Kisah Rasul-rasul 12 - Taaz Weru Witu u Nunuwu'en Tombulu

Si Yakobus im winunu' wo si Petrus im binui

¹ In toro niitu, si kolano Herodes é mahzézéhamo sé woopira im wia sé jamaat.

² Ni sia nimatu i munu' si Yakobus si totoz katuari ni Yohanes karia um pisou.

³ I niilekla ni Herodes um pahwangunenna éng kapaaz né tou Yahudi, a sia matuma tou kasii i matumion si Petrus. In toro niitu én endo mahpésta Roti Zéi'kan Rinagian.

⁴ A si Herodes matuma tou i mamuntep si Petrus witi bui. Iatunama sé epatna réwok suraro taheepat mahsasawel in tuméiz wia si Petrus, wo sa kimawusoma i lumé'os um Paskah né tou Yahudi, si Petrus én totozen im witu u sinaru né tou lakez.

⁵ Téntu u nimamuali wia si Petrus i méiuntep witi bui. Taan zozo'mokan in téntu, sé jamaat én zéi'kan kumana' i mahmengaléi si Petrus wia si Opo Empung.

Si Petrus méiondolé witi bui

⁶ Im wengi, puunala si Petrus in totozen ni Herodes witu u sinaru né tou lakez, si Petrus én timekel tinatér né suraro zua, rinanté karia u ranté zua u méiranté kangkasii wia sé suraro. Wo wéwéhan kasii sé suraro sé timéiz witu um pepenet um bui itii.

⁷ Kumompo'mé si malaekat ni Opo Empung é rimendaio witu u rété ni Petrus, wo u sena' é mahsena'mé im witu un untep um bui itii. A si Petrus sepé'ela ni malaekat i mongké ni sia ang kuana, “Mahrewekola in tumoozé!” A mawuswusa u ranté méiapus u lengen ni Petrus itii.

⁸ Ang kuan kasii ni malaekat itii wia ni sia, “Iapusola un embetmu wo sumapatumola.” Am wangunennala tanu u méikuamé ni malaekat. Ang kuan kasii ni malaekat itii wia ni sia, “Karaienola ung karai tontonmu wo kumiitomé ni aku.”

⁹ A si Petrus kumiita si malaekat i nimondolé. Zéi'kan kata'uanna sa um winangun ni malaekat itii én uli-ulit nimamuali. Ni sia mahgenang umanla i ni sia ém winéhan u méipapailek.

¹⁰ I ni séra limampang limangkoiomé um pepenet pahtéizan kataré wo ung kazua, a séra ikaayoma witu u loloangan un uaséi am wangunen u mangé witi wanua tua'na. Um pepenet witi loloangan itii é nimawukama in esa. I nimondolomé a séra lumampanga makaz witi pondol u lalan. A sia itula'uma ni malaekat itii.

¹¹ I si Petrus nimata'umomé tou, ang kuana, “In tarékan én uli-ulit kata'uangku i si Opo Empung é nimatumé si malaekat-Na i mémilot ni aku im witu u lengen ni kolano Herodes wo kangkasii im wana a léwo'an am pegena-genangen né tou Yahudi.”

¹² I nimakagena-genangola a sia mangé witi walé ni Maria ina' ni Yohanes. Si Yohanes ém pahkuan kangkasii i Markus. Im witu é lakez sé tou nimaréwok wo mahmengaléi.

¹³ Kaayola witu, a sia tuméngkorla witu u loloangan. A méyé si ata wéwéné makangaran Rode i mahtata'u séi si mahténgkoré.

¹⁴ In tinalinganamé si mahtawahmé itii, rengan ing kinata'unala i si tou itii é si Petrus. Taan pahpaan u mahpaa-paaznakan um pepenet én zéi'mo taré winukanama. Ni sia é nimuntep uman taréma sumaup a makumua wia sé tou witi untep sa si Petrus ém witimo loloangan.

¹⁵ Taan sé akaz uman i nimingkoté, “Pahléla'eno katu' ko!” Taan si ata itii én zéi'kan mazéi' i mahkua i si Petrus én uli-ulit wiamo. Kuan néra kasii, “Ni sia ém woo si malaekatna uman.”

¹⁶ Karegas niitu si Petrus én zéi'kan mazéi' i mahténgkor. Im winuka néramomé um pepenet a séra mileka si Petrus, ni séra é méikanganga.

¹⁷ Taan si Petrus é nimayatla u lengenna wo séra menesla. An isiritanala wia ni séra kura si Mahpiara i simawangé ni sia nimondolé witi bui. Ang kuan kasii ni Petrus wia ni séra, “Ipapata'ula a nimamuali kenu wia si Yakobus wo wia sé katuarita esa pa'émanen.” Makakuala niitu, a sia mondolé im witu a mangé witi tampa walina.

¹⁸ Masandomé im woondo, i niilekla né suraro si Petrus zéi'mo witi bui, ni séra é nimaringka'. A séra mahliligauan apa u nimamuali wia si Petrus.

¹⁹ Ing kata'uala ni Herodes u nimamuali itii, an iatunama sé touna i mamenéro si Petrus. Taan ni sia én zéi'kan kinailekan néramé. An iatuma ni Herodes i malumigau wia sé suraro timéiz si Petrus a séra ipekiwunu'nala. Kumawusa niitu, si Herodes mondolé im witi Yudea a mamento' witi Kaisarea.

Si Herodes nimaté

²⁰ Sé tou Tirus wo Sidon én totoz ikaupi' ni Herodes. A sé tou Tirus wo Sidon maesaala i mangé mahilekan karia ni Herodes. Taan ing kataré-taré ni séra é nimenoula si tou mahimek witi istana ni Herodes makangaran Blastus i sumawang ni séra. A séra mangé wia si Herodes i mahaléi wo séra toro malé'osan sumaup kariana. Ni séra nimangun un téntu pahpaan ang kakanen néra é niméré' uman wia sé tou witi tana' kinawasa ni kolano Herodes.

²¹ Im witu un endo tinotoz ni Herodes i mahilekan karia néra, ni sia éng kimarai um pengangaraien ni kolano a rumumezla witu u rurumezan ni kolano, a sia numuwu'ma wia ni séra.

²² A sé tou mahkérété, “Ang kenu é nuwu'mo ni pa'opoen, zéi'mo nuwu' ni tou!”

²³ In toro niitukan a sia ukumela ni malaekat ni Opo Empung, pahpaan ni sia én zéi'kan mahsigi' si Opo Empung. Ni sia nimaté kinan né loloati.

Si Barnabas wo si Saulus nimawurimé witi Antiokhia

²⁴ U Nuwu' ni Opo Empung éng kalousna im pahkawoka'ma wo kalakezna kasii sé tou nima'éman.

²⁵ I si Barnabas wo si Saulus simampetomé um paayangen néra witi Yerusalem, a séra mawurimé witi Antiokhia. Ni séra i nimawurimé é nimahwalimé si Yohanes, si pahkuan kasii i Markus.