Kisah Rasul-rasul 15 - Taaz Weru Witu u Nunuwu'en Tombulu

Um pahzéi-zéi'an witi Yerusalem

¹ Wéwéhan sé woopira tou sé witi Yudea niméyé witi Antiokhia a mahtuzu' wia sé katuari esa pa'émanen witu, in téntii, “Sa kamu zéi'kan sinunat mengiit ung kinanaram méituzu'ma ni Musa, ni kamu én zéi'kan ipilot im witu un ukuman wana a singkéla' niou.”

² Taan si Paulus wo si Barnabas én totoz mahsaru wo mahzéi' an ipahtuzu' néra itii. Ing kamurian an totozela né tou ma'éman si Paulus wo si Barnabas wo sé woopira tou im wia sé jamaat, in iatu mangé wia sé aatu ni Yesus wo wia sé penatua witi Yerusalem. Im wana ni séra é sumirita tumoro um pahzéi-zéi'an néra itii.

³ Ni séra ipahwalima né jamaat makaz witi kaondolana um wanua tua'na. A séra lumampang kimiita witi Fenisia wo Samaria. Im witu ni séra nimahsiritama tumoro sé tou zéi'kan Yahudi sé timula'umola a singkéla' néra. U sirita itii é nimanguna un até né katuari esa pa'émanen witu totoz mahpaa-paaz.

⁴ I méikaayomola witi Yerusalem, ni séra é sinungkulé né jamaat wo né aatu ni Yesus wo né penatua. An isirita nérala zua péléng am pinaayang ni Opo Empung mengiité ni séra.

⁵ Taan wéwéhan sé woopira im wia sé sana réwok tou Farisi sé ma'émano wia si Yesus, rimendaié ang kumua, “Sé tou zéi'kan Yahudi é léwo'zéi' i sunaten wo léwo'zéi' i mahkiit un ukum ni Musa.”

⁶ A sé aatu wo sé penatua rengan i sumirita um pahzéi-zéi'an itii.

⁷ Ni séra én uré i simirita tumoro um pahzéi-zéi'an itii. Tumondong niitu, rumendaié si Petrus ang kumua wia ni séra, “É katuari-katuari, kata'uan niouo rengané ing kataré-taré, ni aku ém pinéléng ni Opo Empung im wia ni kamu, i mahwoka' u Nuwu' Lé'os tumoro si Yesus wia sé tou zéi'kan Yahudi, wo ni séra tumalinga wo ma'éman niitu.

⁸ Si Opo Empung si mata'u péléng an até né tou é nimapaileko i sé tou zéi'kan Yahudi é sinungkul-Namo. Ni Sia simungkul ni séra karia i niméhéma si Roh Lenas tanu si méiwéhé-Namé wia ni kita.

⁹ Ni kita in tou Yahudi wo ni séra in tou zéi'kan Yahudi é masuat uman witu u sinaru ni Opo Empung. Pahpaan ni Sia é nimeresi un até néra mengiité um pa'émanen néra.

¹⁰ Sa téntu, kaa ni kamu mema'wa' si Opo Empung karia i niméhéla um pengalin wia sé tou ma'éman itii, un zéi'kan kawawaanta wo né nimaopota?

¹¹ Taan pa'émanenta i ni kita én ipilot im witu un ukuman wana a singkéla' tanu ni séra, mengiité ung kamang tatambér ni Yesus Kristus Mahpiarata.”

¹² Kaitalingamé un téntu, péléng sé tou witu é nimapenes. A séra tumalinga si Paulus wo si Barnabas i mahsirita tumoro péléng a makakompo'en wo an zéi'kan kakuaan am winangun ni Opo Empung wia sé tou zéi'kan Yahudi mengiité ni séra zua.

¹³ Sumampeta si Paulus wo si Barnabas i mahnuwu', ang kumuamé si Yakobus, “É katuari-katuari, talingana ni aku:

¹⁴ Si Simon é simiritamoma i si Opo Empung rengan ing kataré-taré é nimapailekoma u raraatéan-Na wia sé tou zéi'kan Yahudi. Ni Sia niméléng sé tou im wia ni séra i maéndo tou-Na.

¹⁵ Niana péléng é masuat wo a méikua né nabi tanu a méipantik in téntii,

¹⁶ ‘Tumondong niitu a ni Aku mawurimé sumaup, wo mémangun sumaup un terung ni Daud u nimarombé'mo, wo a nimateza wana a nimarombé' itii ém wanguneng-Ku sumaup, wo enté'eng-Ku,

¹⁷ wo péléng sé tou walina é menéro si Mahpiara karia péléng sé tou sé tinawah i maéndo anu-Ku. Téntu u Nuwu' ni Opo Empung, si nimangun niia péleng,

¹⁸ u mémoipapata'u rengané im puuna.’

¹⁹ Niitumo sa kiit ni aku, ni kita én zéi'kan toro mahsususa sé tou zéi'kan Yahudi sé méyé wia si Opo Empung.

²⁰ Taan ni kita é léwo'zéi' i mantika um pinantik iwéhé wia ni séra, wo séra tia' mahkan ang kakanen a mémoiragés wia sé opo-opo, mahseza' a lé'ona né binatang nimaté ing kinezangan wo un zaha'. Ni séra kasii én zéi'kan toro mahsamek.

²¹ Pahapaan rengané im puuna un ukum ni Musa é mémoikua wana péléng am wanua tua'na. Wo makaz in tarékan un ukum itii ém pahbacan wana am walé peraragésan né tou Yahudi sekez in endo Sabat.”

Um pinantik méiwéhé wia sé tou zéi'kan Yahudi sé ma'émano

²² A sé aatu ni Yesus wo sé penatua wo péléng sé jamaat timotozla i méléng sé woopira tou im wia ni séra. Sé tou pinéléngo itii én iatu mangé witi Antiokhia karia ni Paulus wo ni Barnabas. Sé pinéléng itii é: si Yudas pahkuan Barsabas wo si Silas. Ni séra zua ém pahsigi-sigi'en im wia sé katuari esa pa'émanen.

²³ Ni séra ém winéhanna um pinantik in téntii, “Sigi' wangko' nai in aatu ni Yesus wo né penatua wo né katuari niou, ipapaayo wia ni kamu katuari-katuari esa pa'émanen sé tou zéi'kan Yahudi sé witi Antiokhia, Siria wo Kilikia.

²⁴ Ni kai én timalingamola im wéwéhan sé woopira tou im wia ni kai, sé zéi'kan méiatu naima é nimangémo wia ni kamu. Ni séra é nimangunola ni kamu mahzua-zua genang wo nimalinganga karia an tutuzu' néra.

²⁵ Niitumo, ni kai péléng é nimaesaanola an tumotozla i méléng wo matu sé woopira tou i mangé wia ni kamu, karia ni Barnabas wo ni Paulus sé ikararaaté nai.

²⁶ Ni séra zua én tawi maté pahpaan i mahwoka' u ngaran ni Mahpiarata si Yesus Kristus.

²⁷ Niitumo ni kai é nimatuma si Yudas wo si Silas. Ni séra é masumirita wia ni kamu tumoro u méipantik witu um pinantik kenu.

²⁸ Pahpaan si Roh Lenas én timotozola, téntu kangkasii ni kai én timotozola, wo ni kamu zéi'kan wéhan um pengalin u lumousé ang kenu:

²⁹ Ni kamu én zéi'kan toro mahkan ang kakanen mémoiragés wia sé opo-opo, zéi'kan toro mahseza' sé binatang nimaté ing kinezangan wo un zaha'. Ni kamu kasii én zéi'kan toro mahsamek. Sa ni kamu zéi'kan mahwangun niana péléng, ni kamu é nimangunola am wangun. Téntupé' um pinantik nai kenu, sigi' nai.”

³⁰ I si Yudas wo si Silas tumuzu'la i mangémo, a séra mangé witi Antiokhia. Im witu, ni séra én timawahmé péléng sé jamaat i maréwoké. A séra zua méhéla um pinantik itii wia ni séra.

³¹ Im pinakabaca néramola um pinantik itii, sé jamaat é mahpaa-paaz pahpaan u méipantik witu um pinantik itii é mahenté' un até néra.

³² Lakez a méikua ni Yudas wo ni Silas u nimangun sé katuari esa pa'émanen mahpaa-paaz wo nimenté' un até néra. Ni séra zua kangkasii é nabi.

³³ Urékan oki' séra i nimento'mé witu. Tumondong niitu, sé katuari witi Antiokhia é niménéla wia ni séra i mawuri witi Yerusalem karia ung kaluasan witu un até wia sé nimatumé ni séra. [

³⁴ Taan si Silas én timotozla i mento' witi Antiokhia.]

³⁵ Si Paulus wo si Barnabas én urékan oki' i nimahento'mé witi Antiokhia. Séra zua karia né tou lakez é nimahtuzu'mé wo nimahwoka'mé u Nuwu' ni Yesus Mahpiara.

Si Paulus wo si Barnabas zéi'kan maéndoan

³⁶ Woo pirana endo tumondongla, a si Paulus kumuala wia si Barnabas, “Méyémo kita mawuri sumaup wia sé katuarita sé wana péléng am wanua tua'na am pinahwokaantamomé u Nuwu' ni Yesus Mahpiara, i mamilek kura séra in tarékan.”

³⁷ Si Barnabas ém paaz mahwali si Yohanes pahkuan kasii i Markus,

³⁸ taan si Paulus én totoz soo karia mahkua, in zéi'kan wangun mahwali si tou si i makasa én timula'umomé ni séra witi Pamfilia, wo soo kumiit i maayang karia néra.

³⁹ Niitu u nimangun ni séra zua totoz i mahzéi-zéi'an, makaz ni séra nimatampasan. Si Barnabas timawahma si Markus i mangé kariana siméngkot witi Siprus.

⁴⁰ Taan si Paulus é niméléngla si Silas, wo tumondongla sé katuari esa pa'émanen witi Antiokhia itii i nimayola ni séra witu ung kamang tatambér ni Mahpiara,

⁴¹ a séra malumiklik witi Siria wo witi Kilikia. Im wana séra zua é mahenté' um pa'émanen né jamaat.