup karia ni Kristus, mahtututu'la i menéro am witi kasendukan, witi tampa ni Kristus i rimumez witu ung kakan ni Opo Empung.

² Mahgenang umanla am witi kasendukan, wo tia'mo megena-genang am wia ung kaayahan.

³ Pahpaan ung katou-touan niou im puuna u mahkiit uman u lelo léwo' wia ung kaayahan é mémoitula'u nioula, ni kamu én tanu nimatémo. In tarékan ung katou-touan niou én zéi'kan katulapan né tou pahpaan ni kamu é nimaesamo karia ni Kristus, si nimaesa karia ni Opo Empung, witi kasendukan.

⁴ Si Kristus si mahwéhémé ung katou-touan wia ni kita. I ni Sia méyé sumaup wia ung kaayahan, ni Sia ém pa'ileken péléng né tou, ni kamu kangkasii é mapa'ileken né tou wo makailek u sigi' wo u looz karia-Na.

Ung katou-touan weru

⁵ Niitumo, zéi'ela im wia ni kamu péléng am paaz i memangu-mangun an ipahkiit uman um paaz ung kaayahan, tanu a mahsamek, a makati'tiren, a lelo léwo' un awak, am paaz i memangu-mangun a léwo'an wo kasii an angkum an tanumokan i mahongkot wo mahsigi' sé opo-opo.

⁶ Péléng niitu é mahwangun uman si Opo Empung in totoz maupi' wia sé tou soo mahtali-talinga wia ni Sia.

⁷ Im puuna ni kamu kangkasii é menou-nou mahwangun an téntu i ni kamu kinawasapé' am paaz wia ung kaayahan itii.

⁸ Taan in tarékan, itula'umola péléng ang kenu: an upi', a raranguan, a léwo'an, mahtawuruk, wo a sasalou a mahondolé witu u sumah niou.

⁹ Tia' im wia ni kamu, si esa é mahtowo im wia sé walina, pahpaan ni kamu in tarékan én timula'umomé ung katou-touan uré karia am pemangu-mangunenna.

¹⁰ Ni kamu in tarékan é nimakaileko ung katou-touan weru wo zéi'kan mazéi' im pahwerun ni Opo Empung si nimanguné ni kamu wo ni kamu maéndo tanu ni Sia. Karia in téntu ni kamu é mata'u ni Sia makauli-ulit.

¹¹ Niitumo, wia ni kita én zéi'mo siapa si pahkuan tou Yunani kaapa tou Yahudi, tou sinunat kaapa zéi'kan sinunat, tou Barbar kaapa tou Skit, ata kaapa zéi'mo ata, pahpaan si Kristus si ipahpuu-puuna wo péléng sé tou ma'éman é nimaesamo karia-Na.

¹² Pahpaan nimaéndomo tou pinéléng wo ikararaaté wo linenas ni Opo Empung, niitumo ni kamu é mapailekla u raraatéan, ung kalé'osan, u roros até, ung kaeluzan wo ung kaezenan.

¹³ Ni kamu si esa im wia sé walina é maheze-ezenala, wo mahampu-ampungala sa wéwéhan si gimenang léwo' tumoro sé tou walina; tanu si Kristus Mahpiara é niméhémo ampung wia ni kamu, ni kamu kangkasii é mahwangunla tanu niitu.

¹⁴ U lumousé péléng niitu é mahraa-raatéanola, pahpaan karia i mahraa-raatéan um pinaesaan niou é malekep.

¹⁵ Wangunela ung kaluasan witu un até u méiwéhémé ni Kristus mahkawasa wia ni kamu, pahpaan ni kamu én tinawahmo ni Opo Empung i maéndo esa awak. Wo ni kamu é léwo'zéi' i mahkuala u makasé wia ni Sia.

¹⁶ U Nuwu' ni Kristus é léwo'zéi' malake-lakez ing kimawasa witu péléng ung katou-touan niou, taka-takazan karia péléng ung katulapan, ni kamu mahtuzu' wo mahsésésaan si esa wo si esa karia i mahkantar a mazmur wo ang kakantaren lolooz wo ang kakantaren né tou ma'éman, wo mahkua u makasé wia si Opo Empung witu un até niou.

¹⁷ Péléng am pahnuwu'en niou kaapa péléng am pahwangunen niou, péléng niitu ém wangunela mengiit u ngaran ni Yesus Mahpiara, karia i mahkua u makasé wia si Opo Empung, si Ama'ta mengiité si Yesus.

A sésésa wia sé sana awu

¹⁸ É kamu im wéwéné makamahayo, mahtali-talingala wia si mahayomu, téntu ung kapaaz ni Mahpiara.

¹⁹ É kamu in tuama makamahayo, iraraatéla si mahayomu wo tia' ni sia pahléwo-léwo'ennu.

²⁰ É kamu sé koki', mahtali-talingala wia sé tu'a niou wana am péléng, pahpaan niitu ung kapaaz ni Mahpiara.

²¹ É kamu sé ama', tia' mahwangun un até né oki' niou i rumara, én taa séra zéi'mo siapa pahéré'an.

²² É kamu sé ata, mahtali-talingala wia sé tuang niou im wia ung kaayahan im wana péléng am péleng, tia' kamu mapailek i mahtali-talinga witu u sinaru néra uman i mangun ni séra mahpaa-paaz, taan mahtali-talingala wia ni séra karia ung genang lé'os pahpaan i maindé' si Mahpiara.

²³ Apa uman um pahwangunen niou, wangunela niitu uli-ulit im witu un até niou tanu i mahpaayang wia si Mahpiara, zéi'kan mahpaayang wia si tou.

²⁴ Kata'uan niouo i ni kamu é makailek am wangun un iwaéré ni Mahpiara. Kuramo u niimek ni Mahpiara wia sé tou-Na, niitumo un iwéhé wia ni kamu. Pahpaan si tuang pahpaayangan niou é si Kristus in esa.

²⁵ Séi uman si mahwangun ang kasumalaan, ni sia é makailek um wawaér mengiit ung kasumalaanna itii, pahpaan si Mahpiara i méhé un ukuman én zéi'kan mahpélé-péléng.