Kisah Rasul-rasul 23 - Taaz Weru Witu u Nunuwu'en Tombulu

¹ Karia i mahwerenna wia sé tou sé méikauntep witu u Mahkamah Agama si Paulus mahkua, “Katuari-katuari, makaz in endo kenu ni aku é menou-nou karia un até weresi witu u sinaru ni Opo Empung.”

² Taan si Walian Wangko' Ananias nimatuma sé tou sé rimendai witu u rété ni Paulus i sumepala u sumahna.

³ Kaisepal nérama a si Paulus kumuama wia si Ananias, “É ko tou mahgau-gau lé'os! Si Opo Empung é sumepal ni ko! Ni ko rimumez witu in tumotoz ulit kaapa zéi'kan am pahwangunengku mengiit un ukum Torat, taan ni ko in esa é simala'mola im witu un ukum Torat i nimeréntama sé tou i sumepal ni aku.”

⁴ Kaitalingamé niitu, sé tou witu é mahkua, “Ni ko é mahséro' wia si Walian Wangko' ni Opo Empung!”

⁵ A si Paulus mingkotla, “É katuari-katuari, zéi'kan kata'uangku sa ni sia ém Walian Wangko'. Ulit im wéwéhan u méipantik witu ung kitap Torat in téntii, ‘Ni kamu én tia' menuwu-nuwu' a léwo'an tumoro si tonaas niou.’ ”

⁶ Pahpaan kata'uan ni Paulus i sé walina sé méikauntep witu u Mahkamah Agama én tou Saduki wo sé walina kasii é sana réwok tou Farisi, a sia kuméréta, “Katuari-katuari, ni aku én tou Farisi, suzu né tou Farisi. Ni aku méisarumé wia u Mahkamah Agama kenu pahpaan ni aku é ma'éman sa sé tou nimatémo én itou sumaup ni Opo Empung.”

⁷ I ni sia makakuama un téntu, a sé sana réwok tou Farisi wo sé tou Saduki mahzéi-zéi'an makaz sé tou lakez itii nimawéténga.

⁸ Pahpaan sé tou Saduki é mahkua in zéi'kan siapa si tou nimatémo toro itou sumaup wo kasii zéi'kan siapa malaekat kaapa roh. Taan péléng niana ém pa'émanen né sana réwok tou Farisi.

⁹ A séra mahzéi-zéi'an makaz i nimarikoka'ma. Sé woopira tou tulap un Torat im wia sé sana réwok tou Farisi é nimangé witi puuna a mahkelung si Paulus kuan néra, “Sa ikiit ni kai, si tou kenu én zéi'kan siapa sinala'! Séi si mata'u sa wéwéhan si roh kaapa malaekat nimuwu'moma wia ni sia.”

¹⁰ A sé sana réwok tou Farisi wo Saduki kalousnamo i mahzéi-zéi'an, makaz si tonaas né suraro é maindé'mo én taa si Paulus léndongan nérama. Niitumo, ni sia nimeréntama sé surarona in timumpama i mangémé si Paulus im witu un unez né tou lakez itii wo mahwalima ni sia witi pahento'an mahwali-wali né suraro.

¹¹ Masandomé im wengi, si Yesus Mahpiara mérimendai witu u rété ni Paulus ang kumuama wia ni sia, “Enté-enté'en un atému. Pahpaan kuramo ni ko i mahkua a niilek wo tinalingamu tumoro ni Aku im wia sé tou witi Yerusalem, téntumo kangkasii ni ko léwo'zéi' i makumua niitu wia sé tou witi Roma.”

Sé tou timiwa' i munu' si Paulus

¹² Masandonamé im woondo, sé tou Yahudi é nimaréwok a mahesaala wo kasii mahtiwa' in zéi'kan mahka-kanla wo mahele-elepla, sa zéi'kampé' nimunu'la si Paulus.

¹³ Sé tou Yahudi sé nimaréwok itii én epatna pulu' tezaan.

¹⁴ Ni séra nimangé wia sé tonaas né walian wo sé pahtutu'an né tou Yahudi ang kumua, “Ni kai é nimaesaanola wo timiwa'mola in zéi'kan mahka-kanla wo mahele-elepla, sa zéi'kampé' nimunu'la si Paulus.

¹⁵ Pahpaano niitu in tarékan, ni kamu wo sé tou né Mahkamah Agama é léwo'zéi' masumaru wia si tonaas né sana riwu suraro, i mahaléi wo si Paulus toro méisaru sumaup wia ni kamu, tanumokan ni kamu é lumouspé'mé i mahtata'u ni sia. Karegas niitu, ni kai é nimimeko i munu' ni sia puunala sia in ikaayomé wia ni kamu.”

¹⁶ Taan si pahanaken ni Paulus, si oki' ni totoz katuarina wéwéné én timalinga ang ginenang néra itii. A sia mangé witi pahento'an mahwali-wali né suraro i makumua wia si Paulus péléng an tinalinganamé.

¹⁷ A si Paulus tumawahmé si esaané im wia sé tonaas né sana atus suraro ang kumua wia ni sia, “Ipahwalima si tarétumou kenu wia si tonaas niou, pahpaan wéwéhan u léwo'zéi' maikua ni tarétumou kenu wia ni sia.”

¹⁸ A si tarétumou itii ipahwalima ni tonaas né sana atus suraro itii wia si tonaas néra ang kumua, “Si Paulus si méikenus itii é mekisawang wia ni aku i mahwalimé si tarétumou kenu i mémahilekan kariamu, pahpaan wéwéhan u léwo'zéi' in ikuana wia ni ko.”

¹⁹ An tionala ni tonaas né sana riwu suraro itii u lengen ni tarétumou itii an iwalinama in timampasa witu u ruruh a meligau wia ni sia, “Apa un ipahkukuamu wia ni aku?”

²⁰ A sia mingkotla, “Sé tou Yahudi é nimaesaano i mémahaléi wia ni ko wo si Paulus maisarumu sumaup wia sé Mahkamah Agama i sando, tanumokan ni séra é lumouspé'mé i mahtata'u si Paulus.

²¹ Taan ni ko én tia' ikakiit umanla un eenou néra. Pahpaan wéwéhan sé tou epatna pulu' tezaan sé nimimeko i munu' si Paulus. Ni séra én timiwa'mo in zéi'kan mahka-kanla wo mahele-elepla, sa zéi'kampé' nimunu'la si Paulus. In tarékan ni séra é nimimeko wo ma'ento'mokan in énéannumé.”

²² A si tarétumou itii ipekiwurima ni tonaas né sana riwu suraro itii karia i nimeréntama wia ni sia, “Tia' ipahkukuamu wia si séi uman i niana péléng é méipakakuamumomé wia ni aku.”

Si Paulus méiérama witi Kaisarea

²³ Kumawusa niitu, si tonaas né sana riwu suraro tumawahmé sé zua tonaas né sana atus suraro ang kumua, “Ipekiimekla sé zuana atus suraro wo sé pituna pulu' suraro menaké kawalo wo sé zuana atus suraro mahali-ali am wengkou, im wengi kenu im woo jam kasiou i mangé witi Kaisarea.

²⁴ Iimek kasiila sé woopira kawalo i sakéan ni Paulus. Wo iwali nioua sia wia si gubernur Feliks karia i lé'o-lé'os uman.”

²⁵ A si tonaas né sana riwu suraro itii mantika um pinantik un iwéhé wia si gubernur Feliks. U méipantik witu um pinantik itii én téntii,

²⁶ “U sigi'ku, Klaudius Lisias wia si gubernur Feliks pahsigi'engku.

²⁷ Si tou kenu én tinionan né tou Yahudi wo pahwuwunu'en néra. Pahpaan tinalingakula i ni sia én tou Roma, niitumo ni aku karia né suraroku é nimangé a mamilot ni sia im wia ni séra,

²⁸ i mahtata'u ung kinawalian akaz sé tou Yahudi mahtoké ni sia. Niitumo, ni sia méipahwalikuma wia sé Mahkamah Agama néra.

²⁹ Kinata'uangkula i ni sia ém pahtokéan néra pahpaan un ukum Torat. Taan zéi'kan siapa un ipahtoké néra un toro maéndo kawalian mukum ni sia i maté kaapa in iuntep bui.

³⁰ Ni aku éng kinuaano im wéwéhan sé tou Yahudi sé nimaesaan wo gimenango i mahwuwunu' ni sia. Pahpaano niitu, ni sia é rengan méipekiwalikuma wia ni ko. Wo ni aku kasii é nimatuma sé tou sé mahtoké ni sia, i méyé wia ni ko i makumua an ipahtoké néra itii.”

³¹ Kumawusa niitu, sé suraro itii é nimangunla tanu u méiperénta ni tonaas néra. Im wengi itiikan, si Paulus méipahwali nérama witi Antipatris.

³² Masandomé, si Paulus é méiayola né suraro sé melampang uman wia sé suraro sé simaké kawalo. A sé suraro menaké kawalo itii mahwalima si Paulus nimangé witi Kaisarea, taan sé suraro sé melampang uman é nimawurimé sumaup witi pahento'an néra mahwali-wali.

³³ I méikaayomoma witi Kaisarea, an iayola né suraro menaké kawalo um pinantik itii wia si gubernur. A si Paulus iayo néra kasiila wia ni sia.

³⁴ I si gubernur itii nimakabacamola um pinantik itii, a sia meligau wia si Paulus sa witi propinsi wisa sia a méyé. I ni sia timalingala si Paulus ém witi propinsi Kilikia a méyé,

³⁵ a sia kumuala wia si Paulus, “Un ipahtoké wia ni ko ém pahtata'ungku, sa sé tou mahtoké ni ko méikaayomomé wia'i.” An iatuma ni gubernur itii sé touna i mahwalima si Paulus in ikenus witi istana um winangun ni kolano Herodes.