Ibrani 5 - Taaz Weru Witu u Nunuwu'en Tombulu

¹ Péléng sé Walian Wangko' ém pinéléng im wia sé tou i sumawel sé tou lakez, mapaayo péléng an ipapaayo néra wia si Opo Empung wo maayang i méhé a raragés wo mahali sé tatamun sé kinerizo, sé iragés né tou wia si Opo Empung i mahaléi ampungan wana a singkéla'.

² Ni sia é makawawa karia in eluz uman in tumatér sé tou, sé zéi'kan siapa kata'uan wo méikalulu, pahpaan ni sia kangkasii én tou uman si lakez an zéi'kan enté'.

³ Wo pahpaan ni sia in esa én zéi'kan enté', niitumo ni sia é léwo'zéi' i méhé a raragés wia si Opo Empung zéi'kan uman pahpaan a singkéla' né tou taan kangkasii pahpaan a singkéla'na in esa.

⁴ Zéi'kan siapa zozo' in esa si tou niméléng un touna in esa i maéndo Walian Wangko', taan si Opo Empung uman si toro méléng si tou, tanu u nimamuali wia si Harun im puuna i ni sia nimaéndo Walian Wangko'.

⁵ Téntu kangkasii si Kristus, ni Sia én zéi'kan mahsigi' wo mahlooz un touna in esa i maéndo Walian Wangko', taan si Opo Empung si niméléng ni Sia karia ing kimua téntii, “Ni Komo si Oki'-Ku! In endo kenu ni Aku kumua i ni Ko én Oki'-Ku.”

⁶ Witu u rérékénan walina kangkasii si Opo Empung éng kimua, “Ni Ko ém Walian makaz ing kauré-uré, mengiit ung katou-touan wo um pakahpaayang ni Melkisedek im puuna.”

⁷ Si Yesus i menou-noupé' wia ung kaayahan kenu, karia i mahkérét wo pahlué'an, ni Sia mengaléi wia si Opo Empung pahpaan si Opo Empung uman si makawawa i milot ni Sia im witu um patéan. Pahpaan ni Sia mahtali-talinga si Opo Empung, um pengaléien-Na én tinalinga ni Opo Empung.

⁸ Zozo' ni Sia én Oki' ni Opo Empung, taan pahpaan am pengalin-Na, ni Sia é mata'umo kura u mahtali-talinga wia si Opo Empung.

⁹ Im pinakapendan-Namomé péléng am pengalin-Na, taré si Opo Empung mangun ni Sia zéi'kan siapa pahséro'an wo ni Sia uman si milot sé tou im witu un ukuman wana a singkéla' makaz ing kauré-uré wia sé tou mahtali-talinga ni Sia.

¹⁰ Ni Sia kangkasii én tinawah ni Opo Empung i maéndo Walian Wangko', mengiit ung katou-touan wo um pakahpaayang ni Melkisedek im puuna.

Mahtututu'la ing kumiit si Yesus Kristus

¹¹ Totozpé' lakez un ipapata'u nai tumoro si Yesus wo si Melkisedek pahpaan ni séra zua ém Walian Wangko', taan susa i mapata'u niitu wia ni kamu pahpaan ni kamu én tahlous ngerez i makatulap niitu.

¹² Un ulitna, in tarékan ni kamu én orasnamo i maéndo méster. Taan makaz in tarékan ni kamu é memandungpé' sé tou walina i mapata'u wia ni kamu an tutuzu' kataré-taré u nimaéndo to'tolan tumoro um pa'émanen niou witu u Nuwu' ni Opo Empung. Ni kamu é memandungpé' u susu, zéi'kampé' mata'u makailek ang kakanen ketéh.

¹³ Pahpaan sé tou zéi'kampé' mata'u mahtotoz wisa un ulit wo wisa u simala', ni séra én tanu si koki' mahelepé' u susu.

¹⁴ Taan sé tou mahnanaram un tou néra i mahtotoz wisa u lé'os wo wisa u léwo', ni séra én tanu sé tou tu'amo sé mahkan ang kakanen ketéh.