Kisah Rasul-rasul 3 - Taaz Weru Witu u Nunuwu'en Tombulu

Si tou lailai liné'os ni Petrus

¹ I sana endo witu un jam katelu im wengindo, un oras i mengaléi, si Petrus wo si Yohanes é nimangé witi Walé ni Opo Empung.

² Im witu ém wéwéhan si tuama un a'éna é lailai rengan i nimatoumé, ni sia ém pahwulé-wulénganokan. Sekez in endo ni sia ém pengangaliné witu rété um pepenet um Walé ni Opo Empung um pahkuan Pepenet Wangun. Ni sia im witu é mengangaléi wia sé tou mémuntep witu um Walé ni Opo Empung.

³ I ni sia nimileka si Petrus wo si Yohanes i mahuuntepo witu um Walé ni Opo Empung kumiit um pepenet itii, a sia mahaléi wia ni séra.

⁴ Si Petrus wo si Yohanes nimileka wia ni sia, ang kuan ni Petrus wia ni sia, “Mileké wia ni kai!”

⁵ Si tou itii rengan nimileka wia ni séra karia i mahéré'la im wéwéhan un iwéhé néramé.

⁶ Taan si Petrus éng kimuama, “Ni aku én zéi'kan siapa mas kaapa péra'. Taan apa um wia ni aku iwéhéku wia ni ko: Witu u ngaran ni Yesus Kristus si tou Nazaret itii, rumendaiomé wo lumampangoma!”

⁷ A si Petrus tumiona u lengen kakan ni tou itii a sumawanga ni sia i rumendaié. In toro niitukan a maenté'mé an a'é wo am wukuna an a'é ni tou itii.

⁸ A si tou itii kumonta'mé, melampa-lampang wayaan ung kawurian, a sia kumiita ni séra nimuntepa witu um Walé ni Opo Empung. Ni sia é melampa-lampang karia i mengonta-ngonta' wo kasii mahlooz si Opo Empung.

⁹ Péléng sé tou é mahilek ni sia i mahlampango wo meloo-looz si Opo Empung.

¹⁰ A sia kana'uan nérala i ni sia é si tou mengangaléi witi Pepenet Wangun um Walé ni Opo Empung. Ni séra é mengusi-ngusingsing wo menganga-ngangamokan i nimilekla u nimamuali wia si tou itii.

Si Petrus mahnuwu' witi Loloangan Salomo

¹¹ Si tou lailai woan itii é mengii-ngiit uman si Petrus wo si Yohanes. Pahpaano niitu péléng sé tou sé mengusi-ngusingsingpé' itii mérimimbung wia ni séra telu witi loloangan u makangaran ‘Loloangan Salomo’.

¹² I si Petrus nimileka sé tou lakez itii, a sia kumuala wia ni séra, “É kamu in tou Israel, kaa kamu mengompo' i nimileka un taré mamualima kenu? Kaa kamu mengile-ngileké wia ni kai tanumokan ni kai sé nimangun ni sia in toromo mahlampang pahpaan ung kawasa kaapa pahpaan ni kai sekezé é mahwangun ung kapaaz ni Opo Empung?

¹³ Si Opo Empung si pa'émanen ni Abraham, ni Ishak wo ni Yakub wo kasii si pa'émanen né nimaopota, ni Sia é simigi' wo limoozola si Ata-Na, si Yesus si méikasoo nioula wo méiayo nioula wia si gubernur Pilatus, zozo' si Pilatus in esa timotozola i milot ni Sia.

¹⁴ Ni kamu nimahaléila wia si gubernur i milot si memumunu' tou. Taan ni Sia si Lenas wo Ulit é méikasoo niouola.

¹⁵ Ni Sia si mahwéhémé un uli-ulit katou-touan wia péléng sé tou ém winunu' niouola. Taan ni Sia é méitoumomé sumaup ni Opo Empung im wia sé nimatémo. Ni kaimo sé nimilek a nimamuali itii.

¹⁶ In tarékan, pahpaan si tou kata'uan niou wo pengile-ngileken niou kenu ma'éman witu u ngaran ni Yesus, niitumo u Ngaran itii nimangun ni sia nimaenté'. Wo um pa'émanenna itii u nimangun ni sia nimalé'os witu u sinaru niou péléng.

¹⁷ Katuari-katuari, kata'uangku am winangun niou wo né tonaas niou i nimunu'mola si Yesus ém pahpaan um winangun niou itii én zéi'kan kata'uan niou.

¹⁸ Taan karia in téntu si Opo Empung é limekepola u méikua-Na im puuna mengiité sé nabi, i si Mesias é léwo'zéi' mazézéha.

¹⁹ Niitumo, itula'umola a singkéla' niou wo kumiitola si Opo Empung. Karia in téntu, a singkéla' niou ém pali'en ni Opo Empung.

²⁰ Ni Sia é mangun ni kamu maena'. Wo si Opo Empung kasii é matumé si Yesus, si rengané im puuna én tinotoz-Namo i maéndo Kristus niou.

²¹ Taan in tarékan si Yesus Kristus é léwo'zéi' i mento' witi kasendukan, makaz péléng am péléng ém pinakawerumoma ni Opo Empung. Niitu é mémoikua ni Opo Empung rengané im puuna mengiité sé nabi-Na sé lenas.

²² Zéi'kankuaa si Musa éng kimuamola in téntii, ‘Si Opo Empung é méhé si nabi wia ni kamu wo si nabi itii é méyé im wia sé tahsasana wanua niou, tanu ni Sia i niméhémé ni aku.’ Péléng an ipahkua ni nabi itii wia ni kamu é léwo'zéi' im pahwéhan nioula genang.

²³ Séi si zéi'kan mahwéhé genang im wana an ipahkua ni nabi itii, si tou itii ém patampasen im wia sé tou ni Opo Empung wo mawunu'en.

²⁴ Péléng sé nabi walina kasii, rengané wia si nabi Samuel makaz wia sé nabi timondongé ni sia éng kimuamo kasii a méikuamé ni Opo Empung tumoro u mamuali witu un oras kenu.

²⁵ Ni kamu é makailek a méitaaz ni Opo Empung a méikua-Na mengiité sé nabi-Na. Wo kasii um pinataazan winangun ni Opo Empung karia né nimaopo niou é makailekan niou. Um pinataazan itii ém winangun ni Opo Empung i ni Sia kimua wia si Abraham, ‘Péléng sé tahsasana wanua wia ung kaayahan éng kamangen mengiité si suzumu.’

²⁶ Niitumo, si Opo Empung ing kataré-taré én timoumé sumaup si Ata-Na an iatu-Nama i mangé wia ni kamu, wo ni Sia kumamang ni kamu karia i nimangun ni kamu timula'ula péléng a singkéla' niou, a mawuri sumaup wia si Opo Empung.”