Biblia Todo Logo
Bìoball air-loidhne

- Sanasan -

Ibrani 8 - Taaz Weru Witu u Nunuwu'en Tombulu


Si Yesus Kristus si nimahalimé un taaz niénéan ni Opo Empung

1 Un totoz ipahpuu-puuna witu um pahkuaku kenu, ni kita ém wéwéhano si Walian Wangko' téntu, si rimumezo witu ung kakan u rurumezan ni Opo Empung si Kolano Totoz Wangko' witi kasendukan.

2 Ni Sia si mahpaayang am paayangen ni Walian Wangko' witi tampa totoz lenas witi ténda pahento'an ni Opo Empung witi kasendukan. Un ténda itii ém winangun ni Opo Empung, zéi'kan winangun né tou.

3 Péléng sé Walian Wangko' én tinotozo i mengangali sé tatamun kinerizo wo mahwéhé a raragés wia si Opo Empung. Niitumo, si Yesus, si Walian Wangko'ta é léwo'zéi' im wéwéhan un iragés-Na.

4 Sa si Yesus memia-miapé' wia ung kaayahan kenu, ni Sia én zéi'kan maéndo walian, pahpaan wia ung kaayahan kenu ém wéwéhan sé tinotozo i maéndo walian i mahali a raragés, mengiit un ukum Torat.

5 Ni séra é mahpaayang witi Walé ni Opo Empung un totoz masuat karia um Walé ni Opo Empung witi kasendukan. Niitu én totoz masuat karia u méikua ni Opo Empung wia si Musa puunala sia i nimangun un ténda ni Opo Empung. Si Opo Empung éng kimua wia si Musa, “Gena-genangen! Ni ko é léwo'zéi' mangun niitu péléng mengiit ung kékéréan u mémoipapailek-Ku wia ni ko im witi kentur itii.”

6 Taan in tarékan si Yesus ém winéhan um paayangen u lumouspé'mé um paayangen né walian wia ung kaayahan. Pahpaan ni Sia si nimahalimé um pinataazan niénéan ni Opo Empung u lumouspé'mé ung kawangunan um pinataazan méiwéhé wia si Musa im puuna.

7 Pahpaan, sa um pinataazan kataré é lekepo, zéi'kan siapa torona i mangun um pinataazan kazua.

8 Taan si Opo Empung é nimileko ang kasumalaan né tou Israel a Sia kumua, “Uli-ulit ikua-Kuma! Un orasna é méyé, ni Aku é mangun um pinataazan weru karia né tou Israel wo né tou Yehuda.

9 Um pinataazan weru itii én zéi'kan tanu um pinataazan winangun-Ku wia sé nimaopo néra, i ni séra pengahkiteng-Ku nimondolé witi tana' Mesir. Pahpaan ni séra én zéi'kan mahtali-talinga um pinataazang-Ku, niitumo ni séra é méiwaya-Ku.” Niitu u Nuwu'-Ku.

10 “Ung kenumo um pinataazan um winangun-Ku karia né tou Israel im wana an endo in tumondong. An tinotoz-Ku én iwéhé-Ku witu ung genang néra wo ipantik-Ku witu un até néra wo ni Aku maéndo Opo Empung néra wo ni séra é maéndo tou-Ku.

11 Ni séra én zéi'mo pandung i mahtuzu' sé kawanua néra, kaapa sé katuari néra ing kumua: Mata'ula si Opo Empung! Pahpaan ni séra péléng, in tou kanaramen kaapa in tou pahsigi-sigi'en é lamata'u ni Aku.

12 Pahpaan ni Aku é méhé u raraatéang-Ku wia ni séra sé mahwangun ang kasumalaan, wo zéi'mo megena-genang a singkéla' néra.”

13 I si Opo Empung mahkua tumoro um pinataazan weru, ni Sia nimangun um pinataazan puuna én tewuhmo. Wo apa un tu'amo wo tewuhmo é mamomazéi'.

Lean sinn:



Sanasan