Ibrani 9 - Taaz Weru Witu u Nunuwu'en Tombulu

An tinotoz mengiit um pinataazan kataré

¹ Witu um pinataazan kataré, wéwéhan an tinotoz i mahragés wia si Opo Empung wo an tinotoz witu un untep un ténda ni Opo Empung um winangun wia ung kaayahan kenu.

² Un tampa pahragésan wia si Opo Empung itii ém pahkuan Ténda ni Opo Empung, im witu un untep kataré ém wéwéhan um pahto'tolansolo wo u méja zinetaan roti ipahragés wia si Opo Empung. Niitu ém pahkuan Tampa Lenas.

³ Im witu un Tampa Lenas itii ém wéwéhan u roko' méiapé' kazua wo witu muri u roko' méiapé' itii ém wéwéhan un tampa pahkuan Tampa Totoz Lenas.

⁴ Im witu ém wéwéhan um pahtunuan ang kamania u mas am wangunen wo un Tatahu'an liné'osan um pinataazan ni Opo Empung, un tatahu'an itii é sinaput karia u mas. Witu un tatahu'an itii é liné'osan um wotel mas am wangunen tinahu'an u manna, un teken ni Harun im puuna u simuzumo wo um watu zua malempaz pinantikan u mapulu' perénta ni Opo Empung.

⁵ Witu um wawo un tatahu'an itii ém wéwéhan sé zua patong tanu sé malaekat pahkuan kerub, niitu én tumuzumé ung kawangko'an ni Opo Empung. Un tétéwél né patong itii é mawuka-wuka wo kimungkung witu ung kekelew un tatahu'an itii. Ung kekelew un tatahu'an itii ém pahkuan tampa ni Opo Empung méhé un ampungan wana a singkéla' né tou. Taan in tarékan én zéi'kampé' orasna ni aku in tuma'sama i mapata'u ung kalakoan péléng niitu.

⁶ Téntu am witu un Ténda ni Opo Empung i niimek. Sekez in endo sé walian é muntepa witi tampa kataré um pahkuan Tampa Lenas, i mangun am paayangen néra i rumagés wia si Opo Empung.

⁷ Taan um witi tampa kazua um pahkuan Tampa Totoz Lenas, si Walian Wangko' uman si toro muntep witu, makasa uman witu u sana ta'un. Ni sia én zéi'kan mata'u muntep witu sa sia zéi'kan mahalima un zaha' né tatamun sé kinerizo in iragés wia si Opo Empung, in zuméi' a singkéla'na in esa wo a singkéla' né tou Israel an zéi'kan pinahtututu' néra im winangun.

⁸ Mengiit an tinotoz itii si Roh Lenas é mapata'umé, u lalan mangé witi Tampa Totoz Lenas itii én zéi'kampé' mawuka sa un tampa lenas memitu-mitupé'.

⁹ Péléng niitu un tumuzu'mé kura sé tou in tarékan i menou-nou. Karia in téntu, sé walian én ulit i nimahalimoma a raragés wo mengangali sé tatamun kinerizo wia si Opo Empung. Taan péléng niitu én zéi'kan uli-ulit nimeresima un até péléng né tou sé mahragés wia si Opo Empung.

¹⁰ Pahpaan péléng am pahwangunen néra itii én tumoro uman ang kakanen, am pahelepen wo am pahwangunen néra i meresi un tou néra mengiit um pakahragés né tou Israel. Péléng niitu én tinotoz uman né tou, zéi'kan mangun sé tou maéndo ulit witu u sinaru ni Opo Empung. Péléng an tinotoz an toro pahileken itii én zéi'kan mauréma, makaz uman si Opo Empung i mangun péléng am péléng nimaweru.

Si Kristus si pinataazan weru

¹¹ In tarékan si Kristus é niméyémo im Walian Wangko' si mahalimé péléng am wangun a méitaaz ni Opo Empung wia ni kita. Si Kristus im Walian Wangko' é mahpaayango witi Ténda ni Opo Empung un totoz wangko' wo zéi'kan siapa pahséro'an. Un Ténda itii én zéi'kan winangun né tou; ung kalakoana én zéi'kan wia ung kaayahan um winangun uman kenu a méyé.

¹² Ni Sia é nimuntepo witi Tampa Totoz Lenas, makasa uman makaz ing kauré-uré. Ni Sia i nimuntep witu én zéi'kan nimahalima un zaha' ni kambing tuama wo un zaha' ni sapi oki', taan ni Sia nimuntep witu nimahalima un zaha'-Na in esa. Karia in téntu, méipilot-Na kita im witu un ukuman wana a singkéla'ta makaz ing kauré-uré.

¹³ Kata'uantamo mengiit un ukum Torat, un zaha' ni kambing tuama wo un zaha' ni sapi tuama wo un awu ni sapi oki' si lina'ung én ipahpikpika witu un awak né tou sé makati'tiren mengiit un ukum Torat im puuna, wo un awak néra maweresi, taan zéi'kan meresima un até néra,

¹⁴ apapé' kasii un zaha' ni Kristus mengiité ung kawasa ni Roh Lenas si makaz ing kauré-uré é méiwéhé-Na in esa wia si Opo Empung i maéndo raragés zéi'kan siapa pahséro'an. Un zaha' ni Kristus itii u mangun un atéta weresi im wana am pemangu-mangunen an zéi'kan siapa torona, wo kita toro lumooz wo maayang wia si Opo Empung si menou-nou.

¹⁵ Pahpaano niitu, si Kristus nimahalimé um pinataazan weru niénéan ni Opo Empung wia sé tou. Karia in téntu, péléng sé tinawah ni Opo Empung é makailek ung kamang zéi'kan mahléwo-léwo'la makaz ing kauré-uré u méitaaz-Na, pahpaan si Kristus nimatémo i maér sé tou im witu un ukuman patéan pahpaan péléng a singkéla' néra, i ni séra mahkiitpé' um pinataazan kataré.

¹⁶ Sa wéwéhan um pinantikan wéwéténgan u sangkum, tantumo é léwo'zéi' im wéwéhan um pinantik i si nimangun um pinantikan wéwéténgan u sangkum itii é nimatémo.

¹⁷ Niitumo, um pinantikan wéwéténgan u sangkum én taré toro pakén, sa si nimantik niitu nimatémo. Sa si nimantik niitu é menou-noupé', um pinantikan wéwéténgan u sangkum én zéi'kampé' pakén.

¹⁸ Niitumo, um pinataazan ni Opo Empung karia né tou Israel ing kataré é léwo'zéi' im wéwéhan un zaha' né tatamun u méikasaroi, taré niitu toro pakén.

¹⁹ Pahpaan i si Musa nimapata'u péléng un ukum Torat wia sé tou Israel, ni sia é niméndomé un zaha' ni sapi oki' wo un zaha' ni kambing tuama u sinembor karia un zano, an ipahpikpika witu um pinantikan ung kitap Torat wo wia sé tou Israel, nimaké um wuuk rangdang ni domba wo u hisop,

²⁰ karia i mahkua, “Niiamo un zaha' u menté' um pinataazan ni Opo Empung u léwo'zéi' im pahkiitan niou.”

²¹ Téntu kangkasii um pahwangunen ni Musa i nimikpika un zaha' witu un Ténda ni Opo Empung karia péléng am pemamakén i mahragés wia si Opo Empung witu un untep un Ténda itii.

²² Mengiit u méipantik witu ung kitap Torat, tawi péléng am péléng én toro weresin karia un zaha'. Wo a singkéla' én zéi'kan wéhan ampungan sa zéi'kan siapa zaha' méikasaroi.

²³ Niitumo, un ténda ni Opo Empung um wia ung kaayahan wo karia péléng am pahpakén witu, an tumuzu'mé am witi kasendukan ém wineresimo karia un zaha' né tatamun. Taan péléng am pahpakén witi kasendukan ém weresin karia un zaha' u lumousé un zaha' né tatamun.

²⁴ Pahpaan si Kristus zéi'kan muntep witi tampa Totoz Lenas um winangun né tou un tanu uman un uli-ulit tampa Totoz Lenas um witi kasendukan, taan si Kristus é nimuntepoma witi kasendukan wo in tarékan ni Sia ém witumo u sinaru ni Opo Empung in tumulung ni kita.

²⁵ Si Kristus nimuntep witu én zéi'kan menau-naup i mayo un tou-Na i maéndo raragés, tanu um pahwangunen ni Walian Wangko' sekez in ta'un i mengangalima un zaha' né tatamun sé kinerizo witi tampa Totoz Lenas, zéi'kan un zaha'na in esa.

²⁶ Pahpaan sa téntu, tantumo ni Sia é léwo'zéi' mazézéha makaz i maté menau-naup rengané ung kaayahan kenu im winangun. Taan wana an endo kaakazan ung kaayahan kenu, ni Sia é makasa uman niméyé i mayo un tou-Na, maéndo raragés in tumubus a singkéla'ta.

²⁷ Niitu é masuat wo si Opo Empung timotozo si tou i makasa uman maté. Tumondong niitu, si Opo Empung én tumotoz am pahwangunen ni tou ulit kaapa zéi'kan.

²⁸ Téntu kangkasii, si Kristus é makasa uman i mayo un tou-Na i maté zuméi' a singkéla' né tou. Tumondong niitu ni Sia i mawurimé sumaup, zéi'kan in zuméi' a singkéla' né tou taan i méhé ung katou-touan makaz ing kauré-uré wia sé ma'ento' ni Sia.