Ibrani 3 - Taaz Weru Witu u Nunuwu'en Tombulu

Si Yesus lumouspé'mé si Musa

¹ Katuari-katuari sé linenas wo sé tinawahmo i maayang wia si Opo Empung. Wéhan nioula genang si Yesus si niéndo Aatu ni Opo Empung wo Walian Wangko', si pa'émanenta in ulit wo zéi'kan maindé' in ipahwoka'ta wia sé tou walina.

² Ni Sia é mahwangun péléng a méiatu ni Opo Empung si niméléng ni Sia, tanu si Musa mahwangun péléng a méiatu ni Opo Empung i mahsawang sé tou Israel sé tanumokan um Walé ni Opo Empung.

³ Taan si Yesus é lumouspé'mé si Musa im pahsigi'en wo pahloozen. Niitu é masuatokan karia ni memamangun um walé, ni siapé' si lumouspé'mé im pahsigi'en taan um walé winangunna itii.

⁴ Pahpaan péléng am walé ém winangun ni memamangun um walé, taan si nimangun péléng am péléng é si Opo Empung.

⁵ Si Musa in ata é mahwangun péléng a méiatu ni Opo Empung witi Walé-Na, un tumuzu'mé tumoro an ikua ni Opo Empung in tumondong.

⁶ Taan si Kristus in Oki' ni Opo Empung é si mahwangun a méiatu ni Opo Empung im witu um walé-Na wo ni kitamo um walé-Na itii, sa kita zéi'kan mazéi' in totoz ma'éman wo niméré' uman un iwéhémé ni Opo Empung u mangun ni kita i mahpaa-paaz.

Tia' ipahketéh un até

⁷ Niitumo, tanu u méikua ni Roh ni Opo Empung witu um Pinantik Lenas, “In endo kenu, sa kamu tumalinga un ipahkua ni Opo Empung,

⁸ tia' ipahketéh un até niou tanu sé nimaopo niou, sé mahsaru wo mema'wa' si Opo Empung im witi kapelasan.

⁹ Im witu sé nimaopo niou mema'wa' ni Aku karia am pema'wa'en, zozo' in epatna pulu' ta'uno, ni séra i mengile-ngilek a makakompo'en am pahwanguneng-Ku.

¹⁰ Pahpaano niitu ni Aku én totoz maupi' wia ni séra ang kumua: ‘Sekezé ni séra é soo ing kumiit ni Aku wo ni séra é soo mahwangun a méiatu-Ku.’

¹¹ Pahpaan in totoz maupi' ni Aku é mahtiwa', ‘Ni séra én zéi'kan ikauntep witu un tampa makanaang-Ku ing kumana' karia-Ku.’ ”

¹² Niitumo katuari-katuari, mile-ilek én taa im wia ni kamu ém wéwéhan zozo' in esa si makaaté u léwo'an wo soo ma'éman taka-takazan nimangun ni sia kimana' i mahtali-talinga wia si Opo Empung si menou-nou.

¹³ Taan mahsésésaala si esa im wia sé walina sekez in endo, in toropé' taré kumua “endo kenu”, wo zozo' in esa im wia ni kamu én zéi'kan siapa si matampezéi' pahpaan tinowoan a singkéla'.

¹⁴ Pahpaan ni kita é nimaesamo karia ni Kristus in tou-Na, niitumo tio-tionan um pa'émanen um wiamo ni kita rengané ing kataré-taré i ma'émanla si Yesus makaz ing kamurian.

¹⁵ Witu um Pinantik Lenas é méipantik in téntii, “In endo kenu, sa kamu tumalinga u nuwu' ni Opo Empung tia' ipahketéh un até niou tanu sé nimaopo niou i mahsaru ni Aku.”

¹⁶ Séi ndéén séra wé sé mahtalinga an ipahkua ni Opo Empung taan mahsaru ni Sia? Zéi'kankuaa ni séramo sé nimaopo né tou Israel sé ipahtu'tul ni Musa nimondolé im witi Mesir?

¹⁷ Séi ndéén wé sé méikaupi'-Na epatna pulu' ta'un? Zéi'kankuaa sé memua-muali a singkéla' wo sé nimaté witi kapelasan?

¹⁸ Séi ndéén wé sé méitiwa' ni Opo Empung in zéi'kan mahunte-untepla witi tampa u makanaan-Na? Zéi'kankuaa ni séra sé zéi'kan mahtali-talinga wia ni Sia?

¹⁹ Niitumo, méikatuzu'momé i sé nimaopota én zéi'kan mata'u muntep witu un tampa itii pahpaan ni séra soo ma'éman si Opo Empung.