Kisah Rasul-rasul 24 - Taaz Weru Witu u Nunuwu'en Tombulu

Si Paulus witu sinaru ni gubernur Feliks

¹ I limangkoioma u limana endo, a méyé si Walian Wangko' Ananias, sé pahtutu'an né tou Yahudi wo si tou tulap i menonoké makangaran Tertulus. Ni séra masimaru wia si gubernur Feliks a makumua an ipahtoké néra wia si Paulus.

² Si Paulus ipekiwalimé ni gubernur itii, a si Tertulus méhé i mahtoké si Paulus, kuana, “Gubernur Feliks pahsigi'en nai. Pahpaan si tuang si nimaéndo pemerénta nai, ni kai menou-nou karia in zéi'kan siapa ikaarét. Wo karia ung katulapan ni tuang lakezo a nimawanguna wia un tana' kenu.

³ Wisa uman un angéan nai, péléng niana ém pahsungkulen nai karia i mahkua u makasé.

⁴ Taan wo ni kai zéi'kan tahlous menia-nia' un témpo ni tuang, zozo' in zéi'kan mauréma, ni aku é mahaléi wo ni kai én talingana ni tuang karia ung kalé'osan un até ni tuang un ipahkua-kua itii.

⁵ Si tou kenu éng kinata'uan nai i siga' mahrikoka' tanumokan u saki melaput. Pahpaan péléng sé tou Yahudi wia ung kaayahan kenu ém pahrikoka'enna. Ni sia kangkasii én tonaas né tou sé mahkiit an tutuzu' ni tou Nazaret.

⁶ Lumous tarémé niitu, ni sia é mahwawangun um Walé ni Opo Empung maéndo makati'tiren. Niitumo, ni sia én tinionan nai wo pahtotozen nai am winanguna mengiit un ukum Torat nai.

⁷ Taan si tonaas né sana riwu suraro makangaran Lisias é mékimahat ni sia im wia ni kai,

⁸ a matumé sé tou mahtoké ni sia i mésumaru wia si tuang. Sa pahtata'ula ni tuang in esa am winangunna, si tuang én toro mata'u péléng a méitoké nai wia ni sia.”

⁹ Sé tou Yahudi walina kangkasii é mahkua sa a méikua ni Tertulus itii én ulit.

Si Paulus mahkelung un touna witu sinaru ni gubernur Feliks

¹⁰ Tumondong niitu, si Gubernur mayata u lengenna wia si Paulus i méhé un témpo wia ni sia i numuwu'. A si Paulus kumua, “Kata'uangkumo, si tuang i nimaéndo menonotoz am pahwangunen né tou in ulit kaapa zéi'kan wia un tana' kenu ém pahta'unano ung kauréna. Pahpaano niitu, ni aku én zéi'kan mahzua-zua genang ing kumelung un touku witu u sinaru ni tuang.

¹¹ Toro pahtata'ula in esa ni tuang in zéi'kampé' awes mapulu' wo zuana endo limangkoila, ni aku i niméyé witi Yerusalem é mérumagés wia si Opo Empung.

¹² Zéi'kan kawisa ni aku im pina'ilek né tou i mahéndo-éndoan karia né tou walina kaapa i mahrikoka', niitu im witi Walé ni Opo Empung kaapa im witi walé peraragésan né tou Yahudi, kaapa im witi wanua tua'na.

¹³ Ni séra én zéi'kan makawawa i mapailek wia si tuang sa an ipahtoké néra wia ni aku én uli-ulit winangunku.

¹⁴ Taan ni aku é makaulit wia si tuang i ni aku é mahsigi' wo mahpaayang wia si Opo Empung né nimaopo nai in tou Israel. Ni aku kasii é mahkiit an tutuzu' ni Yesus Mahpiara um pahkuan néra i simala'. Ni aku é ma'éman wana péléng a méipantik witu un ukum Torat wo am pinantik witu ung kitap né nabi.

¹⁵ Ni aku kasii én tanu ni séra i mahéré' uman wia si Opo Empung in tumou sumaup péléng sé tou nimaté, ni séra in tou ulit kaapa zéi'kan.

¹⁶ Pahpaano niitu ni aku sekezé é mahtututu' i menou-nou karia un até weresi, witu u sinaru ni Opo Empung wo witu u sinaru né tou.

¹⁷ Im woopirana ta'uno nimahento'mé witi wanua walina, a ni aku mawurimé sumaup witi Yerusalem. Ni aku i niméyé é nimahalimé a sasawang wia sé tahsasana wanuaku wo kasii i méhé a raragés wia si Opo Empung.

¹⁸ Karegas ni aku i mahwangun péléng niitu, sé woopira tou Yahudi witi Asia a méye, nimilek ni aku im witi Walé ni Opo Empung. Ni séra nimilek ni aku i ni aku simampetola nimeresima un touku mengiit un ukum Torat. I ni aku nimeresi un touku, sé tou niméyé én toyo' uman wo im witu kasii én zéi'kan nimarikoka'.

¹⁹ Un ulitna ni séra sé léwo'zéi' i méyé sumaru wia si tuang i mékumua an ipahtoké néra wia ni aku, sa wéwéhan un toro itoké néra wia ni aku.

²⁰ Taan, iwayamola sé tou kenu ing kumua a niilek néra tumoro a léwo'an winangunku, i ni aku méisaru witi Mahkamah Agama.

²¹ Kaapa ni aku ém pahgenangen nérala i simala' pahpaan in toro niitu ni aku éng kiméréta in téntii, ‘Ni aku méisarumé wia u Mahkamah Agama kenu pahpaan ni aku é ma'éman sa sé tou nimatémo én itou sumaup ni Opo Empung.’ ”

²² Taan um pahzéi-zéi'an néra itii é méikana'la ni gubernur Feliks si totoz mata'u tumoro an tutuzu' ni Mahpiara, karia ing kimuala in téntii “Ni aku én tumotoz um pahzéi-zéi'an niou, sa wiamo si Lisias si tonaas né sana riwu suraro.”

²³ An iatuma ni gubernur si tonaas né sana atus suraro in zéi'kan toro milot si Paulus, taan ikenus umana. Wo kasii zéi'kan toro mahséro' sé kakaria ni Paulus i mengangalimé am pemandungenna.

Si Paulus witu sinaru ni Feliks wo ni Drusila

²⁴ Im woopirana endomo, a méyé si gubernur Feliks karia ni Drusila mahayona. Si mahayona itii én tou Yahudi. Si Feliks matuma tou i matumawahmé si Paulus, a séra tumalinga an tutuzu'na tumoro um pa'émanen wia si Yesus Kristus.

²⁵ Taan i si Paulus mahkua tumoro kura i menou-nou ulit witu u sinaru ni Opo Empung, kura i mahimek un tou im wana a léwo'an, wo kasii tumoro un endo in tumondong i si Opo Empung métumotoz ulit kaapa zéi'kan am pahwangunen né tou, si Feliks éng kinaindé'an ang kumua, “Téntupé', wo in tarékan é mangémo. Sa wéwéhano endo lé'os, ni ko én tawahengkumokané sumaup.”

²⁶ Karegas niitu, si Feliks é mahéré'la im wéhané ni Paulus zoit. Pahpaano niitu, si Paulus sekezé ém pahtawahennamé i mésumirita kariana.

²⁷ Taan i nimalekepola un zuana ta'un, si Feliks é sinawelan ni Perkius Festus ing gubernur. Pahapaan si Feliks é maheenou sé tou Yahudi, niitumo si Paulus én zéi'kan méipilotnamé im witi kinenusan ni sia.