Kisah Rasul-rasul 14 - Taaz Weru Witu u Nunuwu'en Tombulu

Si Paulus wo si Barnabas witi Ikonium

¹ I si Paulus wo si Barnabas méikaayola witi Ikonium, ni séra kasii nimuntepa witu um walé peraragésan né tou Yahudi. Im witu ni séra én totoz ma'ulit i nimahtuzu'mé makaz lakez sé tou Yahudi karia né tou Yunani nima'éman wia si Yesus.

² Taan sé tou Yahudi sé soo an ipahwoka' néra zua é mahaker sé tou zéi'kan Yahudi, wo nimangun ni séra maupi' wia sé tou ma'éman.

³ Niitumo, si Paulus wo si Barnabas én urékan oki' i nimahento'mé witu. Wo karia im wuaya ni séra mahnuwu' tumoro si Yesus Mahpiara. Ni Sia nimapailek sa an ipahnuwu' néra tumoro ung kamang tatambér-Na én ulit, karia i niméhé ung kawasa wia ni séra i mahwangun a makakompo'en wo an zéi'kan kakuaan.

⁴ Taan sé tou lakez witu um wanua tua'na itii é nimawéténg. Wéwéhan sé mahkiit sé tou Yahudi sé zéi'kan ma'éman, wo wéwéhan kasii sé mahkiit sé aatu ni Yesus.

⁵ A méhé sé tou Yahudi wo sé tou zéi'kan Yahudi karia né tonaas néra, maesaala in zumézéha wo merit sé aatu itii karia am watu.

⁶ Ing kinata'uanla né aatu itii ang ginenang né tou itii, a séra mangé witi wanua tua'na Listra wo Derbe am witi tana' Likaonia, wo wana am wanua walina a makahrété karia un tana' itii.

⁷ Im witu kasii ni séra mahwoka' wia sé tou u Nuwu' Lé'os tumoro si Yesus.

Si Paulus wo si Barnabas witi Listra wo Derbe

⁸ Im witi Listra ém wéwéhan si tuama si merume-rumezokan, pahpaan un a'éna é lailai rengan sia i nimatoumé wo ni sia én zéi'kampé' nimahlampa-lampangla.

⁹ Ni sia é rimumez mahtalinga si Paulus i mahnuwu'. Si Paulus nimileka si tou itii ang kata'uannala i si tou itii é ma'éman wia si Yesus, niitumo ni sia én toro malé'os.

¹⁰ A rumimeza si Paulus ing kimuama, “Rumendaiomé!” A si tou itii rengan ing kimonta'mé rimendaié a lumampang memuri-muri.

¹¹ I sé tou lakez nimilekla um winanguna ni Paulus, ni séra é rengan kiméréta karia u nunuwu'en Likaonia, “Sé opo-opo én timumpamomé witu un unezta tanu si tou.”

¹² A si Barnabas ngaranan nérala Zeus wo si Paulus é nginaranan nérala Hermes, pahpaan ni sia si mahnuwu'.

¹³ A méyé si walian si mahpaayang witi walé peraragésan wia si pa'opoen Zeus karia né tou lakez witi loloangan um wanua tua'na, nimahalimé sé sapi tuama sé niintoianno karia am wunga in iwéhé wia sé aatu itii. Um walé peraragésan ni walian itii wia si Zeus é nimatoroan karia u loloangan um wanua tua'na.

¹⁴ In timalingamé niitu ang késé'ena ni Barnabas wo ni Paulus ang kinarai néra a séra menelata witu un unez né tou lakez itii ang kumérét,

¹⁵ “É kamu péléng, kaa kamu mahwangun an téntu? Ni kai én tou uman masuat wo ni kamu. Ni kai i niméyé wia'i é mémahwoka' u Nuwu' Lé'os tumoro si Yesus wia ni kamu, wo kamu tumula'ula am pahwangunen niou an zéi'kan siapa torona kenu, wo méyé wia si Opo Empung si menou-nou. Ni Sia si nimangun u langit wo ung kaayahan, un tasik wo péléng am witu.

¹⁶ Im puuna é méiwaya ni Opo Empung péléng sé tahsasana wanua i mahkiit uman u lalan ni esa wo ni esa.

¹⁷ Taan, ni Sia én zéi'kan nimaliuz i nimapailek un tou-Na karia i mahwangun a lé'os. Ni Sia si mahtumpamé un uzan witi langit wo mahwéhémé un oras i mahupu' wia ni kamu. Ni Sia si mahwéhémé am pahkanen niou wo mahwangun an até niou mahpaa-paaz.”

¹⁸ Zozo' sé aatu itii é nimahnuwu'mola téntu, taan tawi zéi'kan kawawaan néra i mahséro' sé tou lakez sé mahwéhé a raragés wia ni séra.

¹⁹ Méyé sé tou Yahudi sé witi Antiokhia wo Ikonium, mahaker sé tou lakez ing kumiit ni séra. A si Paulus pahweriten néra karia am watu. Pahpaan pahgenangen nérala ni sia é nimatémo, a sia kéhongen néramé méiondolé im witi wanua tua'na.

²⁰ Taan i sé tou ma'éman witu rimendaila limiklik ni sia, a sia rumendaié a muntepa sumaup witi wanua tua'na. Masandomé a sia mangé witi Derbe karia ni Barnabas.

Si Paulus wo si Barnabas nimawurima witi Antiokhia

²¹ Im witi Derbe, si Paulus wo si Barnabas é mahwoka' u Nuwu' Lé'os tumoro si Yesus, taka-takazan lakez sé tou nima'éman wia si Yesus. A séra mawuri sumaup witi Listra, a meméhé-méhéma mangé witi Ikonium wo Antiokhia.

²² Im witu, ni séra nimenté' un até né tou ma'éman wo mahsésa wia ni séra in tia' mazéi' i ma'éman wia si Yesus. Ni séra zua kasii mahkua i sé tou sé muntep witi Kakolanoan ni Opo Empung é léwo'zéi' i mendan an zézéha.

²³ Sé zua aatu itii kasii én timotozla sé penatua witu un jamaat esa wo jamaat walina. Tumondong niitu, karia i mahpuasa wo mahmengaléi, sé penatua itii méiayola né aatu itii wia si Mahpiara si pa'émanen néra.

²⁴ Kumawusa niitu, si Barnabas wo si Paulus meméhé-méhé i limampang limiklika péléng un tana' Pisidia an ikaayola witi Pamfilia.

²⁵ Im witi tana' Pamfilia ni séra mahwoka' u Nuwu' ni Opo Empung witi wanua tua'na Perga, a séra mangé witi Atalia.

²⁶ Im witu a séra lumeweta mangé witi Antiokhia um witi tana' Siria. Im witumo im puuna ni séra zua é méiayo witu ung kamang tatambér ni Opo Empung, i maayang am papaayangen un tarékan é mémoisampet nérala.

²⁷ I méikaayola witi Antiokhia, tawahen néramé sé jamaat i maréwoké. An isirita nérala péléng am pinaayang ni Opo Empung mengiité ni séra. Ni séra kasii simiritala i si Opo Empung é nimukamoma u lalan wia sé tou zéi'kan Yahudi i ma'éman wia si Yesus.

²⁸ Im witu ni séra zua é mauré-uré i nimento' karia né katuari esa pa'émanen witu.