Kisah Rasul-rasul 2 - Taaz Weru Witu u Nunuwu'en Tombulu

Si Roh Lenas timumpa wia sé tou ma'éman

¹ Im witu un endo wangko' Pentakosta, péléng sé tou ma'éman wia si Yesus é nimaréwok witu um walé.

² Kumompo'mé talingané ém wéwéhan un zani witi langit un tanumokan a reges repet, taka-takazan um walé rinéwokan néra itii é mawuta-wuta karia un zani itii.

³ An ileken nérama an api tanumokan a lila' a méikasera mahta'sama i mahtumpama wia ni séra.

⁴ A si Roh Lenas kumawasala wia ni séra péléng. Tumondong niitu, a séra méhé i mahnuwu' karia a nunuwu'en walina, mengiit a méiwéhémé ni Roh Lenas wia ni séra.

⁵ In endo mahpésta itii, lakez sé tou Yahudi sé uli-ulit mahragés wia si Opo Empung, sé siméngkot wana péléng am wanua wia ung kaayahan é niméyé witi Yerusalem.

⁶ In timalingamé un zani itii, a maréwoké sé tou lakez. Ni séra é mengompo' pahpaan si esa wo si esa é mahtalingamé u nunuwu'en néra ém pahnuwu'mo né tou ma'éman itii.

⁷ Ni séra péléng é menganga-nganga wo mengusi-ngusingsing, ang kuan néra, “Zéi'kankuaa péléng sé tou mahnuwu' itii én tou Galilea?

⁸ Kura kahuman ni kita si esa wo si esa é mahtalingamé ni séra i mahnuwu' karia a nunuwu'en witi wanua kinatouanta?

⁹ Ni kita én tou: Partia, Media, Elam, Mesopotamia, Yudea wo Kapadokia, Pontus wo Asia,

¹⁰ Frigia wo Pamfilia, Mesir wo an tana' witi Libia u nimarétéan wo ung Kirene, tou Roma sé limepuhmé,

¹¹ tou Yahudi wo zéi'kan tou Yahudi taan mahkiito um pa'émanen né Yahudi. Wo wéwéhan kasii sé tou Kreta wo tou Arab. Ni kita péléng é mahtalingamé ni séra i mahnuwu' karia a nunuwu'enta tumoro am winangun ni Opo Empung am wangko'.”

¹² Péléng ni séra é mengusi-ngusingsing wo menganga-nganga a mahkuaala, “Apa kahuman ung kalakoan péléng ang kenu?”

¹³ Taan sé walina én akaz uman i mahlungkuza, “Ni séra én tewelen pahpaan nimelep un anggor tombal.”

Si Petrus mahnuwu' wia sé tou lakez

¹⁴ A si Petrus wo sé mapulu' wo esa aatu ni Yesus rumendaié. Karia i rimez si Petrus mahnuwu'ma wia sé tou lakez itii, “É kamu sé tou Yahudi wo ni kamu péléng sé mahento' wia u Yerusalem! Totoz pahwéhanla genang an ipahkuaku wo kata'uan nioula.

¹⁵ Sé tou kenu ndootuu én zéi'kan tewelen tanu um pahgenangen nioula. Pahpaan in tarékan én taré jam kasiou im woondo.

¹⁶ Taan apa un taré tinalinga nioua, im puuna é méipapata'umo ni Opo Empung wia si Yoel si nabi-Na, téntii u méikua-Na,

¹⁷ ‘Wana an endo kamurian, si Roh-Ku én iwéhé-Ku wia péléng sé tou. Wo sé oki' niou sé tuama wo wéwéné é mapata'u wia sé tou a méikua-Ku wia ni séra. Sé tarétumou wo sé raraha niou ém wéwéhan un ipapailek ni Opo Empung, wo sé tu'a ém wéhan ni Opo Empung un ipi.

¹⁸ Téntu kangkasii sé ata-Ku tuama kaapa wéwéné é mawéhang-Ku si Roh-Ku im wana an endo itii wo ni séra é mapata'u wia sé tou a méikua-Ku wia ni séra.

¹⁹ Ni Aku é mangun a makakompo'en witi langit wo an zéi'kan kakuaan wia ung kaayahan: wéwéhan an zaha', an api wo an teremuz zemdem an tanumokan ninahak.

²⁰ Si endo é marimbengbeng wo si loloho'en é marangdang tanu un zaha'. Péléng niana é mamuali puunala un endo ni Opo Empung. Un endo itii én endo wangko' zéi'mo kakuaan.

²¹ Wo séi uman si mahaléi wia si Opo Empung in ipilot im witu un ukuman wana a singkéla', ni sia én ipilot.’ ”

²² Ang kuan ni Petrus kasii, “É katuari-katuariku tou Israel! Talingana lé'os un ikuakuma kenu: Si Yesus tou Nazaret itii én tinotoz ni Opo Empung. Niitu én toro pa'ileken im wana a makakompo'en wo an zéi'mo kakuaan wo an tumuzu'mé ung kawasa ni Opo Empung. Niana péléng ém winangun ni Opo Empung wia ni kamu mengiité si Yesus, tanu ung kata'uan niou.

²³ Si Yesus si méiayola ni Opo Empung wia ni kamu mengiit un tinotoz wo ung ginenang-Na é sinalip wo winunu' niouola, mengiité sé tou sé mahsaru si Opo Empung.

²⁴ Taan ni Sia é méitoumé sumaup ni Opo Empung wo nimiloté ni Sia im witu un zéha um patéan, pahpaan ni Sia én zéi'kan mamuali i memitu-mitu ung kawasa um patéan.

²⁵ Im puuna si Daud éng kimuamo in téntii tumoro ni Sia, ‘Sekezé si Opo Empung ém pengile-ngilekengku witu u sinaru-Ku. Pahpaan ni Sia ém witu ung kakanku, niitumo zéi'kan siapa si kumala ni aku.

²⁶ Pahpaano niitu, un atéku é mahpaa-paaz wo u sumahku é meloo-looz uman ni Sia. Wo un awakku kangkasii é mahéré' uman wia ni Sia.

²⁷ Pahpaan zéi'kan méiwaya-Mu si Roh-Ku i memiti-miti pahwéha-wéhan né tou nimatémo, wo zéi'kan iwaya-Mu un awak ni Tou Linenas-Mu kenu i mawuul.

²⁸ Ni aku én tinuzu'an-Nu u lalan kura in uli-ulit menou-nou. Ni aku én uli-ulit mahpaa-paaz pahpaan ni Ko memali-mali karia-Ku.’

²⁹ Katuari-katuari, ipakaulitkuma wia ni kamu tumoro si kolano Daud, si nimaopota. Ni sia é nimatémo wo u linewengan sia ém wiapé' makaz in tarékan wia um wanua kenu.

³⁰ Taan ni sia é nabi wo kata'uanna si Opo Empung én timaaz wia ni sia karia in timiwa' i si esaané wia sé suzuna é maéndo Kolano.

³¹ Pahpaan kata'uano ni Daud u mamuali wo ni sia kimua i si Mesias én itou sumaup ni Opo Empung. Niitu éng kata'uannamo i ni sia kimua, si Roh-Na én zéi'kan iwaya i memiti-miti tampa né tou nimatémo wo un awak-Na én zéi'kan iwaya i mawuul.

³² Si Yesus kenumo si méitoumomé sumaup ni Opo Empung. Wo tumoro niitu, ni kai péléng sé nimilek u nimamuali itii.

³³ Tumondongla niitu, ni Sia é méirakék ni Opo Empung a makaileké si Roh Lenas si méitaaz ni Ama'. An itumpa-Namé si Roh itii tanu a niilek wo tinalinga niou wia un tampa kenu.

³⁴ Pahpaan zéi'kan si Daud si winénéta mangé witi kasendukan, taan lumouspé'mé niitu ni sia éng kimua in téntii, ‘Si Opo Empung éng kimua wia si Tuangku:

³⁵ Rumumezomé witu ung kakan-Ku, makaz sé kakoro'-Mu iwéhé-Ku witu u léléék-Mu.’

³⁶ Niitumo, ni kamu péléng in tou Israel é léwo'zéi' in totoz mata'ula i si Yesus si salip niouola itii ém winangunola ni Opo Empung maéndo Mahpiara wo Kristus.”

³⁷ In timalingala niitu péléng, ni séra én totoz mene'sel a meligau wia si Petrus wo sé aatu walina, “Katuari-katuari, apa u léwo'zéi' im wangunen nai?”

³⁸ A mingkotla si Petrus wia ni séra, “Itula'umola a singkéla' niou wo iwéhémola un tou niou i saranin witu u ngaran ni Yesus Kristus wo ni kamu makailek un ampungan ni Opo Empung wana a singkéla' niou. Karia in téntu ni kamu é makailek un tatambér. Un tatambér itii é si Roh Lenas.

³⁹ Pahpaan u méitaaz ni Opo Empung itii méiwéhé wia ni kamu wo wia sé suzu niou, wo kasii wia sé tou sé mahento' witi tampa zou'ma, kalakez né tou sé tawahen-Na.”

⁴⁰ Lakezpé' kasii a méikua ni Petrus wia ni séra i mahkua am pina'ilekna wo menutu' ni séra, kuana, “Sa kamu paaz in zéi'kan ukumen ni Opo Empung, tia'mo mahkari-karia sé tou memua-muali a singkéla' kenu.”

Ung katou-touan né tou ma'éman

⁴¹ Sé tou niméhé genang witu u méikua ni Petrus é niméhéla un tou néra i sinarani. Im witu un endo itiikan, sé tou ma'éman wia si Yesus éng kinaawesan woo teluna riwu tou.

⁴² Ni séra én uli-ulit mahtalinga an tutuzu' ipahtuzu' né aatu ni Yesus wo meréwo-réwok. Wo ni séra kasii sekezé é mahkan wo mahmengaléi mahwali-wali.

⁴³ In toro niitu, péléng sé tou é mengusi-ngusingsing wo maindé' pahpaan lakez a makakompo'en wo an zéi'mo kakuaan am winangun né aatu ni Yesus.

⁴⁴ Péléng sé tou ma'émano itii sekezé é nimaréwok mahwali-wali. Wo péléng a sangkum ni esa wo ni esa é nimaéndomo anu néra péléng.

⁴⁵ Wo sekezé im wia ni séra ém wéwéhan sé mahwangkér a sangkum néra, an zoitna én ipahwéténg wia sé tou mengiit am pemandungen ni esa wo ni esa.

⁴⁶ Wo sekez in endo ni séra én zéi'kan kumana' i meréwo-réwok witi Walé ni Opo Empung wo ni séra én esa genang. Um walé ni esa wo ni esa é mahsasawel im pahangéan néra i mahkan mahwali-wali karia i mahpaa-paaz wo ung genang lé'os.

⁴⁷ Ni séra é mahlooz si Opo Empung wo ni séra kasii éng kapaaz né tou lakez. Wo sekez in endo ung kalakez né tou méipilot im witu un ukuman wana a singkéla' ém pahawesan ni Opo Empung.