Kisah Rasul-rasul 25 - Taaz Weru Witu u Nunuwu'en Tombulu

Si Paulus witu sinaru ni Gubernur Festus

¹ In teluna endomo si gubernur Festus witi propinsi Kaisarea, a sia mangé witi Yerusalem.

² Im witu, sé tonaas né walian wo sé tou Yahudi sé ipahkua-kua é méyé simaru wia ni sia i mékumua an ipahtoké néra wia si Paulus.

³ Ni séra totoz mahaléi wia si gubernur i mapaileké u lé'osna wo si Paulus toro ipahwalimé witi Yerusalem. Pahaléien néra téntu pahpaan ni séra éng gimenang i munu' si Paulus witi lalan.

⁴ Taan si gubernur Festus éng kimuala i si Paulus én zéi'kan iéramé im witi kinenusan ni sia witi Kaisarea. Wo si Festus kasii zéi'mo mauréma é mawurimo sumaup wana.

⁵ Kuana, “Tawimo sé tonaas niou éng kumiitomé ni aku i mangé wana. Wo sa wanamo, taré ikua nioula an ipahtoké niou wia si Paulus, sa wéwéhan a sinala'na.”

⁶ Si Festus i nimahento'mé witi Yerusalem ém woo walu kaapa mapulu'na endo, kumawusa niitu sia mawurima witi Kaisarea. Masandomé ni sia matuma tou i mangémé si Paulus in isaru wia ni sia, in totozen ulit kaapa zéi'kan um winangunna.

⁷ I si Paulus méikaayomola witu, péléng sé tou Yahudi sé witi Yerusalem a méyé é rimendai limiklik ni sia. Lakez an ipahtoké néra wia si Paulus i mahwuwutez ni sia, taan ni séra én zéi'kan makawawa i mapailek sa an ipahtoké néra itii én ulit.

⁸ Taan si Paulus é mahkelung un touna, kuana, “Zozo' in esa uman, ni aku én zéi'kan simingkéla'la im wana an ukum Torat né tou Yahudi, kaapa witi Walé ni Opo Empung kaapa wia si Kaisar.”

⁹ Taan pahpaan si Festus maheenou sé tou Yahudi, niitumo ni sia meligau wia si Paulus, “Apa ko paaz i mangé witi Yerusalem, i matotozen wana tumoro an ipahtoké néra wia ni ko witu u sinaruku?”

¹⁰ A mingkotla si Paulus, “Ni aku in tarékan é rimendai wia un tampa pahtotozan ni Kaisar. Tanumo un totozo kata'uan ni tuang i ni aku én zéi'kan siapa a sinala' wia sé tou Yahudi zozo' in esa uman.

¹¹ Niitumo sa ni aku simala'mola wo nimangunola a léwo'an an toro mangun ni aku in ukumen im wunu'en, ni aku é méhé uman un touku im wunu'en. Taan sa péléng an ipahtoké néra wia ni aku én zéi'kan ulit, zéi'kan siapa zozo' in esa si tou toro mayo ni aku wia ni séra. Ni aku é mahaléi um pahéndo-éndoan kenu in totozen ni Kaisar!”

¹² Kaitalingamé niitu, si Festus é nimeruz wo sé menénésa wia ni sia. Kumawusa niitu, a mingkotla si Festus, “Ni ko é nimahaléi in totozen ni Kaisar, niitumo ni ko é léwo'zéi' i maisaru wia si Kaisar.”

Si Paulus witu sinaru ni Agripa wo ni Bernike

¹³ Woo pirana endo tumondongla niitu, a méyé si kolano Agripa karia ni tuarina wéwéné makangaran Bernike witi Kaisarea. Ni séra niméyé i mehé u sisigi'an néra wia si Festus si taré maéndola gubernur.

¹⁴ Pahpaan ni séra én uré oki' i nimento' witu, niitumo si gubernur Festus simiritala wia si kolano Agripa tumoro um pahéndo-éndoan ni Paulus. Kuan ni gubernur Festus, “Im wia'i, wéwéhan si tou méikenuspé'ma ni Feliks.

¹⁵ I ni aku witi Yerusalem, sé tonaas né walian wo sé pahtutu'an né tou Yahudi éng kimuala an ipahtoké néra tumoro si tou itii wia ni aku. Wo ni séra é nimahaléi wia ni aku i mukum ni sia.

¹⁶ Taan méikuakula wia ni séra in zéi'kan kinanaram né tou Romawi i mukum si tou, puunala si tou itii im pasungkulen karia né tou mahtoké ni sia, wo zéi'kampé' winéhanla tempo ing kumelung un touna wana an ipahtoké itii.

¹⁷ Pahpaano niitu, ni séra éng kimiité kariaku i niméyé wia'i. Masandomé, ni aku nimatuma tou i mangémé si Paulus in isaru wia ni aku, in totozen ulit kaapa zéi'kan um winangunna.

¹⁸ Taan i sé tou mahtoké ni sia rimendai limiklik ni sia, méikatuzu'mé sa zéi'kan siapa a léwo'an an ipahtoké néra tanu um pahgenangengkula.

¹⁹ Ni séra én akaz uman i mahéndo-éndoan kariana tumoro an tinotoz witu um pa'émanen néra, wo tumoro si tou si makangaran Yesus si nimatémo, taan si Paulus én totoz ketez i mahkua i si Tou itii é menou-nou.

²⁰ Pahpaan ni aku linganga kura i mahtata'u am pahzéi-zéi'an tanu niitu, niitumo ni aku limigaula wia si Paulus apa sia paaz i mangé witi Yerusalem i matotozen witu.

²¹ Taan si Paulus é nimahaléi umanla um pahéndo-éndoan tumoro ni sia in totozen ni Kaisar. Ni sia é mahaléi wo zéi'kan iondolé im witi kinenusan ni sia makaz um pahéndo-éndoan tumoro ni sia in totozen ni Kaisar. Pahpaano niitu, ni sia é méikenuskuma makaz sia toro ipekiwali wia si Kaisar.”

²² A si kolano Agripa kumuala, “Ni aku kangkasii ém paaz in tumalinga si tou itii.” A mingkotla si Festus, “I sando ni ko én toro tumalinga ni sia.”

²³ Masandomé, a méyé si kolano Agripa wo si Bernike. Ni séra zua éng kimarai ang karai né kolano wo sé tou witu é mahongko-ongkot wo mahsigi' ni séra. A séra zua karia né tonaas né suraro wo sé tou sé ipahkua-kua witi wanua tua'na itii muntepa witi tampa pahtotozan sé tou. Tumondong niitu a si gubernur Festus meréntama i mahwalimé si Paulus witi tampa itii.

²⁴ I si Paulus witumo, ang kuan ni gubernur Festus, “Kolano Agripa si totoz pahsigi'engku wo péléng sé tou mahwali-wali karia nai wia un tampa kenu. Ilekenola si tou kenu si ipahtoké péléng né tou Yahudi, sé witi Yerusalem wo sé wia ung Kaisarea. Ni séra niméyé wia ni aku wo karia i mahkérét mahkua i si tou kenu é léwo'zéi' im wunu'en.

²⁵ Taan ni aku én zéi'kan nimakailekla un toro kawalian wo si tou kenu ukumen i maté. Wo ni sia kasii é nimahaléiola wo um pahéndo-éndoanna kenu én totozen ni Kaisar, niitumo ni aku én timotozola i matu tou mahwali ni sia i maisaru wia si Kaisar.

²⁶ Taan zéi'kampé' siapa un toro ipantikuma in iwéhé wia si Kaisar tumoro si tou kenu. Pahpaano niitu, si tou kenu é méipahwalikumé wia'i in isaru wia ni kamu péléng wo un ipahpuu-puuna ém wia si kolano Agripa. Wo sa simapetola i nimahtata'ula wia ni sia, ni aku ém wéwéhan un ipantika in iwéhé wia si Kaisar.

²⁷ Pahpaan mengiit ung genangku, zéi'kan ulit sa si tou méikenus iwali wia si Kaisar, taan zéi'kan siapa um pinantik tumoro a méipahtoké né tou wia ni sia.”