Ibrani 7 - Taaz Weru Witu u Nunuwu'en Tombulu

Si Melkisedek é lumouspé'mé sé walian suzu ni Lewi

¹ Si Melkisedek éng kolano witi wanua tua'na Salem wo ni sia kangkasii é walian ni Opo Empung si Totoz Rakék. Ni siamo si simungkul wo niméhé ung kamang wia si Abraham i si Abraham nimawurimé ing kimoro' kimalamé sé kolano.

² Wia ni siamo kasii si Abraham niméhé u sana pahpulu' im wana péléng ang kinahatnamé i nimahkoro'mé. U ngaran Melkisedek ung kalakoana éng “Kolano si zéi'kan mahsanaweka”, wo ni sia kasii éng kolano witi wanua tua'na Salem, ung kalakoana éng kolano si paaz u mahlé'o-lé'osan.

³ Zéi'kan siapa si mata'u séi si ama', si ina' kaapa sé nimaopo ni Melkisedek. Téntu kangkasii zéi'kan méipantik witu um Pinantik Lenas ing kawisa sia nimatou wo ing kawisa sia i nimaté. Ni sia ém pinasuat karia ni Oki' ni Opo Empung, ni sia ém walian makaz ing kauré-uré.

⁴ Ileken nioula lumé'o-lé'os si Melkisedek, ni sia én totoz ipahpuu-puuna taka-takazan si Abraham, si ama' né nimaopota niméhé u sana pahpulu' im wana péléng ang kinahatnamé an totoz wangun, i ni sia kimoro' kimalamé sé kolano.

⁵ Mengiit u méipantik witu ung kitap Torat, sé suzu ni Lewi uman sé winéhan paayangen i maéndo walian sé wangun i makailek u sana pahpulu' wana am pahkailekané né tou Israel sé katuari néra in esa, zozo' ni séra péléng é suzu ni Abraham.

⁶ Si Melkisedek én zéi'kan suzu ni Lewi taan ni sia é makailek u sana pahpulu' im wana ang kinahaté ni Abraham wo ni sia kasii si kimamang si Abraham zozo' si Abraham nimakaileko un taaz ni Opo Empung.

⁷ Kata'uantamo péléng, si mahwéhé ung kamang é lumouspé'mé si winéhan ung kamang itii.

⁸ Sé suzu ni Lewi sé winéhan paayangen i maéndo walian sé makailek u sana pahpulu' um pahkailekané né tou Israel, ni séra én tou uman sé lamaté. Taan, tanu u méipantik witu um Pinantik Lenas, si Melkisedek si nimakailek sana pahpulu' wana ang kinahaté ni Abraham, ni sia é menou-nou makaz ing kauré-uré.

⁹ Niitumo ni kita én toro kumua, sé suzu ni Lewi sé léwo'zéi' i makailek u sana pahpulu' kinailekané né tou Israel é niméhé u sana pahpulu' anu néra wia si Melkisedek mengiité si Abraham.

¹⁰ Pahpaan si Lewi én zéi'kampé' nimatoumé i si Melkisedek nimahilekané karia ni Abraham. Niitumo, toro kuan i si Lewi ém wiamo mengiité si Abraham pahpaan si Lewi é maéndo suzu ni Abraham.

Si Yesus Kristus ém Walian Wangko' makaz ing kauré-uré

¹¹ I si Opo Empung niméhé un ukum Torat wia sé tou Israel, ni Sia kangkasii é niméléng sé suzu ni Lewi i maéndo walian i mahkit sé tou Israel mangun un ukum Torat itii. Taan um pahpaayangen néra itii én zéi'kan nimangun sé tou i lekep witu u sinaru ni Opo Empung. Pahpaano niitu, léwo'zéi' wéwéhan si Walian Wangko' walina si zéi'kan suzu ni Harun taan si mengiit ung katou-touan wo um pakahpaayang ni Melkisedek.

¹² Pahpaan sa si Walian Wangko' én zéi'kan wia sé suzu ni Lewi a méyé, tantumo un ukum Torat kangkasii é sawelan.

¹³ Si Walian Wangko' pahnuwu'entala kenu én zéi'kan wia sé suzu ni Lewi a méyé. Ni sia ém wia sé suzu né walina a méyé wo zéi'kan siapa im wia ni séra si winéhan um paayangen im witi pahtunuan a raragés.

¹⁴ Pahpaan péléng sé tou é mata'umo i si Yesus Mahpiarata ém wia sé suzu ni Yehuda a méyé. Tumoro sé suzu ni Yehuda kenu, zéi'kan kawisa si Musa ing kimua im wéwéhan si maéndo walian im wia ni séra.

¹⁵ Im witu um pahkuantala kenu én toro kaile-ilekanta wo kata'uanta, sa wéwéhan si maéndo Walian Wangko' weru, ni sia éng kasuat ni Melkisedek.

¹⁶ Ni Sia é nimaéndo Walian Wangko' zéi'kan mengiit an tinotoz tumoro sé suzu né tou taan mengiit ung kawasa menou-nou un zéi'kan lamaléwo'.

¹⁷ Pahpaan tumoro ni Sia, witu um Pinantik Lenas é méipantik téntii, “Ni Ko ém Walian makaz ing kauré-uré, mengiit ung katou-touan wo um pakahpaayang ni Melkisedek im puuna.”

¹⁸ Toromokan kuala an tinotoz im puuna é zinéi'mo pahpaan an tinotoz itii zéi'mo enté' wo zéi'mo siapa torona.

¹⁹ Pahpaan karia i mahkiit un ukum Torat, zéi'kan siapa zozo' in esa si tou niéndo ulit. Taan in tarékan ni kita ém winéhan um pahéré'an u lumouspé'mé un uré, un toro mangun ni kita ing karéténa wia si Opo Empung.

²⁰ Karia in timiwa', si Opo Empung timotoz si Yesus Kristus i maéndo walian. Taan sé walian walina én tinotoz zéi'kan karia un tiwa' ni Opo Empung.

²¹ Taan si Opo Empung timotoz si Yesus Kristus i maéndo walian karia un tiwa'-Na, pahpaan si Opo Empung é nimuwu' wia ni Sia, “Si Opo Empung én timiwa'mo wo ung ginenang-Na én zéi'mo mawalina. ‘Ni Ko ém Walian makaz ing kauré-uré.’ ”

²² Niitumo, im witu un tiwa' ni Opo Empung, uli-ulit toro kata'uanta i si Yesus é nimenté' un taaz ni Opo Empung wia ni kita wo un taaz itii é lumouspé'mé un taaz winangun ni Opo Empung karia né nimaopo né tou Israel.

²³ Im puuna é lakezo sé nimaéndo walian, taan pahpaan ni séra mahpaté umana, niitumo ni séra ém pahsawelan.

²⁴ Taan si Yesus Kristus é menou-nou makaz ing kauré-uré. Ni Sia én zéi'kan pahsawe-sawelala im walian.

²⁵ Niitumo ni Sia én uli-ulit makawawa i milot péléng sé tou im witu un ukuman wana a singkéla', sé méyé wia si Opo Empung mengiité ni Sia. Pahpaan ni Sia menou-nou makaz ing kauré-uré wo ni Sia zéi'kan mazéi' i mahmengaléi ni séra wia si Opo Empung.

²⁶ Niitumo, si Walian Wangko' téntu si pemandungenta. Pahpaan ni Sia é linenas ni Opo Empung, zéi'kan nimahsala-sala'la, zéi'kan siapa pahséro'an, méikatampas im wia sé tou simingkéla' wo ni Sia é nimakaileko un tampa totoz rakék wo pahsigi'en witi kasendukan.

²⁷ Ni Sia én zéi'kan tanu sé walian wangko' walina sé sekez in endo é mengangali sé tatamun kinerizo in iragés in zuméi' a singkéla' néra in esa wo taré mangun un téntu in zuméi' a singkéla' né tou. Pahpaan, niitu ém winangun-Namomé makasa uman makaz ing kauré-uré, i ni Sia nimayo un tou-Na in esa i maéndo raragés in zuméi' a singkéla' né tou.

²⁸ Pahpaan wana un ukum Torat é méitotoz kura sé tou mahsingkéla' i maéndo Walian Wangko'. Taan un tiwa' méikua ni Opo Empung maapuma un ukum Torat itii i méiwéhé én timotoz si Oki'-Na i maéndo Walian Wangko', si zéi'kan siapa pahséro'an makaz ing kauré-uré.