Ibrani 2 - Taaz Weru Witu u Nunuwu'en Tombulu

U Nuwu' ni Opo Empung én ulit

¹ Niitumo, totoz im pahwéhanla genang an tutuzu' tumoro si Yesus an tinalingatamo, wo kita tia' kauréna éng kazou'na im wana an tutuzu' itii a mémoikua wia ni kita wo sinungkultamo, ang kumiit an tutuzu' a mahlululu uman um pa'émanenta.

² Pahpaan sa a Nuwu' ni Opo Empung an im puuna méikuamo mengiité sé malaekat wia si Musa, wo um wia si Musa an ikuana wia sé tou Israel én totoz ulit, wo sé tou zéi'kan mahkii-kiit wo sé zéi'kan mahtali-talinga é nimakaileko un ukuman mengiit um pinahwangunnamé,

³ kura kita in ikapilot sa kita zéi'kan mahwéhé genang witu un ipilot im witu un ukuman wana a singkéla' un totoz wangko' itii? Niitu ing kataré-taré é mémoipahwoka'ma ni Yesus Mahpiara, tumondong niitu, sé tou timalinga niitu in esa im wia si Yesus éng kimua wia ni kita i niitu én ulit.

⁴ Si Opo Empung kangkasii é nimenté' an tinalinga wo an ipahkua néra itii, karia niméhé ung kawasa-Na wia ni séra i mahwangun sé tou mengusi-ngusingsing wo a makakompo'en wo an tatambér ni Roh Lenas, a méiwéhé-Na mengiit ung kapaaz-Na.

Si Yesus Kristus nimaéndo tou uman

⁵ Sé malaekat én zéi'kan makailek ung kawasa ni Opo Empung i merénta ung kaayahan weru u mawia in tumondong um wangunen ni Opo Empung, um pahkuantala kenu.

⁶ Taan witu um Pinantik Lenas ém wéwéhan si kimua in téntii, “Opo Empung, apa ndéén si tou wé taka-takazan sia pahwéhan-Nu genang, kaapa si suzu ni tou uman wo pahpandungen-Nu?

⁷ Winangun-Mu si tou im wawa'pé'mé oki' im wia sé malaekat, taan zéi'kan mauréma, wo im wia sé winangun-Mu walina ni sia én tanumokan sé kolano sé pahloozen wo pahsigi'en,

⁸ pahpaan péléng am péléng é méiwéhé-Mu ing kawasaanna tanu i méiwéhé witu um wawa' um palaz un a'éna.” Pahpaan péléng am péléng é mémoiwéhé-Mu ing kawasaan ni tou, niitu én tumuzu'mé zozo' in esa én zéi'kan siapa an zéi'kan méiwéhémé ing kawasaanna. Taan akaz in tarékan ni kita én zéi'kampé' nimilek péléng am péléng éng kinawasaannamo.

⁹ Taan im puuna i si Yesus wiapé' ung kaayahan, ni Sia ém winangun ni Opo Empung wawa'pé'mé oki' im wia sé malaekat taan zéi'kan tahlous uré. In toro niitu, pahpaan ung kamang méitambér ni Opo Empung, ni Sia nimaté wia péléng sé tou. Pahpaan ni Sia nimazéhamo makaz i nimaté, niitumo in tarékan ni kita nimileko i si Yesus é nimakaileko u looz wo u sigi' ni Opo Empung.

¹⁰ Si Opo Empung si nimangun péléng am péléng ém wanguno i nimangun si Yesus zéi'kan siapa pahséro'an pahpaan ni Sia é nimazéhamo makaz i nimaté. Karia in téntu, si Yesus é nimaéndo memumuka lalan wo sé tou makailek ung katou-touan makaz ing kauré-uré. Téntu kangkasii, si Opo Empung é nimangun sé tou lakez maéndo oki'-Na taka-takazan pahloozen wo pahsigi'en tanu ni Sia si pahloozen wo pahsigi'en itii.

¹¹ Si Yesus si limenas sé tou ma'éman wo ni séra sé linenas-Na ém péléng wia si Esa Ama' a méyé, ni Siamo si Opo Empung. Niitumo, si Yesus én zéi'kan maizang i mahkua ni séra ing katuari-Na.

¹² Si Yesus éng kimua, “Ama', u ngaran-Mu én iwoka'-Ku wia sé katuari-Ku, wo ni Ko é loozeng-Ku i ni Aku nimaréwok karia né jamaat.”

¹³ Si Yesus kasii éng kimua, “Ni Aku é niméré' uman wia si Opo Empung.” Wo ni Sia kasii éng kimua, “Kenumo ni Aku karia né koki' sé mahkii-kiit ni Aku sé méiwéhé-Mu wia ni Aku.”

¹⁴ Sé koki' sé méiwéhémé ni Opo Empung itii é sé tou uman sé winangun karia u lé'ona wo un zaha'. Niitumo, si Yesus nimaéndo tou uman si winangun karia u lé'ona wo un zaha' tanu sé tou uman sé toro maté. Karia Sia i nimaté, ni Sia éng kimalamoma si tonaas né sétang si kimawasa witu um patéan.

¹⁵ Karia in téntu, ni Sia é milot sé tou sé kauréna i menou-nou ém pahata-atan pahpaan maindé' um patéan.

¹⁶ Un ulitna zéi'kan sé malaekat sé tulungen-Na, taan sé suzu ni Abraham.

¹⁷ Niitumo, wana péléng am péléng ni Sia é léwo'zéi' i maéndo tou uman kasuat né katuari-Na wo ni Sia maéndo Walian Wangko' si totoz rumaraaté wo ni Sia mahwangun péléng a méiatu ni Opo Empung mengiit un ikapaaz-Na im wangunen, i meresi a singkéla' né tou wo séra mawurian sumaup karia ni Opo Empung.

¹⁸ Pahpaan ni Sia in esa é nimazézéhamo i ni Sia pema'wa'en, niitumo ni Sia é makawawa in tumulung ni séra sé wana am pema'wa'en.