Kisah Rasul-rasul 27 - Taaz Weru Witu u Nunuwu'en Tombulu

Si Paulus nimangé witi Roma

¹ In tinotozola i ni kai é léwo'zéi' suméngkot mangé witi Italia, si Paulus wo sé woopira tou walina sé tinionan é méiayola wia si Yulius, si tonaas né sana atus suraro ni Kaisar.

² Ni kai simakéma londéi tua'na witi Adramitium u mangé wana a susuwaan wana an tembir un tasik witi Asia. A ni kai rengan i suméngkota. Si Aristarkhus si tou Makedonia witi wanua tua'na Tesalonika a méyé éng kimiité ni kai.

³ Masandomé, kai timulima witi Sidon. Si Yulius én totoz lé'os im wia si Paulus wo ni sia é niénéala ni Yulius i mangé mahilekan karia né kakariana wo séra toro méhémé am pemandungen ni Paulus.

⁴ Im witu a ni kai suméngkota sumaup. Taan pahpaan mahsaru u reges, niitumo ni kai mahkiit umana un tembir un tasik Siprus, wo zéi'kan tahlous pahtoroné u reges.

⁵ In timengkolomé un tasik sinaru ung Kilikia wo um Pamfilia, a ni kai ikaayola witi Mira witi tana' Likia.

⁶ Im witu, si Yulius é méikailekla u londéi tua'na um witi Aleksandria a méyé u mahséséngkot mangé witi Italia. Ang kai iéranama witu u londéi tua'na itii.

⁷ Im pirana endomo mahséngkot, u londéi tua'na sinakéan nai én tanu a memitu-mitu uman. Zozo' i nimawendu-wenduma, ni kai é méikaayokana witu rété um wanua tua'na Knidus. Pahpaan u reges totoz repet mahsarumé ni kai, niitumo ni kai nimeruruh-ruruh umana ung katanaan Kreta kimiita un tasik limangkoia un tongkéina Salmone.

⁸ Ni kai én totoz wendu i limangkoié un tongkéina itii. Kumawusa niitu, ni kai méikaayoma witi tampa makangaran Susuwaan Wangun witi rété um wanua tua'na Lasea.

⁹ In toro niitu, ni kai én tahlouso méikauréma. Un oras né tou Yahudi i mahpuasa é limangkoioma wo makaindé'enno i suméngkot pahpaan oraso in zaté. Niitumo si Paulus é nimapagenangla wia ni séra,

¹⁰ “Katuari-katuari, mengiit ung genangku, sa kita meméhé-méhéma i suméngkot, niitu én totoz makaindé'en pahpaan ni kita én tawi uman maikaléwo'. Wo lakez kasii an toro ikaliong im wia ni kita, zéi'kan uman am pahali-alinta wo u londéi tua'na kenu taan ni kita kangkasii én toro maté.”

¹¹ Taan si tonaas né sana atus suraro itii é soo tumalinga si Paulus, ni sia é mahtalinga uman si mengangali u londéi tua'na wo si tonaas u londéi tua'na itii.

¹² Pahapaan u susuwaan itii én zéi'kan wangun im pahsuwaan a londéi tua'na sa oras in zaté, niitumo lakez im wia sé tou witu u londéi tua'na itii ém paaz uman meméhé-méhé i suméngkot maayoma um wanua tua'na Feniks, i mamento' witu in oras in zaté. Um wanua tua'na Feniks é susuwaan witi katanaan Kreta, u makasaru talikuzan timuh wo talikuzan amian.

U reges repet witi tasik

¹³ In toro niitu, u reges timuh én zéi'kan repet. Niitumo, pahgenangen nérala ni séra én toromo suméngkot sumaup tanu ung ginenang néra. An isaké néramé un jangkar a suméngkot meruruhma un tasik ung katanaan Kreta.

¹⁴ Taan zéi'kan uré, an tumumpamé u reges totoz repet um witi katanaan Kreta a méyé. U reges itii ém pahkuan né tou reges ‘Sendangan Amian’.

¹⁵ U reges itii én totoz repet makaz u londéi tua'na nai én zéi'mo makawawa i mahsaru u reges itii. Niitumo, mémokan iwaya naila u londéi tua'na nai in ipahwolé-woléi u sempa'.

¹⁶ A ni kai ikaayuza witi tembir un tasik ung katanaan oki' makangaran Kauda. Im witu, ni kai én totoz wendu i mahwénété u londéi oki' witu u londéi tua'na.

¹⁷ I mémoisakémé witu u londéi tua'na u londéi oki' itii, a rikezan nérala karia un tali u londéi tua'na itii én taa u londéi tua'na itii maléwo'. Pahpaan maindé' ikasundur witu un eris witi Sirtis, an iroros nérala u layar u londéi tua'na, an iwaya nérala u londéi tua'na itii i melembo-lembo mahkiita u reges.

¹⁸ Pahpaan u londéi tua'na sinakéan nai ém wayaan ung kasaruan im pahtoroné u reges totoz repet, niitumo i nimasandomé, a méisaké witu u londéi tua'na itii én ipahtia' néramo.

¹⁹ Witu un endo katelu, am pakakas witu u londéi tua'na itii én ipahtia'mo né mahpaayang witu londéi tua'na itii.

²⁰ Im woopirana endomo ni kai in zéi'kan nimahile-ilekla si endo wo sé tototi'en wo u reges repet én zéi'kan kumana' i mahtoromé ni kai, ing kamurian ni kai én zéi'mo mahéré'la i mamenou-nou.

²¹ Pahpaan woopirana endomo ni séra zéi'kan kiman, a si Paulus rumendaia witu un unez néra ang kumua, “Katuari-katuari, sa kiniitan nioula u méikuaku im witipé' katanaan Kreta in tia'pé' suméngkot, ni kita én zéi'kan nimasusa tanu in tarékan wo timia' am pahali-alinta.

²² Taan in tarékan, zozo' i susamo tanu ang kenu, ni aku é sumésama wia ni kamu wo ni kamu tia' mazéi' i mahéré'. Pahpaan zéi'kan siapa zozo' in esa im wia ni kamu si maté, akaz uman u londéi tua'na kenu u maléwo'.

²³ Pahpaan ing kawengi, si Opo Empung si pahongko-ongkotangku in tou anu-Na é nimatu si malaekat-Na mérimendai witu u rétéku.

²⁴ Si malaekat itii éng kimua wia ni aku in téntii, ‘Paulus, tia'mo maindé'! Ni ko é léwo'zéi' masumaru wia si Kaisar i matotozen um pahéndo-éndoan tumoro ni ko. Wo pahpaan u raraatéan ni Opo Empung wia ni ko, péléng sé tou sé mahwali-wali kariamu wia u londéi tua'na kenu én zéi'kan maté.’

²⁵ Pahpaano niitu katuari-katuari, ni kamu én tia'mo mazéi' i mahéré'! Pahpaan ni aku é ma'éman wia si Opo Empung wo péléng a méikua-Na én uli-ulit mamuali.

²⁶ Taan ni kita é léwo'zéi' i sumuwa'ma u londéi tua'na kenu witu ung katanaan esa.”

²⁷ Witu um wengi kapulu' wo epat, u londéi tua'na sinakéan nai én ipewolé-woléi witi tasik Adria. Taan im woo wengi urémo, sé tou memamaayang witu u londéi tua'na é mahgenangla i ni séra é melelezoma ung katanaan.

²⁸ Niitumo, ni séra rimorosa un tali niapusan um watu i mahtata'u ung karareman un tasik. Ikatuzu'mé, ung karareman un tasik ém woo epatna pulu' méterpé'. I limampangoma oki' u londéi tua'na am pahtata'un nérama sumaup, ung kararemana ém woomokan teluna pulu' méter.

²⁹ Pahapaan i maindé' én taa u londéi tua'na ikarakama am watu witi tasik, ni séra én timumpama un jangkar epat um witi muri u londéi tua'na wo kapaaz néramokan é maendomomé.

³⁰ Taan sé memamaayang witu u londéi tua'na itii éng gimenango in tumingkas. Niitumo ni séra én timumpama u londéi oki' wo mahgau-gau i mahtutumpa um woopira jangkar um witi puuna u londéi tua'na.

³¹ Taan si Paulus éng kimuama wia si tonaas né sana atus suraro karia né surarona, “Sa sé memamaayang wia u londéi tua'na kenu zéi'mo wia'i, ni kamu én ikaléwo'.”

³² A sé suraro rengan ing kimetora un tali méiapus u londéi oki' an iwaya nérama u londéi oki' itii i méikaayuza.

³³ I maayahmo, a séra péléng enouela ni Paulus ing kuman, kuana, “Mapulu' wo epatna endomo ni kamu zéi'kan nimahkakanla pahpaan i mengento-ngento' apa u mamuali.

³⁴ Niitumo pahaléiengku wia ni kamu ing kumanpé'la, wo kamu toro maenté'mé wo zéi'kan maté. Pahpaan zéi'kan siapa si kaliongan um wuuk zozo' in esa im wia ni kamu.”

³⁵ Makakuala niitu, a si Paulus méndomé u roti ang kumua u makasé wia si Opo Empung witu u sinaru néra péléng, am peni'a-ni'aunama u roti itii ang kuman.

³⁶ Kumawusa niitu un até néra péléng é nimaluasa a séra méhé ing kuman.

³⁷ Kalakez nai im witu u londéi tua'na itii én zuana atus pituna pulu' wo enem tou.

³⁸ Im wesuhmo, an itia' nérama witu un tasik péléng ang gandum wana ang kazo wo u londéi tua'na itii maroraka.

U londéi tua'na méikasundur

³⁹ Im woondomo, sé memamaayang witu u londéi tua'na nimileka ung katanaan patar, taan zéi'kan kata'uan néra u ngaran ung katanaan itii. A séra tumotozla i sumuwa' u londéi tua'na witu ung katanaan itii.

⁴⁰ Owaren nérala an tali méiapus an jangkar an iwaya nérama an jangkar itii méikatenema witi tasik. Owaren nérala an tali a méiapus ung kamudi, am pitaren néra kasiila u layar witi puuna wo u reges toro mahwali u londéi tua'na itii mangé witi tembir un tasik.

⁴¹ Taan u londéi tua'na itii é méikasundur umana witu un eris, wo um puunana u londéi tua'na é méikateptepa makaz in zéi'mo mata'u mogé. Wo u murina u londéi tua'na kasii é nimakayasa pahpaan in tinoromé u sempa' selah.

⁴² In toro niitu, sé suraro éng gimenango i munu' sé tou tinionan néra wo zéi'kan siapa zozo' in esa si moyoua in tumingkas.

⁴³ Taan si tonaas né sana atus suraro itii é siméro' ni séra i mangun ang ginenang néra, pahpaan ni sia ém paaz in tumulung si Paulus. Am peréntanama sé tou mata'u mengoyou i mahpuunama ing kumonta'ma witi tasik wo moyoua mangé witi katanaan.

⁴⁴ Wo sé walina é mengiita karia ing kumampéta wana am papang kaapa wana an apa uman an toro kampétan kaapa wana an tezana u londéi tua'na a nimakayasé. Karia in téntu ni séra péléng é méikaayoma witi katanaan karia i menou-nou.